ഓഹരി വിപണിയില്‍ കനത്ത ഇടിവ്. എണ്ണവില കുത്തനെ ഉയരുന്നതും വിദേശ നിക്ഷേപത്തിന്റെ പുറത്തേയ്ക്കുള്ള ഒഴുക്കുമാണ് വിപണിയില്‍ പ്രതിഫലിക്കുന്നത്. ഏഷ്യന്‍ വിപണി ദുര്‍ബലമായതും വിപണിയില്‍ പ്രതിഫലിക്കുന്നുണ്ട്.ബിഎസ്ഇ സെന്‍സെക്‌സ് 700ലധികം പോയിന്റ് ആണ് ഇടിഞ്ഞത്. നിലവില്‍ 78,000 എന്ന സൈക്കോളജിക്കല്‍ ലെവലിനും താഴെയാണ് സെന്‍സെക്‌സ്.

നിഫ്റ്റി 24,250ല്‍ താഴെയാണ്. ഓട്ടോ ഓഹരികളാണ് ഏറ്റവും നഷ്ടം നേരിട്ടിരിക്കുന്നത്. 1.3 ശതമാനമാണ് താഴ്ന്നത്. ബാങ്ക് ഓഹരികളും നഷ്ടം നേരിട്ടു. ഐസിഐസിഐ ബാങ്ക് 1.6 ശതമാനവും എച്ച്ഡിഎഫ്‌സി ബാങ്ക് 0.8 ശതമാനവുമാണ് താഴ്ന്നത്.

അതേസമയം ഫാര്‍മ ഓഹരികള്‍ നേട്ടം ഉണ്ടാക്കി. മികച്ച പാദ ഫല കണക്കുകളായിരിക്കും പുറത്തുവരികയെന്ന പ്രതീക്ഷയില്‍ ഫാര്‍മ ഓഹരികള്‍ 2.3 ശതമാനമാണ് മുന്നേറിയത്. ഡോളറിനെതിരെ രൂപയുടെ മൂല്യം ഇടിയുന്നതും വിപണിയില്‍ പ്രതിഫലിക്കുന്നു.

 "