മുഖ്യമന്ത്രി സഭാ സമ്മേളനത്തിന് മുന്പ് ഗവര്ണറെ കാണുന്നതില് തെറ്റില്ല; സര്ക്കാര് ഒന്നിനും വഴങ്ങിയിട്ടില്ലെന്ന് സി പി ഐ എം സംസ്ഥാന സെക്രട്ടറി കോടിയേരി ബാലകൃഷ്ണന്
ഗവര്ണര് വിവാദത്തില് സര്ക്കാര് ഒന്നിനും വഴങ്ങിയിട്ടില്ലെന്ന് സി പി ഐ എം സംസ്ഥാന സെക്രട്ടറി കോടിയേരി ബാലകൃഷ്ണന്. ഗവര്ണര് സ്വീകരിച്ച നടപടി അദ്ദേഹം തിരുത്തി. മുഖ്യമന്ത്രി സഭാ സമ്മേളനത്തിന് മുന്പ് ഗവര്ണറെ കാണുന്നതില് തെറ്റില്ലെന്നും കോടിയേരി ബാലകൃഷ്ണന് പറഞ്ഞു.
സര്ക്കാരും ഗവര്ണറും തമ്മില് സംഘര്ഷം ഉണ്ടാകണം എന്ന് പാര്ട്ടി ആഗ്രഹിക്കുന്നില്ല. പ്രശ്നം പരിഹരിക്കാന് സര്ക്കാര് ശ്രമിക്കും. ഒരു ഘട്ടം കഴിഞ്ഞാല് എന്ത് ചെയ്യണമെന്ന് പാര്ട്ടിയും സര്ക്കാരും തീരുമാനിക്കും.പ്രശ്നം തീര്ന്നാല് പിന്നെ പിന്നാലെ പോകണ്ട കാര്യം ഇല്ലെന്നും കോടിയേരി ബാലകൃഷ്ണന് വ്യക്തമാക്കി.
മന്ത്രിമാരുടെ പേഴ്സണല് സ്റ്റാഫിന്റെ പെന്ഷന് തുടരും.1984-ല് യു ഡി എഫ് സര്ക്കാര് ആണ് ഇത് കൊണ്ടു വന്നത്. ഗവണ്മെന്റിന് ഏത് ഉദ്യോഗസ്ഥനേയും സ്ഥലം മാറ്റാം . ഗവര്ണര് സ്ഥാനമേ വേണ്ട എന്നതാണ് സിപിഐഎമ്മിന്്റെ നിലപാടെന്നും കോടിയേരി ബാലകൃഷ്ണന് പറഞ്ഞു.
ഗവര്ണറും സര്ക്കാരും പരസ്പരം സംഘര്ഷത്തില് പോകേണ്ടതല്ല. ഗവര്ണറുടെ സ്റ്റാഫില് ആര് വേണമെന്ന് ഗവര്ണറാണ് തീരുമാനിക്കേണ്ടത്. ഗവര്ണര് മുന്പ് പറഞ്ഞ പല കാര്യങ്ങളും മാറ്റി പറഞ്ഞിട്ടുണ്ടെന്നും കോടിയേരി ബാലകൃഷ്ണന് പറഞ്ഞു.
സി പി ഐ എം സംസ്ഥാന സമ്മേളനത്തില് അവതരിപ്പിക്കേണ്ട രേഖക്ക് അന്തിമ രൂപം നല്കിയതായി കോടിയേരി ബാലകൃഷ്ണന് അറിയിച്ചു. സമ്മേളനം സീതാറാം യെച്ചൂരി ഉദ്ഘാടനം ചെയ്യും . പ്രകാശ് കാരാട്ട് ,എസ് രാമചന്ദ്രന് പിള്ള, ബൃന്ദാ കാരാട്ട് , പിണറായി വിജയന് ,എം എ ബേബി തുടങ്ങിയ പി ബി അംഗങ്ങള് പങ്കെടുക്കും. മാര്ച്ച് 1 മുതല് 4 വരെയാണ് സമ്മേളനം. അതേസമയം എകെജി സെന്ററില് സജ്ജമാക്കിയ സൗരോര്ജ പ്ലാന്റിന്റെ ഉദ്ഘാടനം കോടിയേരി ബാലകൃഷ്ണന് നിര്വഹിച്ചു.
https://www.facebook.com/Malayalivartha
