ഹൂതി വിമതര്‍ ബന്ദികളാക്കിയ മൂന്ന് മലയാളികളെ മോചിപ്പിച്ചു... സൗദി-ഹൂതി തര്‍ക്കത്തിനിടയിലാണ് മൂന്ന് മലയാളികള്‍ അടക്കമുള്ള കപ്പല്‍ ജീവനക്കാര്‍ ബന്ദികളുടെ പിടിയിലായത്, കേരളത്തിലേക്ക് ഉടന്‍ എത്തുമെന്ന് സൂചന.

കോട്ടയം സ്വദേശി ശ്രീജിത്ത്, ആലപ്പുഴ സ്വദേശി അഖില്‍, കോഴിക്കോട് സ്വദേശി ദിപാഷ് എന്നിവരെയാണ് മോചിപ്പിച്ചത്. ജനുവരി രണ്ടിനായിരുന്നു ഇവര്‍ സഞ്ചരിച്ച യുഎഇ ചരക്കു കപ്പല്‍ അല്‍ഹുദയില്‍ നിന്ന് ഭീകരര്‍ പിടിച്ചെടുത്തത്.

നയതന്ത്ര തലത്തില്‍ ഇവരുടെ മോചനത്തിനായുള്ള ശ്രമങ്ങള്‍ തുടരുന്നതിനിടെയാണ് മൂന്നുപേരേയും വിട്ടയച്ചത്. കേരളത്തിലുള്ള ബന്ധുക്കളുമായി വിട്ടയക്കപ്പെട്ടവര്‍ സംസാരിച്ചിരുന്നു. ഇവര്‍ ഉടന്‍ നാട്ടിലെത്തുമെന്നാണ് വിവരം.


കഴിഞ്ഞ നാല് മാസത്തോളമായി മൂന്ന് പേരും യെമനിലെ ഹൂതി വിമതരുടെ കസ്റ്റഡിയിലായിരുന്നു. ഇവര്‍ ജോലി ചെയ്തിരുന്ന യുഎഇ കമ്പനിയുടെ ചരക്കു കപ്പല്‍ കഴിഞ്ഞ ജനുവരിയില്‍ ഹൂതി വിമതര്‍ തട്ടിയെടുക്കുകയായിരുന്നു. ഇവരടക്കം മൊത്തം 11 ഇന്ത്യക്കാരാണ് കപ്പലില്‍ ജോലിക്കാരായിയുണ്ടായിരുന്നത്.



ചരക്ക് കപ്പല്‍ അല്‍ഹുദയില്‍ നിന്നാണ് ഹൂതി വിമതര്‍ തട്ടിയെടുത്തത്. . കപ്പലില്‍ ഉള്ള മറ്റുള്ളവരുടെ വിവരങ്ങള്‍ അറിവായിട്ടില്ല.