പിആര്‍ വര്‍ക് നടത്തി കെട്ടിപ്പൊക്കുന്ന ബില്‍ഡപ്പൊക്കെ പൊളിഞ്ഞടുങ്ങും. ദേ ഇതുപോലൊരു നേതാവ് മുന്നിലുള്ളപ്പോള്‍. രണ്ടുദിവസമായ് കേരളം കണ്ടുകൊണ്ടിരിയ്ക്കുന്നത് തിരുവനന്തപുരത്തേക്കും കോട്ടയത്തേക്കും ഒഴുകി കൊണ്ടിരിയ്ക്കുന്ന ജനസാഗരം ആയിരുന്നു. കണ്ണേ കരളേ കുഞ്ഞു കുഞ്ഞേയെന്ന വിളി. ഊണും ഉറക്കവുമില്ലാതെ ഉമ്മന്‍ ചാണ്ടിയുടെ വിലാപ യാത്രയ്‌ക്കൊപ്പം കേരളവും നടന്നു. അവരാരും അദ്ദേഹത്തിന്റെ രാഷ്ട്രീയ പാര്‍ട്ടിയില്‍ ഒപ്പം പ്രവര്‍ത്തിച്ചവരല്ല. അദ്ദേഹത്തിന്റെ മുന്നണിയുടെ ആശയങ്ങളോട് യോജിക്കുന്നവരല്ല. ഇവരെ ആരേയും ഏതേലും പിആര്‍ ഏജന്‍സികള്‍ കൊണ്ട് നിര്‍ത്തിയതല്ല. ഉമ്മന്‍ ചാണ്ടിയെന്ന നേതാവിനെ ജനകീയ നേതാവിനെ അവസാനമായ് ഒരുനോക്ക് കാണാന്‍ കേരളത്തിന്റെ പല ഭാഗങ്ങളില്‍ നിന്ന് വന്നവരാണ്.

ഇവിടെയാണ് പിണറായി നിങ്ങള്‍ ചെറുതായി പോകുന്നത്. ജീവിച്ചിരിയ്ക്കുമ്പോള്‍ ചെയ്യുന്നത് എന്താണോ അതാണ് മരിക്കുമ്പോള്‍ തിരികെ കിട്ടുക. ഉമ്മന്‍ ചാണ്ടി ജനങ്ങളെ നെഞ്ചോട് ചേര്‍ത്തു അദ്ദേഹം വിട പറഞ്ഞപ്പോള്‍ ജനം നെഞ്ചുപൊട്ടി കരഞ്ഞു. ഒരു രാഷ്ട്രീയക്കാരന്‍ തന്റെ മനുഷ്യായുസില്‍ സമ്പാദിക്കാന്‍ കഴിയുന്ന ഏറ്റവും വലിയ സമ്പാദ്യമാണ് ഉമ്മന്‍ ചാണ്ടി സ്വന്തമാക്കിയത്. അതെ നമുക്ക് ഉറപ്പിച്ച് പറയാം ഉമ്മന്‍ ചാണ്ടി ജനഹൃദയങ്ങളിലാണ്. തിരുവനന്തപുരത്ത് നിന്ന് ബുധനാഴ്ച രാവിലെ 7 മണിയ്ക്ക് തുടങ്ങിയ വിലാപ യാത്ര കോട്ടയത്ത് എത്തിയത് പിറ്റേ ദിവസം 11 മണി കഴിഞ്ഞതിന് ശേഷം. ഉറക്കം പോലുമില്ലാതെ ജനം ഒരുനോക്ക് കാണാന്‍ തെരുവോരങ്ങളില്‍ കാത്തിരുന്നു. കോട്ടയത്തെ കാഴ്ച എന്തായിരുന്നു എന്നുവെച്ചാല്‍ പല ജില്ലകളില്‍ നിന്നും എത്തിയര്‍ക്ക് രാത്രി ആയതിനാല്‍ തിരികെ വീടുകളിലേക്ക് പോകാന്‍ കഴിയാത്ത സ്ഥിതി. അവര്‍ക്ക് വേണ്ടി പല വീടുകളുടേയും വാതിലുകള്‍ തുറന്നിട്ട് കോട്ടയംകാര്‍. ഉമ്മന്‍ ചാണ്ടിയോടുള്ള നിലയ്ക്കാത്ത സ്‌നേഹമാണത്. ഇതൊന്നും പിആര്‍ വര്‍ക്ക് നടത്തി ഉമ്മന്‍ ചാണ്ടി ഉണ്ടാക്കിയെടുത്തതല്ല. പകരം സ്‌നേഹം കൊടുത്ത് സ്‌നേഹം തിരികെ വാങ്ങി. കോടിയില്‍ ഒന്നേ കാണൂ ഇതുപോലൊരു നേതാവ്.

