പോലീസിന്റെ പ്രതിച്ഛായയ്ക്ക് കോട്ടം വരുത്തിയെന്നും നിയമം ലംഘിച്ചെന്നും ഒക്കെയുള്ള വകുപ്പുകള്‍ ചുമത്തപ്പെട്ട് സര്‍വീസില്‍ നിന്ന് ഡിസ്മിസ് ചെയ്ത പോലീസുകാരനെ തിരിച്ചെടുത്ത സംഭവത്തില്‍ പ്രതികരണവുമായി ശ്രീജിത്ത് പണിക്കര്‍.

ശ്രീജിത്ത് പണക്കിക്കാരുടെ ഫേസ്ബുക്ക് പോസ്റ്റിന്റെ പൂര്‍ണ്ണരൂപം

കേരളാ പൊലീസിന്റെ നന്മകളും പറയണമല്ലോ.
കണ്ണൂര്‍ തളിപ്പറമ്ബ പൊലീസ് സ്റ്റേഷനിലെ ശ്രീകാന്ത് ഇ എന്‍ എന്ന പൊലീസുകാരന്റെ കദനകഥയാണ്. ഒരു പ്രതിയെ പിടിച്ച്‌ അയാളുടെ ദേഹപരിശോധന നടത്തിയപ്പോള്‍ ഒരു എടിഎം കാര്‍ഡ് പാവപ്പെട്ട ശ്രീകാന്തിന് കിട്ടിയത്രേ. അത് മെമ്മോയില്‍ രേഖപ്പെടുത്താന്‍ ശ്രീകാന്ത് നല്‍കിയില്ലത്രേ. അതുവഴി വിചാരണ സമയത്ത് പ്രതിക്ക് രക്ഷപ്പെടാനുള്ള സാഹചര്യം ശ്രീകാന്ത് ഉണ്ടാക്കിയത്രേ. എടിഎം കാര്‍ഡ് ഉപയോഗിച്ച്‌ അരലക്ഷത്തോളം രൂപ ശ്രീകാന്ത് പിന്‍വലിച്ചതായി ആരോപണം ഉണ്ടായത്രേ. ശ്രീകാന്തിന്റെ വളര്‍ച്ചയില്‍ അസൂയാലുക്കള്‍ ആരോപിക്കുന്നതാവും ഒക്കെയും.

എനിക്ക് ശ്രീകാന്തിനെയാണ് വിശ്വാസം.
കഷ്ടം എന്താച്ചാല്‍ ഇതൊക്കെ ഏതാണ്ട് വലിയ പ്രശ്നം ആണെന്ന മട്ടില്‍ പാവം ശ്രീകാന്തിനെതിരെ കേസായി. പൊലീസിന്റെ പ്രതിച്ഛായയ്ക്ക് കോട്ടം വരുത്തിയെന്നും നിയമം ലംഘിച്ചെന്നും ഒക്കെയുള്ള വകുപ്പുകള്‍ ചുമത്തപ്പെട്ടു. അതിന്റെ പേരില്‍ ശ്രീകാന്തിനെ നിഷ്കരുണം സര്‍വീസില്‍ നിന്ന് ഡിസ്മിസ് ചെയ്തു. കണ്ണൂര്‍ റൂറല്‍ പൊലീസ് മേധാവിയാണ് മുഖം നോക്കാതെ നടപടി സ്വീകരിച്ചത്.
എന്തിന്? ഇത്തിരിപ്പോന്ന ഒരു ചെറിയ എടിഎം കാര്‍ഡ് എടുത്തു മാറ്റി ഒരു പാവം പ്രതിക്ക് രക്ഷപ്പെടാനുള്ള സാഹചര്യം ഉണ്ടാക്കിയെന്ന ആരോപണത്തിലാണ് ഇത്ര ക്രൂരമായ ശിക്ഷ! സസ്‌പെന്‍ഷന്‍ അല്ല, ഡിസ്മിസല്‍ ആണ്. ഇന്നാട്ടില്‍ പാവം ശ്രീകാന്തിനു മാത്രം ചോദിക്കാനും പറയാനും ആരുമില്ലേ?

ശ്രീകാന്ത് കണ്ണൂര്‍ ഡിഐജിക്ക് ഒരു ഹര്‍ജി നല്‍കി. ഡിഐജി ഏമ്മാന്‍ രേഖകള്‍ എല്ലാം വിശദമായി പരിശോധിച്ചു. അതില്‍നിന്നും ശ്രീകാന്തിന്റെ ഭാഗത്തു വീഴ്ച്ച ഉണ്ടായതായി ബോധ്യപ്പെട്ടു എന്ന് ഉത്തരവില്‍ എഴുതി. എന്നിട്ട് തീരുമാനവും എടുത്തു.
എന്താണ് തീരുമാനം എന്നല്ലേ? ഞെട്ടരുത്! ശ്രീകാന്തിനെ സര്‍വീസില്‍ തിരികെ എടുക്കാന്‍ തീരുമാനിച്ചു. ഉത്തരവും ഇറക്കി. ഡിസ്മിസല്‍ കാലയളവ് അവധിയായി പരിഗണിക്കും.

ശ്രീകാന്തിന്റെ ഭാഗത്ത് വീഴ്ച്ച ഉണ്ടായതായി ബോധ്യപ്പെട്ടിട്ടും ശ്രീകാന്ത് തിരികെ സര്‍വീസില്‍. എത്ര നല്ല പൊലീസ്. ശ്രീകാന്ത് കീ ജയ്. ഡിഐജി സെര്‍ കീ ജയ്.
കേരളാ പൊലീസ് കീ ജയ്. പൊലീസ് മന്ത്രീ കീ ജയ്.