അതല്പം കൂടിപ്പോയി... ലോക്സഭാ തെരഞ്ഞെടുപ്പില് തൃശൂരില് ഇടതുമുന്നണിയുടെ തോല്വിയില് ക്രൈസ്തവ സഭകളെ വിമര്ശിച്ച് സിപിഎം ജില്ലാ കമ്മിറ്റി; തൃശൂരില് ക്രൈസ്തവ സഭകള് ബിജെപിയെ പിന്തുണച്ചത് വിദേശ ഫണ്ടിന് വേണ്ടിയെന്ന് സിപിഎം ജില്ലാ കമ്മിറ്റി
തൃശൂരിലെ സുരേഷ് ഗോപിയുടെ വിജയം ഏവരേയും അമ്പരപ്പിക്കുന്നതാണ്. ബിജെപി കേരളത്തില് അക്കൗണ്ട് തുറക്കില്ലെന്ന് ബെറ്റ് വച്ചവരെല്ലാം തോറ്റുപോയി. ഇപ്പോഴിതാ കാരണം കണ്ടെത്തുകയാണ് പാര്ട്ടികള്. ലോക്സഭാ തെരഞ്ഞെടുപ്പില് തൃശൂരില് ഇടതുമുന്നണിയുടെ തോല്വിയില് ക്രൈസ്തവ സഭകളെ വിമര്ശിച്ച് സിപിഎം ജില്ലാ കമ്മിറ്റി.
ക്രൈസ്തവ സഭകള് ബിജെപിയെ പിന്തുണച്ചത് വിദേശ ഫണ്ടിന് വേണ്ടിയാണെന്ന് ജില്ലാ കമ്മിറ്റി വിമര്ശിച്ചു. വിദേശ ഫണ്ട് സ്വീകരിക്കുന്നതിലുള്ള വിലക്ക് നീക്കാമെന്ന് ധാരണയുണ്ടാക്കിയെന്നും വിലക്ക് പിന്വലിക്കുന്നതിനുവേണ്ടി തൃശൂര് സീറ്റ് ബിജെപിക്ക് നല്കുകയായിരുന്നുവെന്ന് ജില്ലാ കമ്മിറ്റി ആരോപിച്ചു. ന്യൂനപക്ഷ വിഭാഗങ്ങളെ വേട്ടയാടുന്നത് എതിര്ക്കുന്ന ഒരു വിഭാഗത്തിന്റെ വോട്ട് യുഡിഎഫിലേക്ക് പോയെന്നും വിലയിരുത്തി.
എല്ഡിഎഫിനെ തീര്ത്തും കൈയൊഴിയുന്ന സമീപനമാണ് ക്രൈസ്തവ സഭകളുടെ ഭാഗത്ത് നിന്ന് ഉണ്ടായതെന്നും മുസ്ലിം ന്യൂനപക്ഷ വോട്ടുകള് എല്ഡിഎഫിന് അനുകൂലമായില്ലെന്നും വിലയിരുത്തി. മണിപ്പൂര് ഉള്പ്പെടെയുള്ള വിഷയങ്ങള് തൃശൂരില് ഏശിയില്ല. കേന്ദ്രത്തില് ഇടതുപക്ഷ എം.പി എത്തിയത് കൊണ്ട് വലിയ കാര്യമില്ലെന്ന പൊതുബോധം മുസ്ലിം ന്യൂനപക്ഷ വോട്ടുകളില് ഉണ്ടായി. അത് യുഡിഎഫിന് അനുകൂലമായി. ഇതുകൊണ്ടാണ് ഗുരുവായൂര് മണ്ഡലത്തില് കെ. മുരളീധരന് ഒന്നാമതെത്തിയതെന്ന് ജില്ലാ കമ്മിറ്റി യോഗത്തില് വിലയിരുത്തലുണ്ടായി. വിദേശ ഫണ്ട് സ്വീകരിക്കുന്നതില് ക്രൈസ്തവ സഭകള്ക്ക് കേന്ദ്ര സര്ക്കാര് വിലക്കേര്പ്പെടുത്തിയിരുന്നു.
