കൊട്ടാരമുറ്റത്ത് നിന്നും തേവാരക്കെട്ട് സരസ്വതി ദേവി, വേളിമല കുമാരസ്വാമി, ശുചീന്ദ്രം മുന്നൂറ്റിനങ്ക എന്നീ ദേവതകളുടെ വിഗ്രഹമേന്തിയ ഘോഷയാത്രയ്ക്കാണ് ആരംഭം കുറിച്ചത്.

രാവിലെ 8.30ഓടെ ഉപ്പിരിക്കമാളികയില്‍ നടന്ന ഉടവാള്‍ കൈമാറ്റത്തില്‍ തമിഴ്നാട് ദേവസ്വം പ്രതിനിധികളില്‍ നിന്നും ദേവസ്വംമന്ത്രി കെ.രാധാകൃഷ്ണന്‍ ഉടവാള്‍ ഏറ്റുവാങ്ങി. തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് അഡ്വ. അനന്തഗോപന്‍, ദേവസ്വം കമ്മീഷണര്‍ ബി.എസ് പ്രകാശ് എന്നിവരടങ്ങിയ കേരള സംഘവും കൂടെയുണ്ടായിരുന്നു.


തേവാരക്കെട്ടില്‍ നിന്ന് സരസ്വതീ വിഗ്രഹം തെക്കേതെരുവിലൂടെ എഴുന്നളളിച്ച് അലങ്കരിച്ചു. പല്ലക്കിലും ആനപ്പുറത്തുമാണ് ദേവീദേവന്മാരെ എഴുന്നളളിച്ചത്. മുന്‍വര്‍ഷം കൊവിഡ് നിയന്ത്രണങ്ങളെ തുടര്‍ന്ന് ആനപ്പുറത്ത് എഴുന്നളളത്തും വെളളിക്കുതിരയിലെ എഴുന്നളളത്തും തട്ടപൂജയും ഒഴിവാക്കിയിരുന്നു. ഇവ ഇത്തവണ ഉണ്ടാകും.

കുഴിത്തുറ മഹാദേവക്ഷേത്രം, നെയ്യാറ്റിന്‍കര ശ്രീകൃഷ്ണസ്വാമി ക്ഷേത്രം, എന്നിവിടങ്ങളില്‍ വിഗ്രഹങ്ങള്‍ ഇറക്കിപൂജ പതിവുള്ളതാണ്്. ശേഷം തലസ്ഥാനത്തെത്തുന്ന ഘോഷയാത്രയ്ക്ക് വലിയ സ്വീകരണമാണ് ഒരുക്കുക. സരസ്വതി ദേവിയെ കോട്ടയ്ക്കകം നവരാത്രി മണ്ഡപത്തിലും കുമാരസ്വാമിയെ ആര്യശാല ഭഗവതി ക്ഷേത്രത്തിലും മുന്നൂറ്റിനങ്കയെ ചെന്തിട്ട ഭഗവതിക്ഷേത്രത്തിലും പൂജയ്ക്കിരുത്തും. ഒക്ടോബര്‍ മൂന്നിനാണ് പൂജവയ്പ്പ് തുടങ്ങുക.