വിഴിഞ്ഞത്ത് കിണറ്റില്‍ അകപ്പെട്ട മഹാരാജനെ കണ്ടെത്തി. ഇതോടെ രക്ഷാപ്രവര്‍ത്തനം അന്തിമഘട്ടത്തിലേക്ക് അടുക്കുന്നു. വെള്ളവും ചെളിയും നീക്കം ചെയ്യുന്ന ജോലികള്‍ അവസാനഘട്ടത്തിലേക്ക് അടുക്കുമ്പോള്‍ മഹാരാജനെ ഉടന്‍ പുറത്തെത്തിക്കാനായി സാധിക്കുമെന്ന പ്രതീക്ഷയിലാണ് എന്‍ഡിആര്‍എഫ്അടക്കമുള്ള ദൗത്യസംഘം.

മുക്കോല സര്‍വശക്തിപുരം റോഡില്‍ അശ്വതിയില്‍ സുകുമാരന്റെ വീട്ടില്‍ ശനിയാഴ്ച രാവിലെ 9.15 ഓടെയാണ് അപകടം സംഭവിച്ചത്. മഹാരാജന് ഒപ്പം കിണറിലുണ്ടായിരുന്ന മണികണ്ഠന്‍ (48) അത്ഭുതകരമായി രക്ഷപ്പെട്ടു.

കഴിഞ്ഞവര്‍ഷത്തെ മഴയില്‍ കിണറിലെ ഉറകള്‍ പൊട്ടി മണ്ണിടിഞ്ഞിരുന്നു. ഇതോടെ പഴയ ഉറകള്‍ മാറ്റാനാണ് മഹാരാജന്‍ ഉള്‍പ്പെട്ട സംഘം എത്തിയത്. മഹാരാജനും മണികണ്ഠനുമാണ് കിണറിലിറങ്ങിയത്. വിജയന്‍, ശേഖരന്‍, കണ്ണന്‍ എന്നിവര്‍ കരയിലുമായിരുന്നു. ഇതിനിടെ ചെറിയ തോതില്‍ മണ്ണിടിച്ചിലും വെള്ളമിറങ്ങുന്നതും കണ്ട് ഉള്ളിലുണ്ടായിരുന്നവരോട് കരയ്ക്കു കയറാനായി ഇവര്‍ വിളിച്ചുപറഞ്ഞു.

എന്നാല്‍, ഇവര്‍ കയറുംമുമ്പേ കിണറിന്റെ മധ്യഭാഗത്തുനിന്ന് പഴയ കോണ്‍ക്രീറ്റ് ഉറ തകര്‍ന്ന് മഹാരാജനുമൊപ്പം വീഴുകയായിരുന്നു. മണികണ്ഠന്‍ കയറില്‍ പിടിച്ചുകയറി. മണ്ണിനൊപ്പം കോണ്‍ക്രീറ്റ് ഉറകളും വീണതാണ് അപകടം രൂക്ഷമായത്. അഗ്നിരക്ഷാസേന ഉടന്‍ എത്തിയെങ്കിലും രക്ഷാപ്രവര്‍ത്തനം ഏറെ പ്രയാസമേറിയതായിരുന്നു.