കുറിച്ചി കാലായിപ്പടി നെല്ലിത്താനത്തു കിണര്‍ വൃത്തിയാക്കുന്നതിനിടെ ശ്വാസം മുട്ടി മൂന്നുപേര്‍ മരിച്ചു. കിണര്‍ വൃത്തിയാക്കാനെത്തിയ രണ്ട് ഇതര സംസ്ഥാന തൊഴിലാളികളും ഇവര്‍ അപകടത്തില്‍പ്പെട്ടതറിഞ്ഞ് രക്ഷിക്കാനെത്തിയ യുവാവുമാണ് ദുരന്തത്തില്‍പെട്ടത്.

മാടപ്പള്ളി ശാന്തിപുരം ചക്കുംങ്കല്‍ വീട്ടില്‍ വര്‍ഗീസിന്റെ മകന്‍ ഷിബു എന്നു വിളിക്കുന്ന ആന്റണി വര്‍ഗീസ് (44), പശ്ചിമ ബംഗാളിലെ മാള്‍ഡ സ്വദേശികളായ മുസ്താര്‍(26), ജഹാംഗിര്‍(24) എന്നിവരാണു മരിച്ചത്.നെല്ലിത്താനം ഇടശ്ശേരി കെ.ടി. ചെല്ലപ്പന്റെ ഉടമസ്ഥതയിലുള്ള പുരയിടത്തിലെ കിണര്‍ തേയ്ക്കുന്നതിനിടെ ഇന്നലെ ഉച്ചയോടെയാണു നാടിനെ നടുക്കിയ സംഭവം. കിണറ്റിലെ വെള്ളം വറ്റിക്കാന്‍ ഉപയോഗിച്ച ഡീസല്‍ ജനറേറ്ററില്‍ നിന്നുണ്ടായ വിഷപ്പുകയാണു മരണത്തിനിടയാക്കിയതെന്നു കരുതുന്നു.

ജനറേറ്റര്‍ കിണറ്റിലിറക്കി ഓണാക്കിയശേഷമാണ് വൃത്തിയാക്കാന്‍ മുസ്താര്‍ കിണറ്റിനുള്ളിലേയ്ക്കിറങ്ങിയത്. പുകയില്‍നിന്ന് മുക്താറിനു ശ്വാസം മുട്ടലുണ്ടായതിനേത്തുടര്‍ന്ന് ജനറേറ്റര്‍ വലിച്ചു കരയ്ക്കു കയറ്റി. തളര്‍ന്നു വീണ മുസ്താറിനെ രക്ഷിക്കാന്‍ ജഹാംഗീറും കിണറ്റില്‍ ഇറങ്ങിയെങ്കിലും ഇയാളും ശ്വാസം കിട്ടാതെ വെപ്രാളപ്പെട്ടു. തുടര്‍ന്ന് തൊട്ടടുത്ത വീട്ടിലുണ്ടായിരുന്ന ഷിബു ഇരുവരേയും രക്ഷിക്കാനായി കിണറ്റിലിറങ്ങുകയായിരുന്നു. അപകടം അറിഞ്ഞ് ഓടിക്കൂടിയ നാട്ടുകാര്‍ കയറിട്ടുകൊടുത്തെങ്കിലും ഫലമുണ്ടായില്ല. ഷിബു കയറില്‍ പിടിച്ചു കയറാന്‍ ശ്രമിച്ചെങ്കിലും രണ്ട് റിംഗ് ഉയര്‍ന്നശേഷം കിണറ്റിലേക്കു വീണു. തുടര്‍ന്നു നാട്ടുകാര്‍ ചിങ്ങവനം പോലീസിലും ഫയര്‍ഫോഴ്‌സിലും വിവരം അറിയിക്കുകയായിരുന്നു. ആന്റണി വര്‍ഗീസിന്റെ മൃതദേഹം കോട്ടയം മെഡിക്കല്‍ കോളേജില്‍ പോസ്റ്റ് മോര്‍ട്ടത്തിനുശേഷം ഇന്നു വൈകിട്ട് നാലിന് നെടുങ്ങാടപ്പള്ളി സെന്റ് അത്തനേഷ്യസ് പള്ളിയില്‍ സംസ്‌കരിക്കും. മാതാവ് : അച്ചാമ്മ, ഭാര്യ: മേരി. ഇതര സംസ്ഥാന തൊഴിലാളികളുടെ മൃതദേഹം കോട്ടയം മെഡിക്കല്‍ കോളേജിലേക്ക് മാറ്റി. ഇന്നു പോസ്റ്റ്‌മോര്‍ട്ടത്തിനുശേഷം കൊല്‍ക്കത്തയിലേക്ക് മൃതദേഹങ്ങള്‍ കൊണ്ടുപോകും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha