തിരുവനന്തപുരം ജില്ലയില് നാളെ പ്രാദേശിക അവധി..... ആറ്റുകാല് പൊങ്കാലയോടനുബന്ധിച്ചാണ് അവധി പ്രഖ്യാപിച്ചിട്ടുള്ളത്
തിരുവനന്തപുരം ജില്ലയില് നാളെ പ്രാദേശിക അവധി. ആറ്റുകാല് പൊങ്കാലയോടനുബന്ധിച്ചാണ് അവധി പ്രഖ്യാപിച്ചിട്ടുള്ളത്.
ഈ മാസം 17 നാണ് ആറ്റുകാല് പൊങ്കാല. രാവിലെ 10.50 ന് പണ്ടാര അടുപ്പില് തീ പകരും. പൊങ്കാല പണ്ടാര അടുപ്പില് മാത്രമായി പരിമിതപ്പെടുത്തിയിട്ടുണ്ട്. ക്ഷേത്ര പരിസരത്ത് പൊങ്കാല അനുവദിക്കില്ല. ഉച്ചക്ക് 1.20 ന് പൊങ്കാല നിവേദിക്കും.
കുംഭത്തിലെ പൂരവും പൗര്ണമിയും ഒത്തുവരുന്ന നാളെ രാവിലെ 10.50നാണ് പണ്ടാര അടുപ്പില് അഗ്നി പകരുന്നത്. അടുത്ത നിമിഷം വീടുകളില് ഒരുക്കിയിരിക്കുന്ന അടുപ്പുകളില് അഗ്നികൊളുത്താം. ഉച്ചയ്ക്ക് 1.20ന് പണ്ടാര അടുപ്പില് പൊങ്കാല നിവേദിക്കുന്നതിന്റെ അടുത്ത നിമിഷം വീടുകളില് തയ്യാറാക്കിയ നിവേദ്യങ്ങളും സമര്പ്പിക്കാം.
വീടിനകവും പുറവും വൃത്തിയാക്കി വ്രതശുദ്ധിയോടെ ലോകത്തെവിടെയും പൊങ്കാല അര്പ്പിക്കാം. വീട്ടില് പൊങ്കാല ഇടുമ്പോള് ശ്രദ്ധിക്കേണ്ട കാര്യങ്ങളിങ്ങനെ....
രാവിലെ കുളിച്ച് ശുദ്ധിയായി ദേവിയെ ധ്യാനിച്ചുവേണം ചടങ്ങുകള് തുടങ്ങേണ്ടത്. പൊങ്കാല അര്പ്പിക്കുന്ന സ്ഥലം ചാണകം മെഴുകി വൃത്തിയാക്കുന്നത് ഉത്തമം. അല്ലെങ്കില് വെള്ളം തളിച്ച് വൃത്തിയാക്കണം.കിഴക്ക് അല്ലെങ്കില് വടക്ക് ദിക്കിലേക്കു നിന്നു വേണം പൊങ്കാല തയ്യാറാക്കേണ്ടത്. അടുപ്പിനടുത്ത് ഗണപതിക്ക് പടുക്ക ഒരുക്കാം. ഇലയില് പഴം അവല്, മലര്, ശര്ക്കര എന്നിവ വയ്ക്കണം. കരിക്ക്, വെറ്റില, പാക്ക്, മറ്റ് പഴവര്ഗങ്ങള് എന്നിവയും ഉള്പ്പെടുത്താം.
നിലവിളക്കില് തിരി കിഴക്കോട്ടും പടിഞ്ഞാറോട്ടുമിട്ടാണ് കത്തിക്കേണ്ടത്. സമീപത്ത് ചന്ദനത്തിരിയും കത്തിക്കാം. വിളക്ക് കത്തിക്കുമ്പോഴും അടുപ്പില് അഗ്നിപകരുമ്പോഴും നിവേദിക്കുമ്പോഴുമെല്ലാം മനസില് ദേവിയെ ധ്യാനിക്കണം. ശര്ക്കര പായസം, വെള്ളപായസം, തെരളി, മണ്ടപ്പുറ്റ് എന്നിങ്ങനെ ഏത് നിവേദ്യവും തയ്യാറാക്കാം. നിവേദ്യം തയ്യാറാക്കിയ ശേഷം വീടിനുള്ളില് കയറുന്നതുകൊണ്ട് ദോഷമില്ല. കിണ്ടിയില് ജലമെടുത്ത് പൂവുമായി അര്പ്പിച്ച് നിവേദ്യം ദേവിക്ക് സമര്പ്പിക്കാം
https://www.facebook.com/Malayalivartha
