കെഎസ്ആര്‍ടിസിയില്‍ മദ്യപിച്ച് ജോലിക്കെത്തിയ നൂറോളം ജീവനക്കാര്‍ക്കെതിരെ കര്‍ശന നടപടി. 74 സ്ഥിരം ജീവനക്കാര്‍ക്ക് സസ്പെന്‍ഷനും 26 താല്‍ക്കാലിക ജീവനക്കാരെ ജോലിയില്‍ നിന്നും പിരിച്ചുവിടുകയും ചെയ്തു.

വനിതകളൊഴികെ ജീവനക്കാര്‍ മദ്യപിച്ചിട്ടല്ല ജോലിക്ക് ഹാജരാകുന്നത് എന്ന് ഉറപ്പുവരുത്തണമെന്ന് ഗതാഗത മന്ത്രി കെ.ബി ഗണേശ് കുമാര്‍ നിര്‍ദ്ദേശിച്ചിരുന്നു. തുടര്‍ന്ന് കെഎസ്ആര്‍ടിസിയുടെ 60 യൂണിറ്റുകളില്‍ നടത്തിയ പരിശോധനയിലാണ് ഡ്യൂട്ടിക്ക് മദ്യപിച്ച് ഹാജരാകുക, മദ്യം സൂക്ഷിക്കുന്ന തുടങ്ങി 100 കേസുകള്‍ റിപ്പോര്‍ട്ട് ചെയ്തത്.

കെഎസ്ആര്‍ടിസി വിജിലന്‍സ് വിഭാഗമാണ് പരിശോധന നടത്തിയത്. 60 യൂണിറ്റുകളില്‍ ഒരു സ്റ്റേഷന്‍ മാസ്റ്റര്‍, രണ്ട് വെഹിക്കിള്‍ സൂപ്പര്‍വൈസര്‍മാര്‍, ഒരു സെക്യൂരിറ്റി സര്‍ജന്റ്, ഒന്‍പത് മെക്കാനിക്കുകള്‍, 22 സ്ഥിരം കണ്ടക്ടര്‍മാര്‍, ഒന്‍പത് ബദലി കണ്ടക്ടര്‍മാര്‍, 39 സ്ഥിരം ഡ്രൈവര്‍മാര്‍, 10 ബദലി ഡ്രൈവര്‍മാര്‍, സ്വിഫ്റ്റിലെ അഞ്ച് ഡ്രൈവര്‍ കം കണ്ടക്ടര്‍ എന്നിവരാണ് മദ്യപിച്ച് ജോലിക്ക് ഹാജരായത്.

അപകടങ്ങള്‍ പതിവാകുന്നതും സര്‍വീസുകള്‍ താമസിക്കുന്നതും ജീവനക്കാരുടെ പിഴവാണെന്ന ആക്ഷേപം ഉയര്‍ന്നതോടെ പരിശോധന ശക്തമാക്കുകയായിരുന്നു. ഏപ്രില്‍ ഒന്നുമുതല്‍ 15 വരെ ദിവസങ്ങളിലായിരുന്നു വിജിലന്‍സ് പരിശോധന.