കേരള ആര്‍ട്സ് ആന്‍ഡ് ക്രാഫ്റ്റ്സ് വില്ലേജ് (KACV) സംഘടിപ്പിക്കുന്ന 'കലപില' സമ്മര്‍ ക്യാമ്പിലേക്കുള്ള രജിസ്ട്രേഷന്‍ ആരംഭിച്ചു. ഡിജിറ്റല്‍ ലോകത്തെ തിരക്കുകളില്‍ നിന്ന് മാറി, കേരളത്തിന്റെ തനതായ ഗ്രാമീണ അന്തരീക്ഷത്തില്‍ കലയെയും സര്‍ഗ്ഗാത്മകതയെയും നേരിട്ടറിയാന്‍ കഴിയുന്ന രീതിയിലാണ് ക്യാമ്പ് വിഭാവനം ചെയ്തിരിക്കുന്നത്. പഴമയുടെ തനിമയും പുതുമയുടെ സാങ്കേതികതയും തമ്മിലുള്ള അകലം കുറയ്ക്കുക എന്നതാണ് കലപില സമ്മര്‍ ക്യാമ്പിന്റെ പ്രധാന ലക്ഷ്യം. കേരളത്തിന്റെ പരമ്പരാഗത കലാരൂപങ്ങളും കരകൗശല വിദ്യകളും നേരിട്ട് മനസ്സിലാക്കാനും മികച്ച കലാകാരന്മാരില്‍ നിന്ന് അവ അഭ്യസിക്കാനും ക്യാമ്പില്‍ പങ്കെടുക്കുന്ന കുട്ടികള്‍ക്ക് സാധിക്കും. ഇത്തരം സംവേദനാത്മക സെഷനുകളിലൂടെയും തത്സമയ പ്രദര്‍ശനങ്ങളിലൂടെയും കേരളത്തിന്റെ സര്‍ഗ്ഗാത്മക പൈതൃകത്തെക്കുറിച്ച് ആഴത്തിലുള്ള അറിവ് നേടുന്നതിനൊപ്പം പുതിയ സംരംഭകത്വ ചിന്തകള്‍ വളര്‍ത്തിയെടുക്കാനും ക്യാമ്പ് അവസരമൊരുക്കുന്നു.

റോബോട്ടിക് വര്‍ക്ക്ഷോപ്പാണ് ഈ വര്‍ഷത്തെ ക്യാമ്പിന്റെ ഏറ്റവും വലിയ പ്രത്യേകത. പാരമ്പര്യ കലകളും ആധുനിക സാങ്കേതികവിദ്യയും എങ്ങനെ പൊരുത്തപ്പെട്ടു പോകുന്നു എന്ന് തിരിച്ചറിയാന്‍ ഈ വര്‍ക്ക്ഷോപ്പിലൂടെ സാധിക്കും. റോബോട്ടിക്സ് സാങ്കേതികവിദ്യ സര്‍ഗ്ഗാത്മകമായ രീതിയില്‍ എങ്ങനെ ഉപയോഗിക്കാമെന്നും കരകൗശല വിദ്യകളെ സാങ്കേതിക വിദ്യയുമായി എങ്ങനെ കോര്‍ത്തിണക്കാമെന്നും ഇതിലൂടെ പഠിപ്പിക്കും. കുട്ടികളില്‍ ശാസ്ത്രീയമായ അറിവിനൊപ്പം കലാപരമായ കാഴ്ചപ്പാടുകളും വളര്‍ത്താന്‍ ഈ സെഷന്‍ ഏറെ സഹായകരമാകുമെന്ന് ക്രാഫ്റ്റ് വില്ലേജ് ചീഫ് ഓപ്പറേറ്റിങ് ഓഫീസര്‍ ടി.യു ശ്രീപ്രസാദ് പറഞ്ഞു.

പരമ്പരാഗത വ്യവസായങ്ങള്‍ ആധുനിക ലോകത്ത് എങ്ങനെ പരിണമിക്കാം എന്നതിനെക്കുറിച്ച് ഉള്‍ക്കാഴ്ച നല്‍കുന്നതോടൊപ്പം സര്‍ഗ്ഗാത്മകത പരീക്ഷിക്കാന്‍ ആഗ്രഹിക്കുന്നവര്‍ക്കും ക്യാമ്പ് മികച്ചൊരു വേദിയായിരിക്കും. ശാന്തമായ ഗ്രാമീണ അന്തരീക്ഷത്തില്‍ പുതിയ വൈദഗ്ധ്യങ്ങള്‍ ആര്‍ജ്ജിക്കാനും ആത്മവിശ്വാസം വളര്‍ത്താനും കേരളത്തിന്റെ കരകൗശല സംസ്‌കാരം അനുഭവിച്ചറിയാനും ക്യാമ്പ് സഹായിക്കും.

5 മുതല്‍ 16 വയസ്സുവരെയുള്ള കുട്ടികള്‍ക്ക് പങ്കെടുക്കാം. ഏപ്രില്‍ 21 മുതല്‍ 26 വരെയാണ് ക്യാമ്പ്. രജിസ്റ്റര്‍ ചെയ്യുന്നതിന് ബന്ധപ്പെടുക: 9288001166, 9288001197