മുതിര്‍ന്ന കോണ്‍ഗ്രസ് നേതാവും മുന്‍മന്ത്രിയുമായ കെ. ശങ്കരനാരായണന്‍ (89) അന്തരിച്ചു. വാര്‍ധക്യസഹജമായ അസുഖങ്ങളെ തുടര്‍ന്ന് പാലക്കാട് ശേഖരീപുരത്തെ വസതിയില്‍ രാത്രി 8.50 ഓടെ ആയിരുന്നു അന്ത്യം. വിവിധ സംസ്ഥാനങ്ങളുടെ ഗവര്‍ണര്‍, യു.ഡി.എഫ്. കണ്‍വീനര്‍, നിയമസഭാംഗം എന്നീ നിലകളിലും പ്രവര്‍ത്തിച്ചിട്ടുണ്ട്.

ശങ്കരന്‍ നായരുടേയും ലക്ഷ്മിയമ്മയുടേയും മകനായി 1932 ഒക്ടോബര്‍ 15ന് പാലക്കാട് ജില്ലയിലെ ഷൊര്‍ണൂരിലായിരുന്നു ശങ്കരനാരായണന്റെ ജനനം. പ്രാഥമിക വിദ്യാഭ്യാസത്തിനു ശേഷം വിദ്യാര്‍ഥി രാഷ്ട്രീയത്തിലൂടെയാണ് ശങ്കരനാരായണന്‍ സജീവരാഷ്ട്രീയത്തിലെത്തുന്നത്. പിന്നീട് പാലക്കാട് ഡി.സി.സി. സെക്രട്ടറിയായും പ്രസിഡന്റായും കെ.പി.സി.സി. ജനറല്‍ സെക്രട്ടറിയായും പ്രവര്‍ത്തിച്ചിട്ടുണ്ട്.

മരണസമയത്ത് മകളും മരുമകനും പേരക്കുട്ടികളും വി.കെ.ശ്രീകണ്ഠന്‍ എംപിയും ഒപ്പമുണ്ടായിരുന്നു. ഉച്ചവരെ ആരോഗ്യസ്ഥിതിയില്‍ കാര്യമായ പ്രശ്‌നങ്ങള്‍ ഉണ്ടായിരുന്നില്ല. ഉച്ചയ്ക്കുശേഷം ഛര്‍ദിച്ചതോടെ സ്ഥിതി വഷളായി. തുടര്‍ന്ന് ഡോക്ടര്‍ എത്തി ചികിത്സ നല്‍കി. വൈകിട്ടോടെ സ്ഥിതി കൂടുതല്‍ വഷളാവുകയായിരുന്നു. രാത്രിയോടെ മരണം സ്ഥിരീകരിച്ചു.

കോണ്‍ഗ്രസ് രാഷ്ട്രീയത്തിലെ വിവിധ തലമുറകളിലുള്ളവരുടെ ഗുരുനാഥനായ ഇദ്ദേഹം കോണ്‍ഗ്രസിലെ മികച്ച പ്രാസംഗികരിലൊരാളായിരുന്നു. നാഗാലന്‍ഡ്, ജാര്‍ഖണ്ഡ്, മഹാരാഷ്ട്ര, അസം, അരുണാചല്‍പ്രദേശ്, ഗോവ സംസ്ഥാനങ്ങളില്‍ ഗവര്‍ണറായി സേവനമനുഷ്ഠിച്ചു. കേരളത്തില്‍ വിവിധ മന്ത്രിസഭകളിലായി കൃഷി, ധനം, എക്‌സൈസ് തുടങ്ങിയ വകുപ്പുകളില്‍ മന്ത്രിയായി. തൃത്താല, ശ്രീകൃഷ്ണപുരം, ഒറ്റപ്പാലം, പാലക്കാട് മണ്ഡലങ്ങളില്‍ നിന്ന് നിയമസഭയിലെത്തി. 1986 മുതല്‍ 2001 വരെയുള്ള ദീര്‍ഘകാലയളവില്‍ യുഡിഎഫ് കണ്‍വീനറായിരുന്നു. സംഘടനാ കോണ്‍ഗ്രസ് സംസ്ഥാന പ്രസിഡന്റായും പ്രവര്‍ത്തിച്ചു.

