പ്രതീക്ഷകളോടെ വീണ്ടുമൊരു വിഷു കൂടി..... കണിക്കൊന്നയും കണിവെള്ളരിയും ഓട്ടുരുളിയില് നിറച്ച് വിഷു ആഘോഷമാക്കി മലയാളികള്... ഏവര്ക്കും മലയാളി വാര്ത്തയുടെ വിഷു ദിന ആശംസകള്
![](https://www.malayalivartha.com/assets/coverphotos/w657/308899_1713056954.jpg)
വീണ്ടുമൊരു വിഷു കൂടി..... കണിക്കൊന്നയും കണിവെള്ളരിയും ഓട്ടുരുളിയില് നിറച്ച് കാര്ഷിക സമൃദ്ധിയുടെ ഓര്മ പുതുക്കി വിഷു ആഘോഷമാക്കി മലയാളികള്.
കാര്ഷിക സംസ്കാരവുമായി കൂടി ബന്ധമുള്ള ആഘോഷമാണ് വിഷു. മേടമാസത്തിലെ വിഷുപ്പുലരിയില് കണ്ടുണരുന്ന കണി ആ വര്ഷം മുഴുവന് ജീവിതത്തില് ഐശ്വര്യവും സൗഭാഗ്യങ്ങളും കൊണ്ടുവരും എന്നാണ് വിശ്വാസം. വിവിധ ക്ഷേത്രങ്ങളില് വിഷുദിനത്തില് ദര്ശനത്തിനു വേണ്ടി വിപുലമായ ക്രമീകരണങ്ങളാണ് ചെയ്തിരിക്കുന്നത്.
വിഷുക്കണിയും കണിക്കൊന്നയും പോലെ തന്നെ മലയാളികള്ക്ക് ഏറെ പ്രിയപ്പെട്ടതാണ് വിഷുക്കൈനീട്ടവും. കുട്ടികള്ക്കും മുതിര്ന്നവര്ക്കും ഗൃഹാതുരത്വം നിറക്കുന്ന ഈ സമ്പ്രദായം കാലങ്ങളായി നമ്മള് പിന്തുടരുന്നതാണ്.
കണി കണ്ടതിനുശേഷം കാരണവന്മാര് നല്കുന്ന സമ്മാനമാണ് വിഷുക്കൈനീട്ടം. വര്ഷത്തെ സമൃദ്ധിയുടെ സൂചകമായി ഇതിനെ കാണുന്നവരുണ്ട്.കൂട്ട് കുടുംബ വ്യവസ്ഥിതി നിലനിന്നിരുന്ന കാലത്ത് സ്വത്തിന്റെ ചെറിയൊരു പങ്ക് കുടുംബത്തിലെ എല്ലാവര്ക്കുമായി വീതിച്ചു നല്കുന്നു എന്നതിന്റെ പ്രതീകമാണ് വിഷുക്കൈനീട്ടമെന്നും പറയപ്പെടുന്നുണ്ട്.
ഇന്നത്തെ കാലത്ത് മുത്തച്ഛനോ അച്ഛനോ അമ്മാവനോ വീട്ടിലെ മുതിര്ന്നവരോ ആണ് കൈനീട്ടം നല്കുക. കണി ഉരുളിയിലെ നെല്ലും അരിയും കൊന്നപ്പൂവും സ്വര്ണ്ണവും ചേര്ത്ത് വിഷുക്കൈനീട്ടം നല്കണമെന്നാണ് പഴമക്കാര് ചൊല്ല്.
