കള്ളപ്പണം വെളുപ്പിക്കല്‍ കേസില്‍ പ്രതിയെ ഒറ്റ രാത്രികൊണ്ട് ചോദ്യം ചെയ്തതില്‍ ഇ.ഡി യെ ശാസിച്ച് ബോംബെ ഹൈക്കോടതി. ഉറങ്ങാനുള്ള അവകാശം മനുഷ്യന്റെ അടിസ്ഥാന ആവശ്യമാണെന്നും അത് നല്‍കാത്തത് ഒരു വ്യക്തിയുടെ മനുഷ്യാവകാശ ലംഘനമാണെന്നും ബോംബെ ഹൈക്കോടതി പറഞ്ഞു.

തന്റെ അറസ്റ്റ് നിയമവിരുദ്ധമാണെന്ന് പ്രഖ്യാപിക്കണമെന്ന് ആവശ്യപ്പെട്ട് 64 കാരനായ ഗാന്ധിധാം നിവാസിയായ രാം കൊട്ടുമല്‍ ഇസ്രാനി സമര്‍പ്പിച്ച ഹരജി പരിഗണിക്കുകയായിരുന്നു ബെഞ്ച്. ജസ്റ്റിസുമാരായ രേവതി മൊഹിതേ-ഡെരെ, മഞ്ജുഷ ദേശ്പാണ്ഡെ എന്നിവരടങ്ങുന്ന ബെഞ്ചാണ് ഇ.ഡിക്ക് നിര്‍ദേശം നല്‍കിയത്.

2023 ഓഗസ്റ്റിലാണ് ഇ.ഡി ഇസ്രാനിയെ അറസ്റ്റ് ചെയ്തത്. 2023 ആഗസ്ത് 7 ന് നല്‍കിയ സമന്‍സ് പ്രകാരം താന്‍ ഏജന്‍സിക്ക് മുമ്പാകെ ഹാജരായെന്നും രാത്രി മുഴുവന്‍ ചോദ്യം ചെയ്‌തെന്നും ഇസ്രാനി ഹരജിയില്‍ പറഞ്ഞു

. പിറ്റേന്ന് കേസില്‍ അറസ്റ്റ് രേഖപ്പെടുത്തി. ഹര്‍ജി തള്ളിയെങ്കിലും ഹര്‍ജിക്കാരനെ ഒറ്റരാത്രികൊണ്ട് ചോദ്യം ചെയ്യുന്ന രീതി ശരിയല്ലെന്ന് ബെഞ്ച് പറഞ്ഞു. രാത്രിയിലും ഉറങ്ങുന്ന സമയത്തും മൊഴി രേഖപ്പെടുത്തരുതെന്ന് ജസ്റ്റിസ് രേവതി മൊഹിതേ ദേരെ, ജസ്റ്റിസ് മഞ്ജുഷ ദേശ്പാണ്ഡെ എന്നിവരടങ്ങിയ ഡിവിഷന്‍ ബെഞ്ച് നിര്‍ദേശിക്കുകയും ചെയ്തു.


അതേസമയം രാത്രിയില്‍ മൊഴി രേഖപ്പെടുത്താനായി ഇസ്രാനി സമ്മതം നല്‍കിയിരുന്നതായി അന്വേഷണ ഏജന്‍സിയുടെ അഭിഭാഷകന്‍ ഹിറ്റെന്‍ വെനേഗാവ്കര്‍ കോടതിയെ അറിയിച്ചു.

അഭിഭാഷകരായ വിജയ് അഗര്‍വാള്‍, ആയുഷ് ജിന്‍ഡാല്‍, യാഷ് വര്‍ധന്‍ തിവാരി എന്നിവരാണ് വാദിച്ചത്. സ്വമേധയാ ആണെങ്കിലും അല്ലെങ്കിലും പുലര്‍ച്ചെ 3.30 വരെ ഹര്‍ജിക്കാരന്റെ മൊഴി രേഖപ്പെടുത്തിയ രീതി അപലപനീയമാണെന്ന് കോടതി പറഞ്ഞു.


അതേസമയം ഉറങ്ങാനുള്ള അവകാശം മനുഷ്യന്റെ അടിസ്ഥാന ആവശ്യമാണെന്നും അത് ഇല്ലാതാക്കുന്നത് മനുഷ്യാവകാശ ലംഘനമാണെന്നും കോടതി വ്യക്തമാക്കി. സമന്‍സ് പുറപ്പെടുവിക്കുമ്പോള്‍ മൊഴി രേഖപ്പെടുത്തേണ്ട സമയം സംബന്ധിച്ചുള്ള മാര്‍ഗ്ഗനിര്‍ദേശങ്ങള്‍ പാലിക്കണമെന്നും കോടതി ഇ.ഡിയോട് നിര്‍ദേശിച്ചു. വിഷയം സെപ്റ്റംബര്‍ 9-ലേക്ക് പരിഗണിക്കുന്നതിനായി മാറ്റി. 

 "