സാധാരണക്കാര്‍ നെട്ടോട്ടത്തില്‍.... നിത്യോപയോഗ സാധനങ്ങളടക്കം 143 ഇനങ്ങളുടെ ജിഎസ്ടി വര്‍ദ്ധിക്കുന്നു. കഴിഞ്ഞ ലോക്സഭാ തിരഞ്ഞെടുപ്പിനു മുന്‍പുള്ള മാസങ്ങളില്‍ നിരക്കു കുറച്ച ഇനങ്ങള്‍ക്കാണ് ഇപ്പോള്‍ കൂട്ടുന്നത്.

ഇതില്‍ 92% ഇനങ്ങളുടെയും ജിഎസ്ടി നിരക്ക് 18 ല്‍ നിന്ന് 28% ആകും. പട്ടം, പവര്‍ബാങ്ക്, ച്യൂയിങ് ഗം, ഹാന്‍ഡ്ബാഗ്, വാച്ച്, സ്യൂട്ട്കേസ് , 32 ഇഞ്ചില്‍ താഴെയുള്ള ടിവി, ചോക്കലേറ്റ്, വാല്‍നട്ട്, സെറാമിക് സിങ്ക്, വാഷ് ബേസിന്‍, കൂളിങ് ഗ്ലാസ്, കണ്ണട ഫ്രെയിം, വസ്ത്രം, ലെതര്‍ കൊണ്ടുള്ള ആക്സസറീസ്, നോണ്‍ ആല്‍ക്കഹോളിക് പാനീയങ്ങള്‍ എന്നിവയെല്ലാം 28 % ജിഎസ്ടി നിരക്കിലേക്ക് ഉയരുന്നവയില്‍ ഉള്‍പ്പെടുന്നവയാണ്. ഇവയില്‍ പലതിനും 2017ലും 2018ലുമാണു ജിഎസ്ടി നിരക്ക് കുറച്ചത്.

പപ്പടത്തിനും ശര്‍ക്കരയ്ക്കും 5% ജിഎസ്ടി നിരക്ക് ഏര്‍പ്പെടുത്തിയേക്കും. നിലവില്‍ 18% നിരക്കുള്ള വാച്ച്, ലെതര്‍ ഉല്‍പന്നങ്ങള്‍, റേസര്‍, പെര്‍ഫ്യൂം, ലോഷന്‍, കൊക്കോപൗഡര്‍, ചോക്കലേറ്റ്, കോഫി എക്സ്ട്രാക്റ്റ് , പ്ലൈവുഡ്, വാഷ്ബേസിന്‍, ജനലുകള്‍, ഇലക്ട്രിക് സ്വിച്ച്, സോക്കറ്റ്, ബാഗുകള്‍ തുടങ്ങിയവയ്ക്ക് 28 ശതമാനമായേക്കും.

കസ്റ്റഡ് പൗഡറിന് 5ല്‍ നിന്ന് 18 ശതമാനവും മരത്തിന്റെ മേശകള്‍, അടുക്കള ഉപകരണങ്ങള്‍ എന്നിവയ്ക്ക് 12ല്‍ നിന്ന് 18 ശതമാനവുമാക്കാനാണു നിര്‍ദ്ദേശം. റസ്റ്ററന്റുകളുടെ ജിഎസ്ടി അടക്കം 178 ഇനങ്ങളെ 28 % ജിഎസ്ടിയില്‍ നിന്ന് ഒഴിവാക്കി 2017ലാണു ജിഎസ്ടി കൗണ്‍സില്‍ തീരുമാനമെടുത്തത്.