ആദ്യം സന്തോഷം പിന്നെ... ഗള്ഫിലെ മഴ ആദ്യം സന്തോഷം നല്കിയെങ്കിലും മഴ കനത്തതോടെ ദുരിതങ്ങള് ബാക്കി; ദുബൈയില് മഴ തുടരുന്നു, വിമാനങ്ങള് റദ്ദാക്കി; കൊച്ചി നെടുമ്പാശ്ശേരി വിമാനത്താവളത്തില് നിന്നുളള വിമാനങ്ങള് ഇന്നും റദ്ദാക്കി
ഗള്ഫിലെ മണലാണ്യ ഭൂമിയിലെ മഴ ആദ്യം പ്രവാസികള്ക്കുള്പ്പെടെ കൗതുകമായെങ്കിലും പിന്നെ ദുരിതമായി. ദുബൈയില് മഴ തുടരുന്നതിനിടെ കൊച്ചി നെടുമ്പാശ്ശേരി വിമാനത്താവളത്തില് നിന്നുളള വിമാനങ്ങള് ഇന്നും റദ്ദാക്കി. ബുധനാഴ്ച രാത്രി 10.20 ന് കൊച്ചിയില് നിന്നും ദുബൈക്ക് പോകേണ്ടിയിരുന്ന സ്പൈസ് ജെറ്റ് വിമാനം പുറപ്പെട്ടില്ല. ഇന്ന് ഉച്ചക്ക് 12-15 ന് പുറപ്പെടുമെന്നാണ് അധികൃതരുടെ വിശദീകരണം.
രാവിലെ 10.30 ന് ദുബൈക്ക് പുറപ്പെടേണ്ട എമിറേറ്റ് വിമാനം ഉച്ചക്ക് 12.30 ന് പുറപ്പെടുകയുള്ളൂവെന്ന് അധികൃതര് അറിയിച്ചു. വൈകിട്ട് 5.05 ന് ദുബൈയില് നിന്നെത്തേണ്ട ഇന്ഡിഗോ വിമാനവും പുലര്ച്ചെ 2.45 ന് എത്തേണ്ട ഇന്ഡിഗോയുടെ ദോഹ വിമാനവും റദ്ദാക്കി. പുലര്ച്ചെ 3.15 ന് എത്തേണ്ടിയിരുന്ന എയര് അറേബ്യയുടെ ഷാര്ജ വിമാനവും റദ്ദാക്കി.
യാത്രക്കാരുടെ ചെക്ക് ഇന് നടപടികള് നിര്ത്തിവെച്ച നടപടി എമിറേറ്റ്സ് എയര്ലൈന്സ് ഇന്ന് രാവിലെ 9 വരെ നീട്ടിയിട്ടുണ്ട്. ദുബായ് എയര്പോര്ട്ട് ടെര്മിനല് വണ്ണിലേക്കുള്ള പ്രവേശനം യാത്ര ഉറപ്പായ യാത്രക്കാര്ക്ക് മാത്രമായി നിയന്ത്രണമേര്പ്പെടുത്തി. എയര്പോര്ട്ടുകളില് കുടുങ്ങിയ യാത്രക്കാരില് ഭൂരിഭാഗവും ദുരിതത്തിലാണ്.
യുഎഇയില് കനത്ത മഴ തുടരുന്ന സാഹചര്യത്തില് ഇന്ന് കരിപ്പൂരില് നിന്നുള്ള രണ്ട് വിമാന സര്വീസുകളും റദ്ദാക്കി. രാത്രി 7.25ന് പോകേണ്ട കോഴിക്കോട്-ഷാര്ജ എയര് ഇന്ത്യ എക്സ്പ്രസ്സ് വിമാനവും, രാത്രി 8ന് പോകേണ്ട കോഴിക്കോട്- ദുബായ് വിമാനവും ആണ് റദ്ദ് ചെയ്തത്.
നേരത്തെ തിരുവനന്തപുരത്ത് നിന്ന് യുഎഇയിലേക്ക് പോകുന്ന നാല് വിമാനങ്ങളുടെ സര്വീസും റദ്ദാക്കിയിരുന്നു. ദുബായിലേക്കുള്ള എിറേറ്റ്സ്, എയര് ഇന്ത്യ എക്സ്പ്രസ് വിമാനങ്ങളും ഷാര്ഡയിലേക്കുള്ള ഇന്ഡിഗോ, എയര് അറേബ്യ വിമാനങ്ങളുമാണ് റദ്ദാക്കിയത്.
നെടുമ്പാശ്ശേരി വിമാനത്താവളത്തില് നിന്നുള്ള വിമാന സര്വീസുകളും ഇതിന് മുമ്പായി റദ്ദാക്കിയിരുന്നു. ദുബായിലേക്കുള്ള മൂന്ന് വിമാനങ്ങളും, ഷാര്ജയിലേക്കും ദോഹയിലേക്കുമുള്ള ഓരോ വിമാനവുമാണ് യാത്ര റദ്ദാക്കിയിരുന്നത്.
