ഇടുക്കിയിൽ പ്രഷര്‍ കുക്കര്‍ പൊട്ടിത്തെറിച്ച്‌ ഉണ്ടായ അപകടത്തിൽ യുവാവിന് ഗുരുതര പരിക്ക്. കട്ടപ്പനക്ക് സമീപം കൊച്ചു തോവാളയിലാണ് സംഭവം ഷിബു ദാനിയേല്‍ (39) ആണ് അപകടത്തിൽ ​ഗുരുതരമായി പരിക്കേറ്റത്. ഭക്ഷണം പാചകം ചെയ്യുന്നതിനിടെയാണ് അപകടം. ഗുരുതരമായി പരിക്കേറ്റ ഷിബുവിനെ കട്ടപ്പനയില്‍ സ്വകാര്യ ആശുപത്രിയില്‍ പ്രവേശിപ്പിച്ചു.

അതേസമയം,ഇടുക്കിയിൽ പൊരിച്ച മീൻ കഴിച്ച വീട്ടമ്മ ചികിത്സയിൽ തുടരുകയാണ്. ഇടുക്കി തോവാളപ്പടി വല്യാറച്ചിറ പുഷ്പവല്ലി(60)യെ ആണ് മീൻ കഴിച്ചതിന് പിന്നാലെ ശാരീരിക ബുദ്ധിമുട്ടുണ്ടായി ആശുപത്രിയിൽ പ്രവേശിപ്പിച്ചത്. മീൻ കഴിച്ചതിന് പിന്നാലെ പുഷ്പവല്ലിയ്‌ക്ക് പരവേശവും തലയിൽ പെരുപ്പും ഉണ്ടായി. നടക്കാൻ കഴിയാതെ വന്നപ്പോൾ വീടിന്റെ ഭിത്തിയിൽ പിടിച്ച് നിരങ്ങി സമീപത്തെ വീട്ടിലെത്തി വിവരം പറയുകയായിരുന്നു.

തുടർന്ന് അയൽക്കാർ ചേർന്ന് പുഷ്പവല്ലിയെ ആശുപത്രിയിൽ എത്തിച്ചു. ആശുപത്രിയിലെത്താൻ വൈകിയതോടെ പുഷ്പവല്ലിയുടെ നഖങ്ങളിലടക്കം നീലനിറം വ്യാപിച്ചു.സംഭവദിവസം വാഹനത്തിൽ കൊണ്ടുവന്ന കേര മീൻ പുഷ്പവല്ലി വാങ്ങിയിരുന്നുവെന്നാണ് വിവരം. അയൽവാസികളും മീൻ വാങ്ങിയെങ്കിലും വീട്ടമ്മയ്‌ക്ക് ബുദ്ധിമുട്ട് അനുഭവപ്പെട്ടതിനാൽ കളയുകയായിരുന്നു.സംഭവത്തിന് പിന്നാലെ ഭക്ഷ്യസുരക്ഷാ വകുപ്പ് സ്ഥലത്തെത്തി പുഷ്പവല്ലിയിൽ നിന്നും വിവരങ്ങൾ തേടി.