നീ തങ്കപ്പനല്ലെടാ പൊന്നപ്പന്... കരുവന്നൂര് സഹകരണ ബാങ്ക് വായ്പാ തട്ടിപ്പിനെതിരെ പാര്ട്ടിക്കുള്ളില് പരാതിപ്പെടുകയും ഒറ്റയാള് പോരാട്ടം നടത്തുകയും ചെയ്ത സി.പി.എം മുന് ബ്രാഞ്ച് സെക്രട്ടറി സുജേഷ് കണ്ണാട്ട് ഒടുവില് തിരിച്ചെത്തി; നാട് തീ തിന്നവെ യാത്ര പോയതാണെന്നാണ് സുജേഷ് നല്കുന്ന വിശദീകരണം
സുജേഷ് കല്ലാട്ട് ഒരു വ്യക്തിയല്ല പ്രസ്ഥാനമാണെന്ന് നാട്ടുകാര് തിരിച്ചറിഞ്ഞ ദിനങ്ങളാണ് കടന്നു പോയത്. എന്തെല്ലാം കഥകളാ മെനഞ്ഞെടുത്തത്. അവസാനം കാണാതായ മുന് സിപിഎം പ്രവര്ത്തകന് സുജേഷ് കണ്ണാട്ട് തിരിച്ചെത്തി. തിങ്കളാഴ്ച പുലര്ച്ചെ രണ്ടോടെയാണ് സുജേഷ് വീട്ടില് എത്തിയത്. യാത്ര പോയതാണെന്നാണ് സുജേഷ് നല്കുന്ന വിശദീകരണം.
കരുവന്നൂര് സഹകരണ ബാങ്ക് തട്ടിപ്പ് കേസിലെ പരാതിക്കാരനാണ് സുജേഷ്. അതേസമയം, ശനിയാഴ്ച മുതല് സുജേഷിനെ കാണാനില്ലെന്ന് ചൂണ്ടിക്കാട്ടി ബന്ധുക്കള് പോലീസില് പരാതി നല്കിയിരുന്നു.
ഇതില് കേസടുത്തതിനാല് സുജേഷിനെ ഇന്ന് കോടതിയില് ഹാജരാക്കും. കരുവന്നൂര് ബാങ്ക് തട്ടിപ്പുമായി ബന്ധപ്പെട്ട് ഒറ്റയാള് സമരം നടത്തിയയാളാണ് മുന് ബ്രാഞ്ച് സെക്രട്ടറിയായ സുജേഷ്. പാര്ട്ടിയിലെ എതിര്പ്പ് അവഗണിച്ചായിരുന്നു സമരം. പാര്ട്ടിയുടെ വിവിധ ഘടകങ്ങളിലും സുജേഷ് പരാതി നല്കിയിരുന്നു. ഇതിനെ തുടര്ന്ന് വധഭീഷണി നേരിട്ടിരുന്നു. ഇതിനിടെയാണ് കാണാതാകുന്നത്.
കരുവന്നൂര് സഹകരണ ബാങ്ക് വായ്പാ തട്ടിപ്പിനെതിരെ പാര്ട്ടിക്കുള്ളില് പരാതിപ്പെടുകയും ഒറ്റയാള് പോരാട്ടം നടത്തുകയും ചെയ്ത സി.പി.എം മുന് ബ്രാഞ്ച് സെക്രട്ടറിയെ കാണാതായെന്ന പരാതി വന്നതോടെയാണ് സംഭവം പുറം ലോകം അറിയുന്നത്. പാര്ട്ടിയില് നിന്ന് പുറത്താക്കപ്പെട്ട കെ.കെ. സുജേഷ് കണ്ണാട്ടിനെയാണ് കാണാതായത്.
സുജേഷിനെ ശനിയാഴ്ച വൈകിട്ട് മുതല് കാണാനില്ലെന്ന് കാട്ടി സഹോദരന് സുരേഷാണ് ഇരിങ്ങാലക്കുട പൊലീസില് പരാതി നല്കിയത്.
