ലോക സാമ്പത്തിക ഫോറത്തിന്റെ സമ്മേളനത്തിൽ പ്രധാനമന്ത്രി നരേന്ദ്രമോദിയുടെ ഓൺലൈൻ പ്രസംഗത്തിനിടെ ചില തടസ്സങ്ങൾ നേരിട്ടിരുന്നു. എന്നാൽ പ്രോംപ്റ്റർ നിന്നു പോയത് കൊണ്ടാണ് പ്രധാനമന്ത്രി അത്തരത്തിൽ പ്രതികരിച്ചത് എന്ന തരത്തിലുള്ള ആക്ഷേപങ്ങളും കഴിഞ്ഞദിവസം സാമൂഹിക മാധ്യമങ്ങളിൽ അടക്കം ശക്തമായിരുന്നു. ഈ വിഷയത്തിൽ പ്രതികരണവുമായി സന്ദീപ് ജി വാര്യർ രംഗത്ത് വന്നിരിക്കുകയാണ്.

അദ്ദേഹത്തിന്റെ ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ; പറയുന്ന കാര്യത്തോട് ഉത്തരവാദിത്തമുള്ള ഭരണാധികാരികൾ അന്താരാഷ്ട്ര വേദികളിൽ എഴുതി തയ്യാറാക്കിയ പ്രസംഗം പേപ്പറിൽ നോക്കിയോ ടെലി പ്രോംപ്റ്റർ സഹായത്താലോ അവതരിപ്പിക്കും . അതാണ് കീഴ്‌വഴക്കവും പതിവും . രാഹുൽ ഗാന്ധിയുടെ പിതാവും മുത്തശ്ശിയുമെല്ലാം എഴുതി വായിക്കുന്ന ചിത്രങ്ങളും ദൃശ്യങ്ങളും ലഭ്യമാണ് .

രാജ്യത്തിൻറെ പ്രധാനമന്ത്രി അന്താരാഷ്ട്ര വേദികളിൽ പ്രസംഗിക്കുന്നത് രാജ്യത്തിന് വേണ്ടിയാണ് . ഇന്നലെ പ്രസംഗം തടസ്സപ്പെട്ടപ്പോഴും അദ്ദേഹം ഇന്ത്യയെക്കുറിച്ചായിരുന്നു പ്രസംഗിച്ചിരുന്നത് . ബിജെപിയെക്കുറിച്ചായിരുന്നില്ല . പ്രതിപക്ഷ നേതാവായിരുന്നപ്പോഴും രാജ്യത്തിന് ഒരു പ്രതിസന്ധി വന്നപ്പോൾ ഐക്യരാഷ്ട്ര സഭയിൽ പോയി പ്രസംഗിച്ച് രാജ്യത്തെ വിജയിപ്പിച്ചു വന്ന അടൽ ബിഹാരി വാജ്‌പേയിയെ ഈ നിമിഷം സ്മരിക്കുന്നു . രാഹുൽ ഗാന്ധിയിൽ നിന്ന് ആ സംസ്കാരം പ്രതീക്ഷിക്കാൻ കഴിയില്ലല്ലോ എന്ന് പറഞ്ഞാണ് കുറിപ്പ് അവസാനിപ്പിച്ചിരിക്കുന്നത് .

എന്നാൽ യഥാർത്ഥ കാരണം ഇപ്പോൾ പുറത്തു വരികയാണ്. തടസ്സത്തിന് കാരണം സംഘാടകർ തമ്മിലുള്ള ആശയവിനിമയത്തിലെ തകരാറെന്ന് സ്ഥിരീകരണം വന്നിരിക്കുന്നു . പ്രസംഗത്തിനിടെ തടസ്സമുണ്ടായത് ടെലിപ്രോംപ്റ്ററിന്റെ തകരാറ് മൂലമാണെന്ന തരത്തിൽ രാഹുൽ ഗാന്ധിയും കോൺഗ്രസുമെല്ലാം വ്യാപകമായി വ്യാജപ്രചരണങ്ങൾ നടത്തിയിരുന്നു.

ഇതിന് പിന്നാലെയാണ് ആ സമയത്ത് സംഭവിച്ചത് എന്താണെന്ന് വ്യക്തമാക്കുന്ന വീഡിയോ ദൃശ്യങ്ങൾ ഉൾപ്പെടെ ഇപ്പോൾ പുറത്ത് വന്നിരിക്കുന്നത്. സാമ്പത്തിക ഫോറത്തിന്റെ സംഘാടകരും പ്രധാനമന്ത്രിയുടെ ടീം അംഗങ്ങളും തമ്മിൽ ആശയവിനിമയത്തിലുണ്ടായ പ്രശ്‌നം മൂലമായിരുന്നു പ്രസംഗം ആവർത്തിച്ചത്.