പാതിവേവിച്ച പായ്ക്കറ്റ് പെറോട്ടയ്ക്ക് ജി.എസ്.ടി അഞ്ച് ശതമാനം മാത്രമേ ഈടാക്കാവൂ എന്ന് ഹൈക്കോടതി. പായ്ക്കറ്റ് പെറോട്ടയ്ക്ക് 18 ശതമാനം ജി.എസ്.ടി.ചുമത്തിയ ഉത്തരവ് റദ്ദാക്കിയാണ് ജസ്റ്റിസ് ദിനേശ്കുമാര്‍ സിംഗിന്റെ ഉത്തരവ്. ഇടപ്പള്ളി മോഡേണ്‍ ഫുഡ് കമ്പനിയാണ് 18 ശതമാനം ജി.എസ്.ടി.

ഈടാക്കാനുള്ള തീരുമാനത്തിനെതിരേ ഹൈക്കോടതിയെ സമീപിച്ചത്. ഹര്‍ജിക്കാരുടെ പൊറോട്ട ഉത്പന്നങ്ങള്‍ക്ക് ജി.എസ്.ടി ആക്ട് പ്രകാരം 18 ശതമാനം നികുതി ബാധകമാകുമെന്നായിരുന്നു സര്‍ക്കാര്‍ നിലപാട്. ഇത് തര്‍ക്ക പരിഹാര അപ്പലേറ്റ് അതോറിറ്റി ശരിവെയ്ക്കുകയും ചെയ്തു. തുടര്‍ന്നാണ് ഹര്‍ജിക്കാര്‍ ഹൈക്കോടതിയെ സമീപിച്ചത്.

പൊറോട്ട, ബ്രെഡിന്റെ ഗണത്തില്‍പ്പെടുന്ന ഉത്പന്നമാണെന്നും അതിനാല്‍ അഞ്ച് ശതമാനം ജി.എസ്.ടിയേ ബാധകമാകൂ എന്നായിരുന്നു ഹര്‍ജിക്കാരുടെ വാദം. ബ്രെഡ് പോലെ ധാന്യപ്പൊടിയില്‍ നിന്നാണ് പൊറോട്ടയും ചുട്ടെടുക്കുന്നതെന്നും കമ്പനി വ്യക്തമാക്കി.

എന്നാല്‍ പൊറോട്ടയും ബ്രെഡും രണ്ടാണെന്ന് സര്‍ക്കാര്‍ വാദിച്ചു. ഈ വാദം തള്ളിയ സിംഗിള്‍ ബെഞ്ച്, പെറോട്ടോയും ചപ്പാത്തിയുമൊക്കെ സമാനമായി തയ്യാറാക്കുന്നതാണെന്ന് വിലയിരുത്തി. 18 ശതമാനം ജി.എസ്.ടി ഈടാക്കാനുള്ള സര്‍ക്കാര്‍ തീരുമാനം തിരുത്തുകയും ചെയ്തു.