ശബ്ദപരിശോധന ഇന്ന്... ദിലീപിന് മുന്കൂര് ജാമ്യം കിട്ടിയതോടെ നാണക്കേടിലായ ക്രൈംബ്രാഞ്ച് അന്വേഷണം ശക്തമാക്കുന്നു; ദിലീപ് അടക്കമുള്ളവരുടെ ശബ്ദ പരിശോധന ഇന്നു ചിത്രാഞ്ജലി സ്റ്റുഡിയോയില്; ജാമ്യം ലഭിച്ചെങ്കിലും സാക്ഷിമൊഴികളുടെ അടിസ്ഥാനത്തില് അന്വേഷണം ശക്തമാക്കാന് ക്രൈംബ്രാഞ്ചിനു നിയമോപദേശം
നടന് ദിലീപിന് മുന്കൂര് ജാമ്യം ലഭിച്ചത് ക്രൈംബ്രാഞ്ചിന് വലിയ തിരിച്ചടിയാണ്. അതിനാല് തന്നെ അന്വേഷണം ശക്തമായി മുന്നോട്ട് കൊണ്ട് പോകാനാണ് തീരുമാനം. കേസിലെ പ്രതികള്ക്കു മുന്കൂര് ജാമ്യം ലഭിച്ചെങ്കിലും സാക്ഷി മൊഴികളുടെ അടിസ്ഥാനത്തില് അന്വേഷണം ശക്തമാക്കാനാണ് ക്രൈംബ്രാഞ്ചിനു നിയമോപദേശം. പ്രതികളെ കസ്റ്റഡിയില് ചോദ്യം ചെയ്യാന് കഴിയില്ലെങ്കിലും കേസിലെ തെളിവായ മൊബൈല് ഫോണ് കണ്ടെത്താനുള്ള ശ്രമം തുടരാനാണു നീക്കം.
നടിയെ പീഡിപ്പിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസില് നടന് ദിലീപ് അടക്കമുള്ളവരുടെ ശബ്ദ പരിശോധന ഇന്നു ചിത്രാഞ്ജലി സ്റ്റുഡിയോയില് നടത്തും. ദിലീപിന്റെ മുന് സുഹൃത്തും സംവിധായകനുമായ ബാലചന്ദ്രകുമാര് അന്വേഷണ ഉദ്യോഗസ്ഥര്ക്ക് കൈമാറിയ ശബ്ദ സന്ദേശങ്ങള് ഇവരുടെ തന്നെയാണെന്നുറപ്പാക്കാനാണ് പരിശോധന.
ദിലീപ്, സഹോദരന് അനൂപ്, സഹോദരി ഭര്ത്താവ് ടി.എന്. സുരാജ്, ബന്ധുവായ അപ്പു, സുഹൃത്തായ ബൈജു ചെങ്ങമനാട് എന്നിവര്ക്കാണ് ഹൈക്കോടതി ഉപാധികളോടെ മുന്കൂര് ജാമ്യം അനുവദിച്ചത്. പ്രതികള് കുറ്റകരമായ ഗൂഢാലോചന നടത്തിയെന്നു തെളിയിക്കാന് പ്രഥമദൃഷ്ട്യാ വസ്തുതകളില്ലെന്നു വിലയിരുത്തിയാണു ജസ്റ്റിസ് പി.ഗോപിനാഥ് ജാമ്യം നല്കിയത്. ഏഴ് വ്യവസ്ഥകളോടെയാണു ജാമ്യം. വ്യവസ്ഥകള് ലംഘിച്ചാല് ജാമ്യം റദ്ദാക്കാനായി അന്വേഷണ ഉദ്യോഗസ്ഥന് കോടതിയെ സമീപിക്കാം.
ബാലചന്ദ്രകുമാറിന്റെ മൊഴിയെ തുടര്ന്നു ക്രൈംബ്രാഞ്ച് റജിസ്റ്റര് ചെയ്ത കേസില് കഴിഞ്ഞ മാസം പത്തിനാണു ദിലീപ് അടക്കമുള്ളവര് മുന്കൂര് ജാമ്യാപേക്ഷ നല്കിയത്. അന്വേഷണ ഉദ്യോഗസ്ഥനായ ക്രൈംബ്രാഞ്ച് ഡിവൈഎസ്പി ബൈജു പൗലോസ്, കേസില് ദിലീപിനെ അറസ്റ്റ് ചെയ്ത സംഘത്തിലുണ്ടായിരുന്ന ഡിവൈഎസ്പി കെ.എസ്.സുദര്ശന് എന്നിവരടക്കമുള്ളവരെ അപായപ്പെടുത്താന് ദിലീപും കൂട്ടാളികളും ഗൂഢാലോചന നടത്തിയതിനു ദൃക്സാക്ഷിയാണെന്നായിരുന്നു ബാലചന്ദ്രകുമാറിന്റെ മൊഴി.
അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസില് നടന് ദിലീപ് അടക്കമുള്ള 5 പേര്ക്ക് ഹൈക്കോടതി ഉപാധികളോടെ ഇന്നലെയാണ് മുന്കൂര് ജാമ്യം അനുവദിച്ചത്.
ഏഴ് വ്യവസ്ഥകളോടെയാണു ജാമ്യം.
ജാമ്യ വ്യവസ്ഥകള്
പ്രതികള് വെവ്വേറെ ഒരു ലക്ഷം രൂപയുടെ ബോണ്ടും സമാന തുകയ്ക്കുള്ള രണ്ടു പേരുടെ ഉറപ്പും നല്കണം.
അന്വേഷണവുമായി സഹകരിക്കണം. ആവശ്യപ്പെടുമ്പോള് ചോദ്യം ചെയ്യാനായി ഹാജരാകണം.
തെളിവുകള് നശിപ്പിക്കരുത്.
സാക്ഷികളെ ഭീഷണിപ്പെടുത്തുകയോ സ്വാധീനിക്കുകയോ ചെയ്യരുത്.
പ്രതികള്ക്ക് പാസ്പോര്ട്ട് ഉണ്ടെങ്കില് മജിസ്ട്രേട്ട് കോടതിയില് ഹാജരാക്കണം. പാസ്പോര്ട്ട് ഇല്ലെങ്കില് അക്കാര്യം വ്യക്തമാക്കി സത്യവാങ്മൂലം നല്കണം. പാസ്പോര്ട്ട് കോടതിയില് നേരത്തെ സമര്പ്പിച്ചിട്ടുണ്ടെങ്കില് ദിലീപിന് ഈ വ്യവസ്ഥ ബാധകമല്ല.
ജാമ്യത്തിലിരിക്കെ മറ്റു കേസുകളില് ഉള്പ്പെടരുത്.
മുന്കൂര് ജാമ്യ വ്യവസ്ഥകള് ലംഘിച്ചാല് ജാമ്യം റദ്ദാക്കാന് െ്രെകംബ്രാഞ്ചിന് ഹൈക്കോടതിയെ സമീപിക്കാം.
ആലുവ സ്വദേശിയും ഹോട്ടലുടമയും ദിലീപിന്റെ സുഹൃത്തുമായ ശരത്ത് മുന്കൂര് ജാമ്യാപേക്ഷ നല്കിയിരുന്നെങ്കിലും നിലവില് പ്രതിയല്ലെന്ന് പ്രോസിക്യൂഷന് അറിയിച്ചതിനെത്തുടര്ന്ന് തുടര്നടപടിയുണ്ടായാല് പരിഗണിക്കാമെന്നറിയിച്ചു ഹര്ജി മാറ്റി.
"
https://www.facebook.com/Malayalivartha
