ദുര്ബലമെങ്കിലും പണി പാളി... കെഎസ്ആര്ടിസി ബസ് തടഞ്ഞു നിര്ത്തിയെന്ന പരാതിയില് മേയര് ആര്യ രാജേന്ദ്രനും ഭര്ത്താവ് കെ.എം.സച്ചിന്ദേവ് എംഎല്എയ്ക്കുമെതിരെ ഒടുവില് കേസ്; മേയറും എംഎല്എയും ഉള്പ്പെടെ അഞ്ചു പ്രതികള്; ചുമത്തിയിരിക്കുന്നത് ജാമ്യം ലഭിക്കാവുന്ന വകുപ്പുകള്
മേയറും എംഎല്എയും കെഎസ്ആര്ടിസി ബസ് ഡ്രൈവറും തമ്മിലുള്ള തര്ക്കത്തില് അവസാനം നിയമം നിയമത്തിന്റെ വഴിയില്. കെഎസ്ആര്ടിസി ബസ് തടഞ്ഞുനിര്ത്തി ഡ്രൈവറുമായി വാക്കേറ്റമുണ്ടായ സംഭവത്തില് മേയര് ആര്യ രാജേന്ദ്രനും ഭര്ത്താവ് കെ.എം.സച്ചിന്ദേവ് എംഎല്എയ്ക്കുമെതിരെ ഒടുവില് കേസ്. കോടതി നിര്ദേശ പ്രകാരമാണ് കന്റോണ്മെന്റ് പൊലീസ് കേസെടുത്തത്.
മേയറും എംഎല്എയും ഉള്പ്പെടെ അഞ്ചു പ്രതികളാണുള്ളത്. ഗതാഗതം തടസപ്പെടുത്തിയതിന് ജാമ്യം ലഭിക്കാവുന്ന വകുപ്പുകളാണ് ചുമത്തിയിരിക്കുന്നത്. ബസ് ഡ്രൈവര് എല്.എച്ച്.യദു പരാതി നല്കിയെങ്കിലും കേസെടുക്കാന് പൊലീസ് തയാറായിരുന്നില്ല.
യദുവിന്റെ പരാതിയില് കന്റോണ്മെന്റ് പൊലീസ് അന്വേഷണം തുടങ്ങിയിരുന്നു. എന്നാല്, പ്രാഥമികാന്വേഷണ റിപ്പോര്ട്ട് (എഫ്ഐആര്) റജിസ്റ്റര് ചെയ്തിട്ടില്ല. യദു സിറ്റി പൊലീസ് കമ്മിഷണര്ക്കു നിവേദനം നല്കിയതിനെത്തുടര്ന്നാണ് അന്വേഷണം തുടങ്ങിയത്. യദുവിന്റെ പരാതിയില് മനുഷ്യാവകാശ കമ്മിഷനും കേസെടുത്തു.
അതേസമയം കേസിലെ നിര്ണായക തെളിവായ, ബസിലെ സിസിടിവി ക്യാമറാ ദൃശ്യങ്ങള് സൂക്ഷിച്ചിരുന്ന മെമ്മറി കാര്ഡ് നഷ്ടമായതുമായി ബന്ധപ്പെട്ട് തമ്പാനൂര് പൊലീസ് കേസെടുത്തു. മന്ത്രി കെ.ബി.ഗണേഷ് കുമാറിന്റെ നിര്ദേശപ്രകാരം കെഎസ്ആര്ടിസി ജനറല് കണ്ട്രോളിങ് ഇന്സ്പെക്ടറാണ് പരാതി നല്കിയത്. ഏപ്രില് 27 ന് രാത്രി പത്തരയോടെ പാളയം സാഫല്യം കോംപ്ലക്സിനു സമീപം മേയറും എംഎല്എയും ബന്ധുക്കളും സഞ്ചരിച്ച കാര് സീബ്ര ലൈനില് കുറുകെയിട്ടു ബസ് തടഞ്ഞതാണു വിവാദമായത്.
കെഎസ്ആര്ടിസി ബസ് തടഞ്ഞ സംഭവത്തില് മേയര് ആര്യാ രാജേന്ദ്രനും ഭര്ത്താവ് സച്ചിന് ദേവ് എംഎല്എക്കുമെതിരെ കോടതി ഇടപെടലിനെ തുടര്ന്ന് കേസെടുക്കേണ്ടി വന്നത് വലിയ തിരിച്ചടിയാണ് ഉണ്ടായത്. സംഭവം നടന്ന് എട്ടാംദിവസം കേസെടുത്തത് കോടതി ഇടപെടലിനെ തുടര്ന്നാണ്.