ശനിയാഴ്ച കാറില് കയറി വീട്ടില് നിന്നും പോയ സുജേഷ് ഞായറാഴ്ച വൈകിട്ട് വരെ തിരിച്ചെത്തിയില്ലെന്നും രണ്ട് ഫോണുകളും സ്വിച്ച് ഓഫ് ആണെന്നും പരാതിയിലുണ്ട്. കേസെടുത്ത് അന്വേഷണം ആരംഭിച്ചതായും സുജേഷിന്റെ മൊബൈല് ലൊക്കേഷന് കണ്ണൂര് ജില്ലയ്ക്കടുത്തുണ്ടെന്ന് കണ്ടെത്തിയതായും പൊലീസ് പറഞ്ഞു.
കരുവന്നൂര് ബാങ്ക് ക്രമക്കേടിനെതിരെ ഏറെക്കാലമായി സുജേഷ് രംഗത്തുണ്ട്. ബാങ്കിലെ തട്ടിപ്പിനെതിരെ പ്രതികരിക്കുകയും ഫേസ്ബുക്ക് പോസ്റ്റുകള് ഇടുകയും ചെയ്ത സുജേഷിനെ ആഗസ്റ്റിലാണ് പാര്ട്ടിയുടെ പ്രാഥമിക അംഗത്വത്തില് നിന്ന് സി.പി.എം പൊറത്തിശേരി സൗത്ത് ലോക്കല് കമ്മിറ്റി പുറത്താക്കിയത്. 100 കോടിയിലേറെ തട്ടിപ്പ് നടന്നെന്ന് ഉറപ്പായതോടെ ബാങ്കിന് മുന്നില് ഒറ്റയാള് പ്രതിഷേധവും നടത്തിയിരുന്നു.
കരുവന്നൂര് സഹകരണ ബാങ്ക് തട്ടിപ്പിനെതിരെ ഒറ്റയാള് സമരം നടത്തിയതുമായി ബന്ധപ്പെട്ട് ഭീഷണിയുണ്ടായിരുന്നുവെന്ന് സുജേഷ് കണ്ണാട്ടിന്റെ ബന്ധുക്കള് മാദ്ധ്യമങ്ങളോട് പറഞ്ഞു. തട്ടിപ്പ് കേസിലെ പ്രതികള്ക്ക് ഉന്നത ബന്ധമുണ്ടെന്ന് പരാതിപ്പെട്ടതിനെ തുടര്ന്ന് വധഭീഷണി നേരിടേണ്ടിവന്നുവെന്നും, എസ്.പിക്ക് പരാതി കൊടുത്തെങ്കിലും അന്വേഷണമുണ്ടായില്ലെന്നും സുജേഷും ആരോപിച്ചിരുന്നു.
കോണ്ഗ്രസ് ഭരിക്കുന്ന മറ്റൊരു സഹകരണ ബാങ്കിനെതിരെ 2017ല് സി.പി.എം സമരം നടത്തിയപ്പോള് ഇവിടത്തെ തട്ടിപ്പിനെക്കുറിച്ച് പരാതിപ്പെട്ടിരുന്നു. ബ്രാഞ്ച്, ഏരിയാ കമ്മിറ്റികളിലും ജില്ലാ കമ്മിറ്റി അംഗങ്ങളോടും ഇക്കാര്യം സുജേഷ് സൂചിപ്പിച്ചിരുന്നു. ക്ഷീരകര്ഷകരും നെല്ക്കര്ഷകരുമായ നിരവധി പേര്ക്ക് പണം പിന്വലിക്കാനാവാതെ വന്നതോടെയാണ് ജൂണ് പതിനാലിന് സുജേഷ് ബാങ്കിന് മുന്നില് സമരം നടത്തിയത്.
കേസിലെ മുഖ്യ പ്രതികളിലൊരാളായ ബിജു കരീമിനെതിരെ സംസാരിച്ചപ്പോള് പാര്ട്ടി താക്കീത് ചെയ്തു. ചിലരെ പുറത്താക്കി മുഖം രക്ഷിക്കാനുള്ള നടപടി കൊണ്ട് പ്രശ്നം പരിഹരിക്കപ്പെടില്ലെന്നും, വിശദീകരണം ചോദിക്കാതെയാണ് പാര്ട്ടിയില് നിന്ന് പുറത്താക്കിയതെന്നും സുജേഷ് മാദ്ധ്യമങ്ങളോട് പ്രതികരിച്ചിരുന്നു. ഇതിനിടെയാണ് സമരവും കാണാതാകലും തിരിച്ചു വരലും.
https://www.facebook.com/Malayalivartha