തിരുവനന്തപുരം പേട്ട കൊലപാതകത്തില്‍ നടുക്കുന്ന വെളിപ്പെടുത്തലുകളുമായി കൊല്ലപ്പെട്ട അനീഷിന്റെ അമ്മ ഡോളി. സൈമണും കുടുംബവും വിളിച്ചു വരുത്തിയാണ് തന്റെ മകനെ കൊലപ്പെടുത്തിയതെന്നും അവര്‍ ആരോപിക്കുന്നത്. അവളോ അവളുടെ അമ്മയോ വിളിച്ചതാകും. ആ സമയത്ത് എന്തോ പ്രശ്‌നമുണ്ടായിട്ടാണ് അവന്‍ അവിടെ പോയത്.

സൈമണിന്റെ കുടുംബപ്രശ്‌നങ്ങള്‍ കുറച്ചൊക്കെ ഞങ്ങള്‍ക്കും അറിയാം, ഭാര്യയെയും മക്കളെയും അയാള്‍ ഉപദ്രവിക്കാറുണ്ടെന്നും അപ്പോഴെല്ലാം അവര്‍ പറഞ്ഞിട്ട് മോന്‍ ഇവിടുന്ന് പോകാറുണ്ടെന്നും ഡോളി പറഞ്ഞു.

ഭര്‍ത്താവ് കൊല്ലാന്‍ ശ്രമിക്കുന്നതായൊക്കെ അവര്‍ പറഞ്ഞിട്ടുണ്ട്. അന്നും അതുപോലെ എന്തോ സംഭവിച്ചിട്ടാണ് അവന്‍ പോയിട്ടുണ്ടാവുക, എന്റെ മോനെ എല്ലാവരും കൂടി ചേര്‍ന്ന് കുത്തിക്കൊല്ലുകയായിരുന്നു അനീഷിന്റെ അമ്മ വിങ്ങലോടെ പറഞ്ഞു.ചൊവ്വാഴ്‌ച അനീഷിനൊപ്പം അവരെല്ലാം ലുലുമാളില്‍ പോയിരുന്നു.

ജോലി കഴിഞ്ഞ് വീട്ടിലെത്തിയ സമയത്ത് മകനെ കാണാഞ്ഞിട്ട് ഫോണിലേക്ക് വിളിച്ചെങ്കിലും കിട്ടിയില്ല. അങ്ങനെയാണ് പെണ്‍കുട്ടിയുടെ ഫോണിലേക്ക് വിളിച്ചത്. മമ്മീ, ഞങ്ങളെല്ലാവരും ലുലുമാളിലുണ്ടെന്നും ബിരിയാണി കഴിക്കുകയാണെന്നുമായിരുന്നു അവള്‍ പറഞ്ഞത്.

അന്ന് വൈകിട്ട് ഓഫീസിലെ ഒരു പരിപാടിയില്‍ പങ്കെടുക്കാനായി ഞാന്‍ വീണ്ടും പോയി. രാത്രി 9 മണിയ്‌ക്ക് മകനാണ് എന്നെ കൂട്ടാന്‍ വന്നത്. രാത്രി അവന് കുടിക്കാനായി ഒരു ഗ്ലാസ് പാലും എടുത്തുകൊടുത്തിട്ടാണ് ഉറങ്ങാനായി പോയത്. രാവിലെ കേട്ട വാര്‍ത്ത ഒരിക്കലും കേള്‍ക്കാന്‍ ആഗ്രഹിക്കാത്തതാണ്.

അവന്‍ എപ്പോഴാണ് വീട്ടില്‍ നിന്നും പോയതെന്ന് പോലും അറിഞ്ഞില്ല. വിവരമറിഞ്ഞ് പെണ്‍കുട്ടിയുടെ അമ്മയെ വിളിച്ചെങ്കിലും അവര്‍ പറഞ്ഞത് എനിക്കൊന്നും അറിയില്ല, സ്റ്റേഷനില്‍ പോയാല്‍ മതിയെന്നായിരുന്നു പറഞ്ഞത്. എന്റെ മോനെ എല്ലാവരും കൂടി ചേര്‍ന്ന് കുത്തിക്കൊല്ലുകയായിരുന്നുവെന്നും ഡോളി പറഞ്ഞു.