ഇനി പറയാനുള്ളത് മുഖ്യമന്ത്രി പിണറായി വിജയനോടാണ്. ഇതുപോലെയാകണം എന്ന് പറയില്ല കാരണം ഉമ്മന്‍ ചാണ്ടിയെ പോലെ ആകാന്‍ പിണറായിക്ക് കഴിയില്ല. പക്ഷെ അദ്ദേഹത്തെ മാതൃകയാക്കാം. ഒരു മുഖ്യമന്ത്രി അല്ലെങ്കില്‍ രാഷ്ട്രീയക്കാരന്‍ ജനങ്ങളോട് എങ്ങനെ പെരുമാറണം എന്നത്. പിആര്‍ വര്‍ക് നടത്തി ഉണ്ടാക്കിയെടുക്കുന്ന ജനപിന്തുണയ്ക്ക് കുമിളയുടെ ആയുസ് പോലും ഉണ്ടാകില്ല. ജനകീയ നേതാവെന്ന വിളിപ്പേരിന് കോടികള്‍ പൊടിച്ചാണ് പിണറായി പിആര്‍ വര്‍ക് നടത്തുന്നത്. പിണറായിയെ തള്ളിമറിയ്ക്കാന്‍ പിആര്‍ഡി വകുപ്പ്,സോഷ്യല്‍മീഡിയ ടീം, കൂടാതെ കൈരളിയും ദേശാഭിമാനിയും. എത്ര പിആര്‍ വര്‍ക് നടത്തിയാലും കൈയ്യിലിരുപ്പ് ഇതല്ലെ. പബ്ലിക് റിലേഷന്‍സും പിണറായി വിജയനും കഴിഞ്ഞ നിയമസഭാതെരഞ്ഞെടുപ്പില്‍ എല്‍ഡിഎഫിന്റെ ഒരു മുദ്രാവാക്യം ഏറെ ക്ലച്ച് പിടിച്ചതായിരുന്നു. നാട്ടിലെ കൊച്ചു കുട്ടിയുടെ ചുണ്ടില്‍ പോലും അതുണ്ടായിരുന്നു, എല്‍ഡിഎഫ് വരും എല്ലാം ശരിയാകും. ഇത് പി ആര്‍ ബുദ്ധി കേന്ദ്രങ്ങള്‍ സൃഷ്ടിച്ചതാണ്. മുഖ്യമന്ത്രി നടത്തുന്ന നാം മുന്നോട്ട് ചാനല്‍ പരിപാടി ഒന്നാന്തരം പിആര്‍ വര്‍ക്ക് തന്നെയാണ്. ഇതു കൂടാതെ സാധാരണ സര്‍ക്കാര്‍ നല്‍കുന്ന പത്ര പരസ്യങ്ങള്‍, സൈബര്‍ സഖാക്കളുടെ സോഷ്യല്‍ മീഡിയയിലെ തളളുകള്‍, നാട്ടിലെമ്പാടും ഉയരുന്ന ഫഌ്‌സുകള്‍ ഇങ്ങനെ പോകുന്നു പി ആര്‍ വകുപ്പിന്റെ നീണ്ട നിര. സൂപ്പര്‍ സ്റ്റാര്‍ രാജപ്പന്‍ പറഞ്ഞതുപോലെ എങ്ങും എന്റെ തല/ എന്റെ മുഖം എന്നിവ മാത്രം. ബൂസ്റ്റിങ്ങല്ല അതുക്കും മേലെ.