വിമാന സര്വീസുകള് റദ്ദാക്കുന്നത് സംബന്ധിച്ച് യാത്രക്കാര്ക്ക് മുന്നറിയിപ്പ് നല്കുന്നുണ്ടെങ്കിലും വലിയ പ്രതിസന്ധിയാണ് ഈ ദിവസങ്ങളില് യുഎഇയിലേക്ക് മടങ്ങാനിരുന്ന പ്രവാസികള് അടക്കമുള്ളവര് നേരിടുന്നത്. യുഎഇയില് മഴയും പ്രതികൂലമായ കാലാവസ്ഥയും തുടരുന്ന സാഹചര്യത്തിലാണ് അപ്രതീക്ഷിതമായ ഈ തിരിച്ചടി.
യുഎഇയില് കനത്ത മഴ തുടരുന്ന സാഹചര്യത്തില് സ്കൂളുകള്ക്ക് രണ്ട് ദിവസം കൂടി അവധി നീട്ടി. രാജ്യത്തെ എല്ലാ സര്ക്കാര് സ്കൂളുകള്ക്കും രണ്ട് ദിവസത്തേക്ക് അവധിയായിരിക്കുമെന്ന് എമിറേറ്റ്സ് സ്കൂള് എജ്യുക്കേഷന് ഫൗണ്ടേഷന് അറിയിച്ചു.
ഇതിന് പിന്നാലെ ദുബൈയിലെ സ്വകാര്യ വിദ്യാഭ്യാസ സ്ഥാപനങ്ങള്ക്കും ഏപ്രില് 18, 19 തീയതികളില് അവധി ആയിരിക്കുമെന്നും വിദൂര പഠനം തുടരുമെന്നും എമിറേറ്റിലെ നോളജ് ആന്ഡ് ഹ്യൂമന് ഡവലപ്മെന്റ് അതോറിറ്റി അറിയിച്ചു. ദുബൈയിലെ സ്വകാര്യ സ്കൂളുകള്, നഴ്സറികള്, യൂണിവേഴ്സിറ്റികള് എന്നിവിടങ്ങളില് രണ്ട് ദിവസം കൂടി വിദൂര പഠനം തുടരും. ഷാര്ജയിലും സ്വകാര്യ സ്കൂളുകള്ക്ക് വിദൂര പഠനം നീട്ടിയിട്ടുണ്ട്. ഏപ്രില് 18നും വിദ്യാര്ത്ഥികള്ക്ക് വിദൂര പഠനം ആയിരിക്കുമെന്ന് സര്ക്കാര് അധികൃതര് വ്യക്തമാക്കിയിട്ടുണ്ട്. ഷാര്ജ പ്രൈവറ്റ് എജ്യൂക്കേഷന് അതോറിറ്റിയുമായി സഹകരിച്ച് എമര്ജന്സി, ക്രൈസിസ് ആന്ഡ് ഡിസാസ്റ്റര് മാനേജ്മെന്റ് സംഘമാണ് പ്രഖ്യാപനം നടത്തിയത്.
യുഎഇയില് റെക്കോര്ഡ് മഴയാണ് ലഭിച്ചത്. 75 വര്ഷത്തിനിടയിലെ ഏറ്റവും ഉയര്ന്ന മഴയാണ് രാജ്യത്ത് തിങ്കളാഴ്ച മുതല് ചൊവ്വ രാത്രി വരെ ലഭിച്ചത്. ഏറ്റവും കൂടുതല് മഴ ലഭിച്ചത് അല് ഐനിലെ ഖതം അല് ഷക്ല പ്രദേശത്താണ്. 24 മണിക്കൂറിനുള്ളില് 254.8 മില്ലിമീറ്റര് മഴയാണ് ഇവിടെ ലഭിച്ചതെന്ന് നാഷണല് സെന്റര് ഓഫ് മെറ്റീരിയോളജി അറിയിച്ചു.
2016 മാര്ച്ച് ഒമ്പതിന് ഷുവൈബ് സ്റ്റേഷനില് 287.6 മില്ലിമീറ്റര് മഴ രേഖപ്പെടുത്തിയതായും സെന്റര് അറിയിച്ചു. അതിശക്തമായ മഴയാണ് യുഎഇയില് കഴിഞ്ഞ മണിക്കൂറുകളില് ലഭിച്ചത്. തിങ്കള് മുതല് ഏപ്രില് 16 ചൊവ്വാഴ്ച രാത്രി 9 മണി വരെ 24 മണിക്കൂറില് ലഭിച്ചത് ഏറ്റവും ഉയര്ന്ന മഴയാണ്.
https://www.facebook.com/Malayalivartha