മൂവരുടെയും വേര്‍പാട് നാടിനെ കണ്ണീരിലാഴ്ത്തി.... പാസ്റ്ററുടെയും മക്കളുടെയും മരണത്തില്‍ നടുങ്ങി പൂവന്മല ഗ്രാമം. പൂവന്മല ചര്‍ച്ച് ഓഫ് ഗോഡിലെ പാസ്റ്ററായ വി.എം.ചാണ്ടിയുടെയും മക്കളായ ബ്ലെസി, ഫേബ എന്നിവരുടെയും മരണമാണ് നാടിനെ സങ്കടക്കടലിലാക്കിയത്. കുറച്ചു നേരം മുമ്പ് മുന്നിലൂടെ കടന്നുപോയവര്‍ മരിച്ചുവെന്ന് കേട്ടപ്പോള്‍ പലര്‍ക്കും വിശ്വസിക്കാനായില്ല.

മക്കളെ കോളേജുകളില്‍ കൊണ്ടുവിടാനായി പോകുന്ന വഴിയാണ് വെണ്ണിക്കുളം കല്ലുപാലത്തിന് സമീപത്ത് അപകടമുണ്ടായത്.  പാസ്റ്റര്‍ പൂവന്മല ആരാധനാലയത്തില്‍ എത്തിയിട്ട് ഒരു വര്‍ഷം മാത്രമേ ആയുള്ളൂവെങ്കിലും ഇതിനുള്ളില്‍ ചര്‍ച്ചിലെ അംഗങ്ങളുടെയും നാട്ടുകാരുടെയും പ്രിയങ്കരനായിരുന്നു.


ഏത് ആവശ്യത്തിനും രാപകല്‍ വ്യത്യാസമില്ലാതെ ഓടിയെത്തുന്ന പ്രകൃതമായിരുന്നു . എല്ലാവരോടും വളരെ സ്നേഹത്തോടെ പെരുമാറുന്ന ആളായിരുന്നു പാസ്റ്ററെന്നും ചര്‍ച്ചിലെ അംഗങ്ങള്‍ പറഞ്ഞു. ചര്‍ച്ചിലുള്ള 12 കുടുംബങ്ങളോടും അടുത്ത ബന്ധമാണ് പുലര്‍ത്തിവന്നത്. എല്ലാ ദിവസവും പാസ്റ്റര്‍ തന്നെയാണ് ബി.സി.എ. വിദ്യാര്‍ഥിനിയായ ഇളയ മകള്‍ ഫേബയെ പരുമല മാര്‍ ഗ്രിഗോറിയോസ് കോളേജില്‍ കൊണ്ടുപോയിരുന്നത്.

ഇടുക്കി സ്വദേശിയായ പാസ്റ്റര്‍ 21 വര്‍ഷമായി സുവിശേഷ പ്രവര്‍ത്തനം നടത്തിവരുന്നു. 2021 ജൂണിലാണ് പൂവന്മലയിലെത്തിയത്. അതിന് മുമ്പ് മൂന്നുവര്‍ഷം എഴുമറ്റൂര്‍ ചര്‍ച്ച് ഓഫ് ഗോഡിലായിരുന്നു. മൃതദേഹം ഇന്നു രാവിലെ എട്ടുമതല്‍ 11 വരെ കുമ്പനാട്ടെയും 12 മുതല്‍ രണ്ടുവരെ പൂവന്മലയിലെയുംചര്‍ച്ച് ഓഫ് ഗോഡ് ആരാധനാലയങ്ങളില്‍ പൊതുദര്‍ശനത്തിന് വെയ്ക്കും. തുടര്‍ന്ന് സ്വദേശമായ ഇടുക്കിയിലേക്ക് കൊണ്ടുപോകും.

അതേസമയം പുറമറ്റത്തെ അപകടവിവരം അറിയാതെ തിങ്കളാഴ്ച പതിവുപോലെ പരുമല മാര്‍ ഗ്രിഗോറിയോസ് കോളേജില്‍ ക്ലാസ് ആരംഭിച്ചു. പിന്നീടാണ് വാഹനാപകടത്തില്‍ ബി.സി.എ. അവസാന സെമസ്റ്റര്‍ വിദ്യാര്‍ഥിനി ബ്ലെസി ചാണ്ടി മരണപ്പെട്ടെന്ന വാര്‍ത്ത പരന്നത്. തങ്ങളുടെ സഹപാഠി മരിച്ചെന്ന വിവരം വിശ്വസിക്കാനാകാത്ത വിഷമത്തിലാണ് ബി.സി.എ. ബിരുദ വിദ്യാര്‍ഥികള്‍. ബ്ലെസി ചാണ്ടിയെ കോളേജിലേക്ക് കൊണ്ടുവിടാന്‍ വരുന്ന വഴിയാണ് അപകടം സംഭവിച്ചത്.

അലമുറയിട്ടുകരയുന്ന സഹപാഠികളെ ആശ്വസിപ്പിക്കാന്‍ അധ്യാപകര്‍ ഏറെ പാടുപെട്ടു. മറ്റ് വിദ്യാര്‍ഥികള്‍ക്ക് മാതൃകയായിരുന്നു ബ്ലെസിയുടെ പെരുമാറ്റമെന്ന് അധ്യാപകന്‍ എയ്ഞ്ചലോ രെഞ്ചു മാത്യു പറഞ്ഞു. കഴിഞ്ഞ ബുധനാഴ്ച കോളേജില്‍ നടന്ന രക്ഷാകര്‍തൃ യോഗത്തില്‍ പിതാവ് വി.എം.ചാണ്ടി സജീവമായി പങ്കെടുത്തിട്ടുണ്ടായിരുന്നു. ബ്ലെസിയെ എല്ലാ ദിവസവും കോളേജില്‍ കൊണ്ടുവിട്ടിരുന്നത് പിതാവ് ആയിരുന്നതിനാല്‍ സഹപാഠികളുമായും നല്ല അടുപ്പം പുലര്‍ത്തിയിരുന്നു.  ഭര്‍ത്താവും മക്കളും മരിച്ചതോടെ ഷാന്റി ഒറ്റയ്ക്കായി.