മേയറും കുടുംബവും കുറ്റം ചെയ്ത ഡ്രൈവറെ പൊലീസിന് കൈമാറുക മാത്രമാണ് ചെയ്തതെന്നാണ് പൊലീസ് തുടക്കം മുതല് ഉയര്ത്തിയ വാദം. കൂടുതല് തെളിവുകള് പുറത്തുവന്നിട്ടും പൊലീസ് മേയര്ക്കെതിരെ കേസെടുത്തിരുന്നില്ല. ഇതിനു പിന്നാലെ കമ്മീഷണര്ക്കും ഡ്രൈവര് യദു പരാതി നല്കിയിരുന്നു. ഇതും പരിഗണിക്കാന് പൊലീസ് തയാറായില്ല. ഇതിനു പിന്നാലെയാണ് പൊലീസിന് തിരച്ചടിയായി സംഭവം നടന്ന് എട്ടു ദിവസത്തിനു ശേഷം കോടതി നിര്ദേശ പ്രകാരം കേസെടുക്കേണ്ടി വന്നത്.
എന്നാല്, ദുര്ബല വകുപ്പുകള് ചുമത്തിയാണ് മേയര്, എംല്എല്എ, കാറിലുണ്ടായിരുന്ന മറ്റു മൂന്നുപേര്ക്കുമെതിരെ കേസെടുത്തത്. മേയറും കുടുംബവും ഒരു തെറ്റും ചെയ്തില്ലെന്നായിരുന്നു തുടക്കം മുതല് സിപിഎം സംസ്ഥാന സെക്രട്ടറി ഉള്പ്പെടെ പറഞ്ഞിരുന്നത്. കേസെടുത്തതോടെ പാര്ട്ടി നേതൃത്വവും ഇപ്പോള് വെട്ടിലായിരിക്കുകയാണ്. ജാമ്യം ലഭിക്കാവുന്ന വകുപ്പ് ചുമത്തിയതിനാല് അടുത്ത ദിവസം തന്നെ മേയറും എംഎല്എയും കോടതിയെ സമീപിക്കാനും സാധ്യതയുണ്ട്.
മേയര് ആര്യാ രാജേന്ദ്രനും ഭര്ത്താവ് സച്ചിന് ദേവ് എം.എല്.എയ്ക്കുമെതിരെ കഴിഞ്ഞ ദിവസം കെ.എസ്.ആര്.ടി.സി ഡ്രൈവര് എച്ച്.എല് യദു ഹര്ജി സമര്പ്പിച്ചിരുന്നു. തിരുവനന്തപുരം ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് അദ്ദേഹം ഹര്ജി സമര്പ്പിച്ചത്. ഹര്ജി കോടതി ഫയലില് സ്വീകരിച്ചു. തിരുവനന്തപുരം മജിസ്ട്രേറ്റ് കോടതി കേസ് ഈ മാസം ആറിന് പരിഗണിക്കും.
മേയറുടെ പരാതിയില് ഡ്രൈവര്ക്കെതിരെ മാത്രമാണ് കേസെടുത്തത്. കേസെടുക്കാന് പോലീസ് മടിച്ച സാഹചര്യത്തിലാണ് ഡ്രൈവര് യദു മജിസ്ട്രേറ്റ് കോടതിയെ സമീപിച്ചത്. സീബ്രാ ലൈനില് കാറിട്ട് ബസ് തടഞ്ഞ് കൃത്യനിര്വ്വഹണം തടസ്സപ്പെടുത്തിയെന്നാണ് യദുവിന്റെ പരാതി. സച്ചിന് ദേവ് എംഎല്എ ബസില് അതിക്രമിച്ച് കയറി ഭീഷണിപ്പെടുത്തിയെന്നും യദുവിന്റെ പരാതിയില് പറയുന്നു.
തുടര്ന്ന്, പരാതിയില് പറയുന്ന കാര്യങ്ങളൊന്നും കണ്ടില്ലെന്ന കണ്ടക്ടര് സുബിന്റെ വാദത്തിനെതിരേ യദു രൂക്ഷമായി പ്രതികരിച്ചു. സംഭവം നടക്കുമ്പോള് പിന്നിലെ സീറ്റിലായിരുന്നു എന്ന കണ്ടക്ടറുടെ മൊഴി പച്ചക്കള്ളമാണ്. എന്തിന് വേണ്ടിയാണ് കണ്ടക്ടര് അത്തരമൊരു മൊഴി പോലീസിന് നല്കിയതെന്ന് അറിയില്ലെന്നും യദു പ്രതികരിച്ചു.
https://www.facebook.com/Malayalivartha