ഗുരൂവായൂരപ്പന്റെ കൃപകടാക്ഷം.... ഗുരുവായൂര്‍ ദേവസ്വം ഏര്‍പ്പെടുത്തിയ പ്രഥമ ജനാര്‍ദ്ദനന്‍ നെടുങ്ങാടി സ്മാരക ശ്രീഗുരുവായൂരപ്പന്‍ അഷ്ടപദി പുരസ്‌കാരം മുതിര്‍ന്ന അഷ്ടപദി കലാകാരന്‍ പയ്യന്നൂര്‍ കൃഷ്ണമണി മാരാര്‍ക്ക് ലഭ്യമായി. 25001 രൂപയും ശില്‍പവും പ്രശസ്തിപത്രവും അടങ്ങുന്നതാണ് പുരസ്‌കാരം .

ഏപ്രില്‍ 30 ശനിയാഴ്ച വൈകിട്ട് 7 ന് അഷ്ടപദി സംഗീതോല്‍സവത്തിന്റെ ഉദ്ഘാടന ചടങ്ങില്‍ ദേവസ്വം മന്തി കെ രാധാകൃഷ്ണന്‍ പയ്യന്നൂര്‍ കൃഷ്ണമണി മാരാര്‍ക്ക് പുരസ്‌കാരം നല്‍കും. തുടര്‍ന്ന് പുരസ്‌കാര ജേതാവിന്റെ അഷ്ടപദി കച്ചേരിയും അരങ്ങേറുകയും ചെയ്യും.

കഥകളി ആചാര്യന്‍ കലാമണ്ഡലം ബാലസുബ്രഹ്മണ്യന്‍, പ്രശസ്ത സംഗീതജ്ഞന്‍ മണ്ണൂര്‍ രാജകുമാരനുണ്ണി, ദേവസ്വം ഭരണസമിതി അംഗം ചെങ്ങറ സുരേന്ദ്രന്‍ എക്‌സ് എം പി എന്നിവരടങ്ങുന്ന പുരസ്‌കാര നിര്‍ണയ സമിതിയാണ് പയ്യന്നൂര്‍ കൃഷ്ണമണിമാരാരെ പുരസ്‌കാരത്തിനായി തെരഞ്ഞെടുത്തത്.


നീണ്ട ആറു പതിറ്റാണ്ടിലേറെയായി അഷ്ടപദി ആലാപന ശാഖയ്ക്ക് നല്‍കിയ സമഗ്ര സംഭാവനയ്ക്കാണ് അദ്ദേഹത്തെ പുരസ്‌കാരത്തിന് തെരഞ്ഞെടുത്തതെന്ന് പുരസ്‌കാര നിര്‍ണയ സമിതി കണ്‍വീനര്‍ ചെങ്ങറ സുരേന്ദ്രന്‍. നീണ്ട ആറു പതിറ്റാണ്ടായി അഷ്ടപദി രംഗത്തെ ശ്രദ്ധേയ സാന്നിധ്യമായ പയ്യന്നൂര്‍ കൃഷ്ണമണി മാരാര്‍ കണ്ണൂര്‍ സ്വദേശിയാണ്. 76കാരനായ അദ്ദേഹത്തെ തേടിയെത്തുന്ന വലിയ പുരസ്‌കാരമാണിത്.

'എനിക്ക് വലിയ സന്തോഷമായി, ശ്രീ ഗുരുവായൂരപ്പന്റെ ഏറ്റവും വലിയ കടാക്ഷമായി കാണുന്നു. ഗുരുവായൂര്‍ ദേവസ്വത്തിന് നന്ദി'- പുരസ്‌കാര വിവരം അറിഞ്ഞപ്പോള്‍ പയ്യന്നൂര്‍ കൃഷ്ണമണി മാരാരുടെ വാക്കുകള്‍ ഇങ്ങനെയായിരുന്നു. കണ്ണൂര്‍ നാറാത്തെ വീട്ടിലിരിക്കുമ്പോഴാണ് പുരസ്‌കാരം ലഭിച്ച വിവരം പയ്യന്നൂര്‍ കൃഷ്ണമണി മാരാര്‍ അറിയുന്നത്. ദേവസ്വം ചെയര്‍മാന്‍ ഡോ. വി കെ വിജയന്‍ ടെലിഫോണില്‍ വിളിച്ച് അദ്ദേഹത്തെ അഭിനന്ദിച്ചു.

അതേസമയം ക്ഷേത്ര കലകളില്‍ അഗ്രഗണ്യനായിരുന്ന പൊങ്ങിലാട്ട് ശങ്കുണ്ണി മാരാര്‍ നാരായണി മാരസ്യാര്‍ ദമ്പതിമാരുടെ മകനായി കണ്ണൂര്‍ പയ്യന്നൂരില്‍ 1947 ജൂലൈ 12നാണ് ജനിച്ചത്. പന്ത്രണ്ടാമത്തെ വയസ്സില്‍ അഷ്ടപദി ഗായകനാവുകയും ഓട്ടന്‍തുള്ളലും സോപാന സംഗീതവും ഇടയ്ക്ക വാദനവും പഠിക്കുകയും ചെയ്തു.ആദ്യ ഗുരുവും വഴികാട്ടിയും എല്ലാത്തിലും അച്ഛന്‍ തന്നെയായിരുന്നു .