ഇടുക്കിയില്‍ വീടിന് തീപിടിച്ച് ഒരു കുടുംബത്തിലെ രണ്ട് പേര്‍ക്ക് ദാരുണാന്ത്യം, ഗുരുതരമായി പരിക്കേറ്റ മകള്‍ ആശുപത്രിയില്‍ ചികിത്സയില്‍, ഇന്നു പുലര്‍ച്ചെയാണ് സംഭവം നടന്നത്.

രവീന്ദ്രന്‍(50), ഭാര്യ ഉഷ (45) എന്നിവരാണ് മരിച്ചത്. ഗുരുതരമായി പരിക്കേറ്റ മകള്‍ തീവ്രപരിചരണ വിഭാഗത്തില്‍ ചികിത്സയിലാണ്. ഇടുക്കി പുറ്റടിയില്‍ ഇന്ന് പുലര്‍ച്ചെയാണ് സംഭവമുണ്ടായത്. തീപിടുത്തത്തിന് കാരണം വ്യക്തമല്ല. സംഭവത്തില്‍ പോലീസ് അന്വേഷണം ഊര്‍ജ്ജിതമാക്കി,

അതേസമയം കൊല്ലങ്കോട് ഇന്നലെ യുവാവും പെണ്‍കുട്ടിയും വീട്ടിനകത്തെ മുറിയില്‍ തീകൊളുത്തി മരിച്ചതിന്റെ നടുക്കത്തിലാണ് പൊള്ളാച്ചി റോഡിലെ കിഴക്കേഗ്രാമം. 23കാരനായ ബാലസുബ്രഹ്മണ്യവും പാവടി സ്വദേശിനിയായ പതിനാറുകാരിയുമാണ് തീപ്പൊള്ളലേറ്റ് മരിച്ചത്.

ഗുരുതരമായി പൊള്ളലേറ്റ് ചികിത്സയിലായിരുന്ന ഇരുവരും ഇന്നലെ ഉച്ചയോടെ എറണാകുളത്തെ സ്വകാര്യ ആശുപത്രിയില്‍വച്ചാണ് മരിച്ചത്.

ബാലസുബ്രഹ്മണ്യന്റെ പിറന്നാളായിരുന്നു ഞായറാഴ്ച. രാവിലെ ഏഴരയോടെയാണ് നാടിനെ നടുക്കിയ സംഭവമുണ്ടായത്. യുവാവിന്റെ അമ്മയും ഇളയസഹോദരനും മാത്രമാണ് സംഭവസമയം വീട്ടിലുണ്ടായിരുന്നത്.

മുറിക്കുള്ളില്‍നിന്ന് ശബ്ദം കേട്ടെത്തിയ ബാലസുബ്രഹ്മണ്യന്റെ അമ്മ, മകനും പെണ്‍കുട്ടിയും കത്തിക്കൊണ്ടിരിക്കുന്ന കാഴ്ചയാണ് കണ്ടത്. വീട്ടില്‍നിന്ന് തീയും പുകയും ഉയര്‍ന്നതോടെയാണ് സമീപവാസികളും സംഭവമറിഞ്ഞത്. വിവരമറിയിച്ചതിന്റെ അടിസ്ഥാനത്തില്‍ സ്ഥലത്തെത്തിയ അഗ്‌നിരക്ഷാ സേനാ ഉദ്യോഗസ്ഥരാണ് തീയണച്ച് ഇരുവരേയും ആശുപത്രിയിലേക്ക് മാറ്റിയത്. ബാലസുബ്രഹ്മണ്യത്തിന് 95 ശതമാനത്തോളവും പെണ്‍കുട്ടിക്ക് 90 ശതമാനത്തോളവും പൊള്ളലേറ്റിരുന്നു. തീപ്പൊള്ളലേറ്റ് ആന്തരിക അവയവങ്ങള്‍ക്കടക്കം സാരമായി പരിക്കേറ്റിരുന്നു. പാലക്കാട്ടെ രണ്ട് ആശുപത്രികളില്‍ ചികിത്സ നല്‍കിയ ശേഷമാണ് ഇരുവരേയും എറണാകുളത്തെ സ്വകാര്യ ആശുപത്രിയിലേക്ക് മാറ്റിയത്. എന്നിട്ടും രണ്ടു പേരുടെയും ജീവന്‍ രക്ഷിക്കാനായില്ല.


ഇന്‍ക്വസ്റ്റ് നടപടികള്‍ പൂര്‍ത്തിയാക്കാനായി കൊല്ലങ്കോട് പോലീസ് എറണാകുളത്തെത്തിയിട്ടുണ്ട്. തിങ്കളാഴ്ച പോസ്റ്റ്മോര്‍ട്ടത്തിന് ശേഷം ഇരുവരുടെയും മൃതദേഹങ്ങള്‍ കൊല്ലങ്കോട്ടേക്ക് കൊണ്ടു വരും.