ഷൊര്‍ണൂര്‍ അണിയത്ത് ശങ്കരന്‍ നായരുടേയും ലക്ഷമിയമ്മയുടേയും മകനായി 1932 ഒക്ടോബര്‍ 15–നാണ് ജനനം. വിദ്യാഭ്യാസ കാലത്ത് തന്നെ രാഷ്ട്രീയത്തിലെത്തി. കോണ്‍ഗ്രസില്‍ പടിപടിയായി ഉയര്‍ന്നു. ഷൊര്‍ണൂരില്‍ കോണ്‍ഗ്രസ് കമ്മിറ്റി സെക്രട്ടറിയായി തുടക്കം. പട്ടാമ്പി നിയോജകമണ്ഡലം സെക്രട്ടറിയും തുടര്‍ന്ന് പാലക്കാട് ജില്ലാ കോണ്‍ഗ്രസ് ജനറല്‍ സെക്രട്ടറിയുമായ അദ്ദേഹം 1964–ല്‍ പാലക്കാട് ഡിസിസി പ്രസിഡന്റായി. കമ്യൂണിസ്റ്റ് പാര്‍ട്ടിക്ക് ശക്തമായ അടിത്തറയുള്ള ജില്ലയില്‍ കോണ്‍ഗ്രസ് വേരോട്ടത്തിനായി ശങ്കരനാരായണന്‍ അക്ഷീണം യത്‌നിച്ചു.

1977ല്‍ തൃത്താലയില്‍നിന്നാണ് ആദ്യമായി നിയമസഭയിലെത്തുന്നത്. പിന്നീട് ശ്രീകൃഷ്ണപുരം(1980), ഒറ്റപ്പാലം(1987), പാലക്കാട്(2001) എന്നിവിടങ്ങളില്‍നിന്നും നിയമസഭയിലെത്തി. 197778ലെ കെ. കരുണാകരന്‍, എ.കെ. ആന്റണി സര്‍ക്കാരുകളിലും 200104ലെ എ.കെ. ആന്റണി സര്‍ക്കാരിലും മന്ത്രിയായിരുന്നു. 7778ല്‍ കൃഷി, സാമൂഹിക ക്ഷേമ വകുപ്പു മന്ത്രിയായിരുന്നു. ആന്റണി മന്ത്രിസഭയില്‍ ധനകാര്യഎക്‌സൈസ് വകുപ്പുകളും കൈകാര്യം ചെയ്തിട്ടുണ്ട്.

1982ല്‍ ശ്രീകൃഷ്ണപുരത്തുനിന്നും 1991ല്‍ ഒറ്റപ്പാലത്തുനിന്നും ജനവിധി തേടിയെങ്കിലും പരാജയപ്പെട്ടു. 1985 മുതല്‍ 2001 വരെ യു.ഡി.എഫ്. കണ്‍വീനര്‍ ആയിരുന്നു. കെ കാമരാജിന്റെ അടുത്ത അനുയായി ആയിരുന്നു ശങ്കരനാരായണന്‍. കോണ്‍ഗ്രസ് പിളര്‍ന്നപ്പോഴും സംഘടന കോണ്‍ഗ്രസില്‍ ഉറച്ചു നിന്നു.

2006ലെ നിയമസഭാ തിരഞ്ഞെടുപ്പോടെ സജീവരാഷ്ട്രീയത്തില്‍നിന്ന് മാറിനില്‍ക്കാന്‍ ശങ്കരനാരായണന്‍ തീരുമാനിച്ചു. തുടര്‍ന്ന് 2007ല്‍ അരുണാചല്‍ പ്രദേശ് ഗവര്‍ണറായി നിയമിതനായി. പിന്നീട് അസം, നാഗാലാന്‍ഡ്, ജാര്‍ഖണ്ഡ്, ഗോവ (അധികചുമതല) , മഹാരാഷ്ട്ര ഗവര്‍ണര്‍സ്ഥാനങ്ങളും വഹിച്ചു. ആറ് സംസ്ഥാനങ്ങളുടെ ഗവര്‍ണര്‍സ്ഥാനം വഹിച്ച ഏക മലയാളിയാണ് ഇദ്ദേഹം. രാധയാണ് ഭാര്യ. മകള്‍: അനുപമ. 'അനുപമം ജീവിതം' അദ്ദേഹത്തിന്റെ ആത്മകഥയാണ്.