ഓട്ടുരുളിയെ പ്രപഞ്ചത്തോട് ചേര്ത്തുവയ്ക്കുന്നതാണ് സങ്കല്പം. അതിലേക്ക് വാല്ക്കണ്ണാടി, ഗ്രന്ഥം, സ്വര്ണം, ഞൊറിഞ്ഞ കസവുമുണ്ട്, ഉണങ്ങലരി, കൃഷ്ണവിഗ്രഹം, നാണയങ്ങള്, പലതരം ഫലങ്ങളും. ഒപ്പം സ്വര്ണ നിറത്തില് കൊന്നപ്പൂവും. കേരളത്തിന്റെ തനത് ഉല്വസത്തിന് ഇത്തവണയും നിറമൊട്ടും കുറവല്ല. കൊന്നപ്പൂ കൃഷ്ണന്റെ കിരീടവും കണിവെള്ളരി മുഖവും വിളക്കിലെ തിരി കണ്ണുകളായും മാറുമ്പോള് ആ കാഴ്ചയില് നിറയുന്നത് മണ്ണും വിണ്ണും മലയാളിയുടെ മനസും കൂടിയാണ്.
ഇതു മാത്രമല്ല വിഷു കണിയും, വിഷു കൈനീട്ടവും പോലെ തന്നെ പ്രധാനമാണ് വിഷുസദ്യയും. ഓരോ വിഷുവിനും സദ്യയില് വ്യത്യസ്തത വരുത്താന് പലരും ശ്രമിക്കാറാണ് പതിവ്.
കുടുംബാംഗങ്ങളെല്ലാം ഒന്നിച്ചിരുന്ന് ആലോചിച്ചതിനുശേഷമാണ് സദ്യവട്ടങ്ങളില് അന്തിമ തീരുമാനം എടുക്കാറുള്ളത്. വിഷുവിന് ദിവസങ്ങള്ക്ക് മുമ്പുതന്നെ സദ്യവട്ടങ്ങളില് തീരുമാനമാകും.
വിഷുക്കണിയും വിഷുക്കൈനീട്ടവും കഴിഞ്ഞാല് പിന്നെ വിഷു പ്രാതലാണ്. പ്രാതലിനു വിഷുക്കഞ്ഞിയോ വിഷുക്കട്ടയോ ആണ് വിഭവം. കൊയ്തെടുത്ത പുന്നെല്ലിന്റെ അരി പൊടിച്ച് തേങ്ങാപ്പാലും ശര്ക്കരയും ചേര്ത്താണ് വിഷുക്കട്ട തയാറാക്കുക. ഒപ്പം അവല് വിളയിച്ചതോ നനച്ചതോ ഉണ്ടാകും. വിഷുക്കഞ്ഞിക്ക് കോമ്പിനേഷന് ചക്കപ്പുഴുക്കും പപ്പടവുമാണ്. ഉപ്പും മധുരവും പുളിയും കയ്പും നിറഞ്ഞ വിഭവങ്ങളാണ് വിഷുസദ്യയില് വിളമ്പേണ്ടത്. മാമ്പഴപ്പുളിശ്ശേരി, ഇടിച്ചക്കത്തോരന്, ചക്ക എരിശ്ശേരി, പാവയ്ക്കത്തീയല്, വെണ്ടയ്ക്ക പച്ചടി തുടങ്ങി തൊടിയില് കിട്ടുന്ന പച്ചക്കറികള് കൊണ്ടുള്ള വിഭവങ്ങളാണ് വിഷു സദ്യയുടെ പ്രത്യേകത. ചക്കപ്പഴവും മാമ്പഴവും ഏത്തപ്പഴവും പൈനാപ്പിളും ഒക്കെയാവും വിഷുപ്പായസത്തിന്റെ പ്രധാന ചേരുവ. വാഴയിലയിലാണ് സദ്യ കഴിക്കുന്നത്.
കൈനീട്ടത്തിനൊപ്പം സ്നേഹവും നന്മകളും സമൃദ്ധിയും അകത്തും പുറത്തും പുലരട്ടെ എന്ന പ്രാര്ഥനയുമായി ആഘോഷമാക്കുകയാണ് ഇത്തവണത്തെയും വിഷു. പ്രിയ പ്രേക്ഷകര്ക്ക് മലയാളി വാര്ത്തയുടെ വിഷു ആശംസകള്.
"
https://www.facebook.com/Malayalivartha