'സാധാരണക്കാരനായി ജനിച്ച്, സാധാരണക്കാരനായി ജീവിച്ച, ഒരു നേതാവിന് ജനങ്ങള്‍ നല്‍കുന്ന സ്നേഹാദരവാണിത്. സംസ്കാര ചടങ്ങുകള്‍ അപ്പയുടെ ആഗ്രഹം പോലെ നടത്തണമെന്നാണ് ഞങ്ങളുടെയും ആഗ്രഹം.' ചാണ്ടി ഉമ്മന്‍ ഏഷ്യാനെറ്റ് ന്യൂസിനോട് പ്രതികരിച്ചു.  'നന്ദി പറയാന്‍ വാക്കുകളില്ല, അദ്ദേഹം കേരളത്തിലെ ഓരോ മലയാളിയെയും ഒരുപാട് സ്നേഹിച്ചിരുന്നു. ജാതിമത രാഷ്ട്രീയ ഭേദമെന്യേ അദ്ദേഹം എല്ലാവരെയും സ്നേഹിച്ചിരുന്നു. ആ സ്നേഹം പത്തിരട്ടിയായിട്ടാണ് ജനങ്ങള്‍ ഇപ്പോള്‍ തന്നുകൊണ്ടിരിക്കുന്നത്. കൊച്ചുകുട്ടികള്‍ മുതല്‍ വയസ്സായവര്‍ വരെ വഴിയില്‍ നിന്ന് അപ്പയെ കാണുന്നു. ദര്‍ബാര്‍ ഹാളിലും വീട്ടിലും ഒക്കെ നമ്മള്‍ ആ തിരക്ക് കണ്ടതാണ്. അദ്ദേഹം കൊടുത്ത സ്നേഹം ജനങ്ങളിപ്പോള്‍ അദ്ദേഹത്തിന് തിരിച്ച് കൊടുക്കുകയാണ്.'' മകള്‍ അച്ചു ഉമ്മന്‍റെ വാക്കുകളിങ്ങനെ. രോഗബാധിതനായി ദീർഘകാലമായി ചികിത്സയിലായിരുന്ന ഉമ്മൻചാണ്ടി ബംഗളൂരുവിലെ ചിന്മയ ആശുപത്രിയിൽ ചൊവ്വാഴ്ച  പുലർച്ചെ 4.25 നാണ് അന്തരിച്ചത്.

ബംഗളൂരുവിൽ നൂറുകണക്കിന് മലയാളികൾ അവസാനമായി ഒരുനോക്ക് കാണാൻ എത്തിയതിനാൽ നിശ്ചയിച്ചതിലും രണ്ട് മണിക്കൂറിലേറെ വൈകിയാണ് പ്രത്യേക വിമാനത്തിൽ ഉമ്മൻചാണ്ടിയുടെ മൃതദേഹം തിരുവനന്തപുരത്ത് എത്തിച്ചത്. പ്രത്യേക വിമാനത്തിൽ ബംഗളൂരുവിൽ നിന്ന് ഉച്ചയ്ക്ക് രണ്ടരയോടെ തിരുവനന്തപുരത്തെത്തിച്ച മൃതദേഹം പ്രതിപക്ഷ നേതാവിന്റെ നേതൃത്വത്തിൽ ഏറ്റുവാങ്ങി.തുടർന്ന് ഉമ്മൻചാണ്ടിയുടെ ജീവിതത്തോട് ഏറെ അടുത്ത് നിൽക്കുന്ന തിരുവനന്തപുരത്തിന്റെ നഗരവീഥികളിലൂടെ വിലാപയാത്ര നീങ്ങിയപ്പോൾ വികാര നിർഭരമായ മുദ്രാവാക്യങ്ങളുമായി ആൾക്കൂട്ടം അനുഗമിച്ചു. സോളാർ കേസ് ഉണ്ടായതിന് ശേഷമാണ് ഉമ്മൻ ചാണ്ടിയുടെ ആരോഗ്യനിലയിൽ ബുദ്ധിമുട്ടുകൾ ഉണ്ടായി തുടങ്ങിയത്. എന്നും ജനങ്ങൾക്കിടയിൽ ജീവിച്ച  ഉമ്മൻ ചാണ്ടിയെ സോളാർ ആരോപണം വല്ലാതെ ഉലച്ചു കളഞ്ഞു. രോഗത്തിൻെ ആവിർഭാവവും ഇതേ സമയത്ത് തന്നെയായിരുന്നു.എന്നാൽ അതൊന്നും കാര്യമാക്കാതെയാണ് ഉമ്മൻ ചാണ്ടി ജീവിച്ചത്.തിരുവനന്തപുരത്തെ ഡോ.ജോൺ പണിക്കരാണ് രോഗത്തെ കുറിച്ച് ആദ്യം സംശയം പ്രകടിപ്പിച്ചത്.എന്നാൽ പിന്നീട് രോഗം ദൃശ്യമായതയില്ല. അങ്ങനെ രോഗം ഒളിച്ചുകളിക്കുമ്പോഴും ഉമ്മൻ ചാണ്ടി പരിഭ്രമം കാണിച്ചതേയില്ല. തന്നെ രോഗത്തിന് കീഴ്പ്പെടുത്താൻ കഴിയില്ലെന്ന ഉറപ്പ് ഉമ്മൻ ചാണ്ടിക്കുണ്ടായിരുന്നു.