വീട് പണി തടസപ്പെടുത്തി ചെങ്കൊടി കുത്തി വലിച്ച് പിഴുതെറിഞ്ഞ് പെണ്ണുങ്ങള്‍;കൊടിമരത്തില് അള്ളിപ്പിടിച്ച് കിടന്ന സിപിഎമ്മുകാരനെ ചേച്ചിമാര്‍ എടുത്ത് പഞ്ഞിക്കിട്ടു,പാര്‍ട്ടിക്കാരായിരുന്ന കുടുംബം കൂട്ടത്തോടെ ബിജെപിയില്‍ ചേര്‍ന്നു,ചേര്‍ത്തല മരുത്തൂര്‍വട്ടത്ത് നടന്നത് നാടകീയ രംഗങ്ങള്‍,വീഡിയോ വൈറലായതോടെ സിപിഎം എയറില്‍
പെണ്ണുങ്ങള്‍ ചെങ്കൊടി പറിച്ചെടുത്ത് തോട്ടിലെറിഞ്ഞ് തുടങ്ങി സഖാക്കളെ. സിപിഎം മെമ്പറെ ചേച്ചിമാരെല്ലാം ചേര്‍ന്ന് പഞ്ഞിക്കിട്ടൊരു വീഡിയോ ആണ് ഇപ്പോള്‍ വൈറലായിക്കൊണ്ടിരിക്കുന്നത്. വീട്ടിലേക്കുള്ള വഴി മുടക്കി സിപിഎം സ്ഥാപിച്ച കൊടിമരം ശരണം കെട്ട് ഒരുസംഘം വനിതകള്‍ പിഴുതെറിഞ്ഞത്. വനിതകളുടെ ശ്രമത്തെ ചെറുക്കാന്‍ സിപിഎം വാര്‍ഡ് കൗണ്‍സിലര്‍ കൊടിമരത്തെ കെട്ടിപ്പിടിച്ച് നില്‍ക്കുന്ന വീഡിയോ സമൂഹ മാധ്യമങ്ങളില്‍ വൈറലാണ്. ചേര്‍ത്തല മരുത്തൂര്‍വട്ടം സ്വദേശി അഞ്ജലിയും കുടുംബവും മാസങ്ങളായി മാറി മാറി ഓഫീസുകള്‍ കയറിയിറങ്ങിയിട്ടും ഫലമില്ലാതെ വന്നതോടെയാണ് കടുംകൈക്ക് മുതിര്‍ന്നത്. ഇതിന് പിന്നാലെ സിപിഎം അനുഭാവികള്‍ ആയിരുന്ന കുടുംബവും ബന്ധുക്കളും അടക്കം 136 പേര്‍ സിപിഎം ഉപേക്ഷിച്ച് ബിജെപിയില്‍ ചേര്‍ന്നു. അഞ്ജലിയുടെ അമ്മാവന്‍ ചേര്‍ത്തല വെളിങ്ങാട്ട്ചിറ പുരുഷോത്തമനും കുടുംബവും, ബന്ധുക്കളും അടക്കമുള്ളവരാണ് ബിജെപിയില്‍ ചേര്‍ന്നത്.
പൊലീസില്‍ പരാതിപ്പെട്ടിട്ടും കാര്യമായ ഫലമുണ്ടായിരുന്നില്ല. വീടിന്റെ നിര്‍മ്മാണ പ്രവര്‍ത്തനങ്ങള്‍ കൂടി മുടങ്ങിയതോടെ, അഞ്ജലിയും ബന്ധുക്കളായ സ്തീകളും ചേര്‍ന്ന് കൊടിമരം പിഴുത് മാറ്റുകയായിരുന്നു. എട്ട് മാസമായി വാര്‍ഡ് മെമ്പറുടെ ഈഗോ പ്രശ്‌നം മൂലം ഒരേ പാര്‍ട്ടി ആയിരുന്നിട്ടു പോലും വഴിക്കു കുറുകെ ഇട്ടിരുന്ന കൊടി മാറ്റുവാന്‍ സാധിക്കാതെ വന്നപ്പോള്‍ സ്ത്രീകള്‍ മുന്‍ കൈ എടുക്കുകയായിരുന്നു.
പുന്നപ്രവയലാര്‍ രക്തസാക്ഷി വാര്‍ഷികാചരണത്തോട് അനുബന്ധിച്ചാണ് വീടിന് മുമ്പില്‍ വഴിയോട് ചേര്‍ന്ന് കൊടിമരം സ്ഥാപിച്ചത്. വീടിന്റെ പുനര്‍നിര്‍മ്മാണത്തിനായി കൊടിമരം വശത്തേക്ക് മാറ്റി സ്ഥാപിക്കണമെന്ന് ആവശ്യപ്പെട്ടെങ്കിലും, അത് നിരസിച്ചെന്ന് വീട്ടമ്മയായ അഞ്ജലി പറഞ്ഞു. വീടിന്റെ ഗെയ്റ്റ് ഇറങ്ങുമ്പോള്‍, നേരേ നടുവിലായിട്ടാണ് കൊടിമരം. അതുകൊണ്ട് തന്നെ വീട്ടിലേക്ക് സാധനങ്ങള്‍ കൊണ്ടുവരാന്‍ കഴിഞ്ഞില്ല. കല്ല് അടക്കം സാധനങ്ങള്‍ കൊണ്ടുവരും മുമ്പ് തന്നെ കൊടിമരം മാറ്റി തരണമെന്ന് സിപിഎം നേതാക്കളോട് ആവശ്യപ്പെട്ടിരുന്നു. ചേര്‍ത്തല മുന്‍സിപ്പാലിറ്റി 15 ാം വാര്‍ഡ് വാര്‍ഡ് കൗണ്‍സിലര്‍ അനൂപ് ചാക്കോയെ സമീപിച്ചപ്പോള്‍ താനറിഞ്ഞുകൊണ്ടല്ല ഇതെന്നും ബ്രാഞ്ച് സെക്രട്ടറിയെ വിളിക്കാനും പറഞ്ഞു. സിപിഎം ജില്ലാ സെക്രട്ടറി അടക്കം പല നേതാക്കളെയും കണ്ടപ്പോഴും, വാശിപ്പുറത്തുള്ള കാര്യമാണെന്നാണ് പറഞ്ഞത്. ഇതേ തുടര്‍ന്നാണ് അഞ്ജലിയുടെ മാമന്‍ പുരുഷോത്തമന്‍ ആത്മഹത്യാ ഭീഷണി മുഴക്കിയത്. ഇത് വലിയ വാര്‍ത്തയായിരുന്നു.
തങ്ങള്‍ തന്നെ കൊടിമരം മാറ്റുമെന്നും തിരഞ്ഞെടുപ്പ് കഴിയട്ടെ എന്നും ഉള്ള നിലപാടാണ് സിപിഎം നേതാക്കള്‍ സ്വീകരിച്ചത്. പിന്നീട് അഞ്ജലിയും കുടുംബവും, സിപിഎം നേതാക്കളെ സമീപിച്ചില്ല. തിരഞ്ഞെടുപ്പ് കഴിഞ്ഞിട്ടും കൊടിമരം മാറ്റാതെ വന്നതോടെ, സ്ത്രീകള്‍ മുന്‍കൈയെടുത്ത് മാറ്റി ഒരുവശത്തേക്ക് മാറ്റി സ്ഥാപിച്ചു. കൊടിമരം പൊളിക്കുന്നത് തടയാന്‍ സിപിഎം വാര്‍ഡ് കൗണ്‍സിലര്‍ എത്തിയതോടെ സംഘര്‍ഷാവസ്ഥയുണ്ടായിരുന്നു. എട്ടുമാസത്തോളം പരാതി നല്‍കി കാത്തിരുന്നിട്ടും ഫലമുണ്ടാകാതെ വന്നതോടെ ഞായറാഴ്ചയാണ് കൊടിമരം നീക്കിയത്. എന്നാല്‍, കൊടിമരം നശിപ്പിക്കുകയുണ്ടായില്ല.
കൊടിമരം മാറ്റിയാല്‍ തങ്ങള്‍ക്ക് നാണക്കേടാകും എന്ന ഈഗോയായിരുന്നു സിപിഎം വാര്‍ഡ് കൗണ്‍സിലര്‍ക്കെന്നും, എന്നാല്‍, തങ്ങള്‍ക്ക് പ്രധാനം വീടുപണി നടക്കുക എന്നതായിരുന്നുവെന്നും അഞ്ജലി പറഞ്ഞു. പുന്നപ്രവയലാര്‍ സമര വാര്‍ഷികാചരണത്തിന്റെ ഭാഗമായി പുരുഷോത്തമന്റെ വീട്ടിലേക്കുള്ള വഴിയില്‍ താല്‍ക്കാലികമായി സ്ഥാപിച്ച കൊടിമരം മാറ്റണമെന്ന ആവശ്യം ഉന്നയിച്ചപ്പോള്‍ കൊടിമരം കോണ്‍ക്രീറ്റ് ഇട്ട് സ്ഥിരമാക്കി. കൊടിമരം സ്ഥാപിക്കുന്നതിന് മുന്‍പ് വീടിന്റെ അടിത്തറ കെട്ടിത്തുടങ്ങിയിരുന്നു.
കൊടിമരം പ്രശ്‌നത്തില്‍ വേണ്ട രീതിയില്‍ ഇടപെടാതെ വന്നതോടെ 53 വര്‍ഷമായി സിപിഎം അനുഭാവികള്‍ ആയിരുന്ന ഈ കുടുംബവും ബന്ധുക്കളും അടക്കം 136 പേര്‍ പാര്‍ട്ടി ബന്ധം ഉപേക്ഷിച്ച് ബിജെപിയില്‍ ചേരുകയായിരുന്നു.ചേര്‍ത്തല പൊലിസിന്റെ സാന്നിധ്യത്തില്‍ ഒത്തുതീര്‍പ്പു ചര്‍ച്ചകള്‍ നടത്തിയാണ് കൊടിമരം വഴിയരികിലേക്ക് നീക്കിയത്. വീട്ടുകാരുടെ ആവശ്യപ്രകാരം കൊടിമരം ഒരുഭാഗത്തേക്ക് നീക്കി സൗകര്യം ചെയ്തുകൊടുക്കാമായിരുന്നിട്ടും, ദുര്‍വാശി കാട്ടി വെറുപ്പിക്കുകയായിരുന്നു വാര്‍ഡ് കൗണ്‍സിലര്‍ അനൂപ് ചാക്കോ അടക്കമുള്ളവര്‍. നിസ്സാരമായി പരിഹരിക്കാമായിരുന്ന പ്രശ്‌നം വഷളാക്കിയതിന്റെ ഉത്തരവാദിത്വം സിപിഎമ്മിന് തന്നെയെന്നാണ് കുടുംബം ആരോപിക്കുന്നത്.
https://www.facebook.com/Malayalivartha