അതേസമയം പതിനെട്ടാം ലോക്സഭയുടെ ആദ്യ സമ്മേളനം ഇന്ന് തുടങ്ങും. കേരളത്തിലെ പതിനെട്ട് പേര് ഇന്ന് ലോക്സഭാംഗങ്ങളായി സത്യപ്രതിജ്ഞ ചെയ്യും. വിദേശ സന്ദര്ശനം നടത്തുന്നതിനാല് തിരുവനന്തപുരം എംപി ശശി തരൂര് ഈ ആഴ്ച അവസാനമാകും സത്യപ്രതിജ്ഞ ചെയ്യുക. വയനാട് മണ്ഡലം ഒഴിഞ്ഞ രാഹുല് ഗാന്ധി റായ്ബറേലിയില് നിന്നുള്ള എംപിയായിട്ടായിരിക്കും സത്യപ്രതിജ്ഞ ചെയ്യുക. രാവിലെ 11 മണിക്ക് പ്രധാനമന്ത്രി നരേന്ദ്രമോദിയും പിന്നാലെ കേന്ദ്രമന്ത്രിമാരും സത്യപ്രതിജ്ഞ ചെയ്യും.
വൈകിട്ട് നാല് മണിയോടെയാകും കേരളത്തില് നിന്നുള്ള എംപിമാരുടെ സത്യപ്രതിജ്ഞ. അതേസമയം പ്രോടേം സ്പീക്കര് പദവിയില് നിന്ന് കൊടിക്കുന്നില് സുരേഷിനെ ഒഴിവാക്കിയതിനാല് അധ്യക്ഷനെ സഹായിക്കുന്ന പാനലില് നിന്ന് വിട്ടു നില്ക്കാന് ഇന്ത്യ സഖ്യം രാവിലെ തീരുമാനം എടുക്കും. ഡിഎംകെയുടെ കൂടെ അഭിപ്രായം തേടിയ ശേഷമായിരിക്കും ഇക്കാര്യത്തില് അന്തിമതീരുമാനം എടുക്കുക. രാവിലെ പത്ത് മണിക്ക് പാര്ലമെന്റിന്റെ വളപ്പില് എത്താന് കോണ്ഗ്രസ് എംപിമാര്ക്ക് പാര്ട്ടി നിര്ദേശം നല്കിയിട്ടുണ്ട്. എംപിമാര് ഒന്നിച്ചാകും സഭയിലേക്ക് നീങ്ങുക.
ഭരണം നേടാന് കഴിയാതെ പോയ പ്രതിപക്ഷം പക്ഷെ ശക്തരായാണ് ഇത്തവണ പാര്ലമെന്റില് തിരിച്ചെത്തിയിരിക്കുന്നത്. നാളെ തുടങ്ങുന്ന ലോക്സഭ സമ്മേളനത്തിന്റെ ആദ്യ രണ്ട് ദിവസം അംഗങ്ങളുടെ സത്യപ്രതിജ്ഞയാണ് നടക്കുക.തുടക്കം തന്നെ നീറ്റ്, നെറ്റ്, ഓഹരി വിപണിയിലെ ചാഞ്ചാട്ട വിവാദം തുടങ്ങിയ വിഷയങ്ങള് ഉന്നയിക്കാനാണ് പ്രതിപക്ഷ തീരുമാനം. നീറ്റ് നെറ്റ് വിഷയങ്ങള് ഉന്നയിച്ച് രാഹുല്ഗാന്ധി ലോക്സഭയില് നോട്ടീസ് നല്കും.
അതേസമയം സംസ്ഥാനത്തിന്റ പേര് ഭരണഘടനയിലും മറ്റ് ഔദ്യോഗിക രേഖകളിലും 'കേരള' എന്നത് 'കേരളം' എന്നാക്കാന് വീണ്ടും പ്രമേയം. മുഖ്യമന്ത്രി പിണറായി വിജയന് നാളെ നിയമസഭയില് വീണ്ടും പ്രമേയം കൊണ്ട് വരും.
നൂറ്റാണ്ടുകളായി കേരളം എന്ന പേര് സാഹിത്യത്തിലും ചരിത്രത്തിലും ഉണ്ടായിട്ടും അത് കേരള ആയി മാറിയത് ബ്രിട്ടീഷുകാരുടെ പ്രയോഗം കാരണമാണ്. ഐക്യ കേരളം പിറന്ന് ആറര പതിറ്റാണ്ടായിട്ടും 'കേരളം' എന്ന പേര് തിരിച്ചുപിടിച്ച് എല്ലാ രേഖകളിലും ഒരേപോലെയാക്കാന് മലയാളികള്ക്ക് കഴിഞ്ഞില്ല. മലയാളത്തില് സംസ്ഥാനം കേരളം എന്നാണ്. പക്ഷെ സര്ക്കാര് രേഖകളില് പോലും ഇംഗ്ലീഷില് ഇപ്പോഴുമുള്ളത് ഗവണ്മെന്റ് ഓഫ് കേരള എന്നാണ്.
"
https://www.facebook.com/Malayalivartha
