നിയമസഭ അടിച്ചു തകര്ത്ത് 2. 21 ലക്ഷം രൂപയുടെ നാശനഷ്ടം വരുത്തിയ കേസ്... തുടരന്വേഷണത്തിന് അനുമതി; രണ്ട് മാസത്തിനുള്ളില് അന്വേഷണം പൂര്ത്തിയാക്കണം, നിലവിലെ പ്രതിപ്പട്ടികയ്ക്കും കുറ്റപത്രത്തിനും മാറ്റം വരുത്തുകയോ വകുപ്പുകള് ഭേദഗതി ചെയ്യുകയോ ചെയ്യരുതെന്നും കോട്ടം വരുത്തരുതെന്നും കോടതി ഉത്തരവില് നിര്ദ്ദേശമുണ്ട്, അന്വേഷണ പുരോഗതി റിപ്പോര്ട്ട് ജൂലൈ 27 ന് ഹാജരാക്കണം
നിയമ സഭയില് മുന് എം എല് എ യും നിലവില് വിദ്യാഭ്യാസ മന്ത്രിയുമായ വി. ശിവന്കുട്ടിയടക്കമുള്ള സി പി എം എം എല് എ മാര് സ്പീക്കറുടെ ഡയസും കംപ്യൂട്ടറും വിദേശ നിര്മ്മിത മൈക്ക് സെറ്റുമടക്കമുള്ള പൊതുമുതല് നശിപ്പിച്ച നിയമസഭാ കൈയാങ്കളി കേസില് തുടരന്വേഷണത്തിന് കോടതി അനുമതി നല്കി.
തിരുവനന്തപുരം ചീഫ് ജുഡീഷ്യല് മജിസ്ട്രേറ്റ് ഷിബു ഡാനിയേലിന്റേതാണുത്തരവ്. രണ്ട് മാസത്തിനുള്ളില് അന്വേഷണം പൂര്ത്തിയാക്കണം. നിലവിലെ പ്രതിപ്പട്ടികയ്ക്കും കുറ്റപത്രത്തിനും മാറ്റം വരുത്തുകയോ വകുപ്പുകള് ഭേദഗതി ചെയ്യുകയോ ചെയ്യരുതെന്നും കോട്ടം വരുത്തരുതെന്നും കോടതി ഉത്തരവില് നിര്ദ്ദേശമുണ്ട്.
ഓരോ മൂന്ന് ആഴ്ചയിലും അന്വേഷണ പുരോഗതി അറിയിക്കണം എന്നീ ഉപാധികളോടെയാണ് തുടരന്വേഷണത്തിന് കോടതി അനുമതി നല്കിയത്. അന്വേഷണ പുരോഗതി റിപ്പോര്ട്ട് ജൂലൈ 27 ന് ഹാജരാക്കാനും കോടതി ഉത്തരവിട്ടു.
2015 ല് നടന്ന സംഭവത്തില് അന്വേഷണം പൂര്ത്തിയാക്കി 2016 ല് കുറ്റപത്രം സമര്പ്പിച്ച കേസില് 2023 ല് തുടരന്വേഷണ ആവശ്യവുമായി വന്നതിനെ ക്രൈംബ്രാഞ്ചിനെ തുടരന്വേഷണ ഉത്തരവില് രൂക്ഷമായി വിമര്ശിച്ചിട്ടുണ്ട്. എന്നാല് അന്വേഷണത്തെ തടയുന്നില്ലെന്നും വ്യക്തമാക്കി.
തങ്ങളെ യുഡിഫ് എംഎല്എമാര് ആക്രമിച്ചുവെന്ന് ചൂണ്ടിക്കാട്ടി തുടരന്വേഷണം വേണമെന്ന മുന് എംഎല്എ മാരായ ഇ എസ് ബിജിമോളും ഗീത ഗോപിയുമടങ്ങുന്ന സിപിഐ വനിത നേതാക്കള് നല്കിയ ഹര്ജി സ്വമേധയാ പിന്വലിച്ചിരുന്നു. എന്നാല് ഇവര് ഡി ജി പി ക്ക് നല്കിയ പരാതി ക്രൈംബ്രാഞ്ചിന് ലഭിച്ചുവെന്നും സാക്ഷിമൊഴികള് പരിശോധിക്കണമെന്നും കാണിച്ചാണ് ക്രൈംബ്രാഞ്ച് തുടരന്വേഷണ ഹര്ജി സമര്പ്പിച്ചത്. കൂടുതല് അന്വേഷണം നടത്തേണ്ടതുണ്ടെന്നും തുടരന്വേഷണ ഹര്ജിയിയില് പ്രോസിക്യൂഷന് ബോധിപ്പിച്ചു. എന്നാല് യു ഡി ഫ് എംഎല്എ മാരെ തന്ത്രത്തില് കൂടുതലായി പ്രതിസ്ഥാനത്ത് ചേര്ക്കാനുള്ള സര്ക്കാര്, ക്രൈംബ്രാഞ്ച് നീക്കത്തിന്റെ ഭാഗമായാണ് തുടരന്വേഷണ ഹര്ജി ഫയല് ചെയ്തതെന്ന ആക്ഷേപം ഉയര്ന്നിട്ടുണ്ട്.
തുടരന്വേഷണത്തിന് അനുമതി തേടിയുള്ള ക്രൈംബ്രാഞ്ച് ഹര്ജിയില് ക്രൈംബ്രാഞ്ചിനും പ്രോസിക്യൂഷനും കോടതിയുടെ രൂക്ഷ വിമര്ശനം ഏറ്റു വാങ്ങേണ്ടി വന്നു.
വൈകി വന്ന വിവേകമോയെന്ന് കോടതി ചോദിച്ചിരുന്നു. അനുബന്ധ കുറ്റപത്രം സമര്പ്പിക്കും വരെ കേസ് വിചാരണ നിര്ത്തിവെക്കണമെന്ന പോലീസ് ആവശ്യത്തെ രൂക്ഷമായി വിമര്ശിച്ചു. തുടരന്വേഷണം നടത്തും മുമ്പ് അനുബന്ധ കുറ്റപത്രം സമര്പ്പിക്കുമെന്ന് ഇപ്പോള് എങ്ങനെ പറയുമെന്ന് കോടതി ചോദിച്ചു. തുടരന്വേഷണം നടത്തി അനുബന്ധ കുറ്റപത്രം സമര്പ്പിക്കും വരെ കേസ് വിചാരണ നിര്ത്തിവെക്കണമെന്ന് സിജെഎം കോടതിയിലാണ് പോലീസ് ആവശ്യപ്പെട്ടത്.
"
https://www.facebook.com/Malayalivartha
