തിരുവനന്തപുരം, കോഴിക്കോട് ലൈറ്റ് മെട്രോ പദ്ധതികള്‍ക്ക് ഭരണാനുമതി നല്‍കാന്‍ മന്ത്രിസഭാ യോഗം തീരുമാനിച്ചു. കേന്ദ്ര സര്‍ക്കാര്‍ ആവശ്യപ്പെടുന്ന വിശദാംശങ്ങള്‍ വ്യക്തമാക്കി പുതിയ പദ്ധതിരേഖ സമര്‍പ്പിക്കാനും മന്ത്രിസഭ തീരുമാനിച്ചു. പുതിയ പദ്ധതി രേഖ സമര്‍പ്പിക്കാന്‍ മുഖ്യമന്ത്രി ഉമ്മന്‍ ചാണ്ടിയും ഡല്‍ഹി മെട്രോ റെയില്‍ കോര്‍പ്പറേഷന്‍ മുഖ്യ ഉപദേഷ്ടാവ് ഇ. ശ്രീധരനും തമ്മില്‍ നേരത്തെ നടത്തിയ ചര്‍ച്ചയില്‍ ധാരണയായിരുന്നു. നേരത്തെ അയച്ച കത്തിലെ വ്യക്തതക്കുറവ് കാരണമാണ് വീണ്ടും കത്തയയ്ക്കാന്‍ സര്‍ക്കാര്‍ തീരുമാനിച്ചത്.
കൊച്ചി മെട്രോ പദ്ധതി നടപ്പാക്കാന്‍ സ്വീകരിച്ച രീതികളും നടപടികളും ലൈറ്റ് മെട്രോകള്‍ക്കും മാതൃകയായി സ്വീകരിക്കാനും തീരുമാനമായിട്ടുണ്ട്. പദ്ധതിയുടെ എല്ലാ വിശദാംശങ്ങളും ഉള്‍പ്പെട്ട കത്ത് കേന്ദ്രത്തിന് നല്‍കാനാണ് തീരുമാനം. ഇതുപ്രകാരം ആദ്യം നല്‍കിയ കത്തില്‍ ആവശ്യമായ മാറ്റങ്ങള്‍ വരുത്തും. പദ്ധതി സമയബന്ധിതമായി പൂര്‍ത്തിയാക്കണമെന്നും യോഗത്തില്‍ അഭിപ്രായം ഉയര്‍ന്നു.
നേരത്തേ കേന്ദ്രത്തിനുള്ള അപേക്ഷയില്‍ ഡി.എം.ആര്‍.സിയെ ഇടക്കാല കണ്‍സള്‍ട്ടന്റായി കാണിക്കാനാണ് സര്‍ക്കാര്‍ ആലോചിച്ചത്. അത് നിയമപ്രശ്‌നമാകുമെന്നും യഥാര്‍ത്ഥ കണ്‍സള്‍ട്ടന്റ് വരുന്നതുവരെ വലിയ സാമ്പത്തിക ബാദ്ധ്യതയാകുമെന്നുമുള്ള മുട്ടാപ്പോക്കുകളാണ് ഐ.എ.എസുകാര്‍ ഉന്നയിച്ചത്. കേരളാ റാപ്പിഡ് ട്രാന്‍സിറ്റ് കോര്‍പറേഷനാവും പദ്ധതി നടപ്പാക്കുന്നതെന്ന് അറിയിക്കാനാണ് ഐഎഎസ് ലോബിയുട താത്പര്യം.
ജപ്പാന്‍ വായ്പ സ്വീകരിക്കുന്നതിലും ഐ.എ.എസുകാര്‍ ഉടക്കിട്ടിരുന്നു. മൊത്തം പര്‍ച്ചേസില്‍ 40ശതമാനത്തോളം ജപ്പാന്‍ കമ്പനികളില്‍ നിന്നാവണമെന്ന ജിക്കയുടെ വ്യവസ്ഥ ബാദ്ധ്യതയാവുമെന്നാണ് ധനവകുപ്പിന്റെ ഉടക്ക്. എന്നാല്‍ മെട്രോറെയില്‍ മേഖലയിലെ വമ്പന്‍ കമ്പനികളെല്ലാം ജപ്പാനില്‍ നിന്നുള്ളവയാണെന്ന് ഡി.എം.ആര്‍.സിയും സര്‍ക്കാരിനെ അറിയിച്ചിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha