വിദ്യാഭ്യാസ വകുപ്പില് വിവരങ്ങള് അറിയാന് വിളിച്ചാല് കിട്ടുന്ന ഫോണ് നമ്പര് ഇല്ലെന്ന ആകുലത ഇനി വേണ്ട ;14 ജില്ലകളിലും വിദ്യാഭ്യാസ ഓഫീസുകളില് കാര്യക്ഷമമായ ടെലിഫോണ് സംവിധാനത്തിന്റെ ഉദ്ഘാടനം ഇന്ന് , സംസ്ഥാനതല ഉദ്ഘാടനം തിരുവനന്തപുരം ഡി ഡി ഓഫീസില് മന്ത്രി വി ശിവന്കുട്ടി രാവിലെ 9. 30 ന് നിര്വഹിക്കും
കേരളത്തിലെ 14 വിദ്യാഭ്യാസ ഡപ്യൂട്ടീ ഡയറക്ടറേറ്റുകളിലേയും എല്ലാ ഡി ഇ ഒ,എ ഇ ഒ ആഫീസുകളിലേയും സേവനങ്ങള് സംബന്ധിച്ച വിവരങ്ങള് രക്ഷകര്ത്താക്കളിലും പൊതുജനങ്ങളിലും എത്തിക്കുന്നതിന്റെ ഭാഗമായി ഓഫീസുകളിലെ കാര്യക്ഷമമായ ടെലിഫോണ് സംവിധാനത്തിന്റെ ഉദ്ഘാടനം വിവിധ എം.എല്.എമാര്, രാഷ്ട്രീയ പ്രമുഖര്, തദ്ദേശ സ്വയംഭരണ മേധാവികള് തുടങ്ങിയവര് ഇന്ന് (30122021 വ്യാഴം) നിര്വ്വഹിക്കും.
പരിപാടിയുടെ സംസ്ഥാന തല ഉദ്ഘാടനം (30122021 വ്യാഴം) രാവിലെ 9.30ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവന്കുട്ടി തിരുവനന്തപുരം വിദ്യാഭ്യാസ ഡപ്യൂട്ടീ ഡയക്ടറേറ്റില് നിര്വ്വഹിക്കും .സംസ്ഥാനത്തെ പ്രൈമറി, സെക്കന്ററി, ഹയര് സെക്കന്ററി സ്കൂളുകളിലെ കാര്യക്ഷമമായ ടെലിഫോണ് സംവിധാനത്തിന്റെ ഉദ്ഘാടനം ജനുവരി 15ന് മുന്പ് പൂര്ത്തിയാക്കി നിലവിലെ ടെലിഫോണ് നമ്പരുകള് വിദ്യാഭ്യാസ വകുപ്പിന്റെ ഔദ്ധ്യോഗിക വെബ്സൈറ്റ് വഴി പൊതുജനങ്ങള്ക്ക് ലഭ്യമാക്കും.
പൊതുവിദ്യാഭ്യാസ വകുപ്പിന് കീഴിലുള്ള സ്ഥാപനങ്ങളില് ഫോണ് സംവിധാനം കാര്യക്ഷമമാക്കുന്നതിന്നേരത്തെ വകുപ്പ് ഉത്തരവിറക്കിയിരുന്നു. കാര്യങ്ങള് അറിയാന് സ്ഥാപനങ്ങളിലേക്ക് വിളിക്കാന് പല ഓഫീസുകള്ക്കും ഫോണ് നമ്പര് ഇല്ല എന്ന പരാതിയെ തുടര്ന്ന് വിദ്യാഭ്യാസ മന്ത്രിയുടെ നിര്ദേശ പ്രകാരം നടത്തിയ പരിശോധനയെ തുടര്ന്നാണ് ഉത്തരവിറക്കിയത്.
പ്രൈമറി തലം മുതല് ഹയര് സെക്കണ്ടറി തലം വരെയുള്ള എല്ലാ സ്ഥാപനങ്ങളിലും ലാന്ഡ് ഫോണ് ഉണ്ടാകണം. പ്രവര്ത്തനക്ഷമമല്ലാത്ത ഫോണ് കണക്ഷനുകള് ഉണ്ടെങ്കില് അത് ശരിയാക്കിയെടുക്കാന് നടപടി വേണം. അത് സാധ്യമല്ലെങ്കില് പൊതുവിദ്യാഭ്യാസ ഡയറക്ടറുടെ അനുമതിയോടെ പുതിയ കണക്ഷന് എടുക്കണം.
ഓരോ ദിവസവും ഓഫീസിലേക്ക് വരുന്ന കാളുകള് അറ്റന്ഡ് ചെയ്യാന് ഓഫീസ് മേധാവി റൊട്ടേഷന് അടിസ്ഥാനത്തില് ഓഫീസ് ജീവനക്കാര്ക്ക് ചുമതല ഉത്തരവ് വഴി നല്കണം. ടെലിഫോണ് വഴി പരാതി ലഭിക്കുകയാണെങ്കില് അത് കൃത്യമായി രെജിസ്റ്ററില് രേഖപ്പെടുത്തണം. തുടര് നടപടി രണ്ടാഴ്ചയിലൊരിക്കല് ഓഫീസ് മേധാവി വിലയിരുത്തണം. ഓഫീസ് പരിശോധനാ വേളയില് ബന്ധപ്പെട്ട അധികാരികള് ഈ രെജിസ്റ്റര് നിര്ബന്ധമായും പരിശോധിക്കണം.
അതാത് കാര്യാലയങ്ങളില് നിന്നും അയക്കുന്ന കത്തിടപാടുകളില് കാര്യാലയത്തിന്റെ ഫോണ് നമ്പര്, ഔദ്യോഗിക ഇ-മെയില് ഐ.ഡി. എന്നിവ നിര്ബന്ധമായും ഉള്പ്പെടുത്തേണ്ടതാണ്. സ്കൂള്/ഓഫീസിലേക്ക് വരുന്ന ഫോണ് കോളുകള്ക്ക് കൃത്യമായും സൗമ്യമായ ഭാഷയിലും മറുപടി നല്കേണ്ടതാണ്.
ഇക്കാര്യങ്ങള് ശരിയായ രീതിയില് നടക്കുന്നുണ്ടെന്ന് ഉറപ്പു വരുത്തുന്നതിന് അതാതു സ്ഥാപനങ്ങളുടെ മേല്നോട്ട ചുമതലയുള്ള ജില്ലാ - ഉപജില്ലാ വിദ്യാഭ്യാസ ആഫീസര്മാര്, റീജിയണല് ഡെപ്യൂട്ടി ഡയറക്ടര്, അസിസ്റ്റന്റ് ഡയറക്ടര് ഓഫീസുകളിലെ സീനിയര് സൂപ്രണ്ട് റാങ്കില് കുറയാത്ത ഒരുദ്യോഗസ്ഥനെ ബന്ധപ്പെട്ട ഓഫീസ് മേധാവികള് ചുമതലപ്പെടുത്തേണ്ടതാണ്. ഈ ഉദ്യോഗസ്ഥന്റെ പേരു വിവരം ഫോണ് നമ്പര് സഹിതം ജില്ലാതലത്തില് ക്രോഡീകരിച്ച് ഒ&എം സെക്ഷനിലേക്ക് നല്കേണ്ടതാണ്.
"
https://www.facebook.com/Malayalivartha
