ബാബാസാഹേബ് ഭീം റാവു അംബേദ്കര്‍ ഉണ്ടാക്കിയ ഭരണഘടനയെ തകര്‍ക്കാനാണ് ബിജെപി ശ്രമിക്കുന്നതെന്ന് രാഷ്ട്രീയ ജനതാദള്‍ (ആര്‍ജെഡി) മേധാവിയും മുന്‍ ബിഹാര്‍ മുഖ്യമന്ത്രിയുമായ ലാലു പ്രസാദ് യാദവ്. ഇന്ത്യയില്‍ ഭരണഘടനയും ജനാധിപത്യവും ക്ഷയിക്കാന്‍ ഞങ്ങള്‍ അനുവദിക്കില്ലെന്നും സരണില്‍ ഒരു തിരഞ്ഞെടുപ്പ് റാലിയെ അഭിസംബോധന ചെയ്യവെ ലാലു പ്രസാദ് പറഞ്ഞു. 'അവര്‍ (ബിജെപി) പിന്നാക്ക സമുദായങ്ങളുടെ അവകാശങ്ങള്‍ കവര്‍ന്നെടുക്കാന്‍ ആഗ്രഹിക്കുന്നു. ഒരു കാരണവശാലും ഞങ്ങള്‍ ഇത് അനുവദിക്കില്ല. അതിനായി ഞങ്ങള്‍ ഒറ്റക്കെട്ടായി തോളോട് തോള്‍ ചേര്‍ന്ന് നില്‍ക്കും,' അദ്ദേഹം പ്രസംഗത്തില്‍ ആരോപിച്ചു..

കഴിഞ്ഞ ദിവസം ലാലു പ്രസാദിന്റെ മകള്‍ രോഹിണി ആചാര്യ ബീഹാറിലെ സരണ്‍ ലോക്സഭാ സീറ്റില്‍ നാമനിര്‍ദേശ പത്രിക സമര്‍പ്പിച്ചിരുന്നു. പ്രസാദ്, അമ്മ റാബ്രി ദേവി, സഹോദരന്മാരായ തേജസ്വി യാദവ്, തേജ് പ്രതാപ് എന്നിവരും രോഹിണിക്കൊപ്പമുണ്ടായിരുന്നു.

കഴിഞ്ഞ ദിവസം മാധ്യമപ്രവര്‍ത്തകരോട് സംസാരിച്ച തേജസ്വി യാദവ് ബിജെപിയെ 'ബഡ്ക ഝൂത്ത പാര്‍ട്ടി' (നുണയന്മാരുടെ പാര്‍ട്ടി) എന്നാണ് വിശേഷിപ്പിച്ചത്. 2019ലെ ലോക്സഭാ തെരഞ്ഞെടുപ്പിനുള്ള പ്രചാരണത്തിനിടെ എന്‍ഡിഎ സര്‍ക്കാര്‍ നല്‍കിയ പ്രതിബദ്ധതകള്‍ പാലിക്കുന്നില്ലെന്നും അദ്ദേഹം കുറ്റപ്പെടുത്തി. തന്റെ സഹോദരിക്ക് മണ്ഡലത്തിലെ വോട്ടര്‍മാരില്‍ നിന്ന് പൂര്‍ണ്ണഹൃദയത്തോടെ പിന്തുണ ലഭിക്കുമെന്നും അദ്ദേഹം ആത്മവിശ്വാസം പ്രകടിപ്പിച്ചു. സരണിനൊപ്പം ബിഹാറിലെ 40 ലോക്സഭാ സീറ്റുകളിലും മഹാഗത്ബന്ധന്‍ വിജയിക്കുമെന്നും പ്രധാനമന്ത്രി നരേന്ദ്ര മോദി ഉള്‍പ്പെടെയുള്ള ബിജെപി നേതാക്കള്‍ക്ക് സംസ്ഥാനത്തെ എല്ലാ സീറ്റുകളും നഷ്ടപ്പെടുമെന്ന് നന്നായി അറിയാമെന്നും തേജസ്വി യാദവ് പറഞ്ഞു. .

'ബീഹാറിലെ ലോക്സഭാ തിരഞ്ഞെടുപ്പ് ഫലം ആശ്ചര്യപ്പെടുത്തുമെന്ന് ഞാന്‍ ആവര്‍ത്തിച്ച് പറഞ്ഞിട്ടുണ്ട്. അത് പൂര്‍ണ്ണമായും 'മഹാഗത്ബന്ധന്' അനുകൂലമായിരിക്കും. കഴിഞ്ഞ 10 വര്‍ഷത്തെ ബീഹാറിലെ എന്‍ഡിഎയുടെ പ്രവര്‍ത്തനത്തെക്കുറിച്ച് പ്രധാനമന്ത്രിക്ക് ഒന്നും പറയാനില്ലെന്നും അദ്ദേഹം ഉറപ്പിച്ചു പറഞ്ഞു.സരണ്‍ അഞ്ചാം ഘട്ടത്തില്‍ മെയ് 20 ന് വോട്ടെടുപ്പ് നടത്തും. ബീഹാറിലെ 40 ലോക്സഭാ സീറ്റുകളിലേക്കുള്ള ലോക്സഭാ തിരഞ്ഞെടുപ്പ് ഏപ്രില്‍ 19 നും ജൂണ്‍ 1 നും ഇടയില്‍ ഏഴ് ഘട്ടങ്ങളിലായി നടക്കും.