രാജസ്ഥാനില്‍ ഇനി പെണ്‍കുട്ടികള്‍ക്ക് ധൈര്യമായി വഴിയിലിറങ്ങി നടക്കാം. ശല്യക്കാരില്‍ നിന്ന് പെണ്‍കുട്ടികള്‍ക്ക് സുരക്ഷ ഒരുക്കുന്ന ഇലക്‌ട്രോണിക് കവചം വികസിപ്പിച്ചു. 150 ഗ്രാം ഭാരമുള്ള ഈ കവചം വാച്ച് പോലെ കയ്യില്‍ ധരിക്കാം. ആരെങ്കിലും ശല്യം ചെയ്യാന്‍ ശ്രമിച്ചാല്‍ ഈ കുഞ്ഞന്‍ ഉപകരണം അവരെ ഷോക്കടിപ്പിക്കുകയും സംഭവത്തിന്റെ വീഡിയോ ദൃശ്യങ്ങള്‍ അടക്കമുള്ള ഹ്രസ്വമായ സന്ദേശം പോലീസ് അധികൃതര്‍ക്ക് അയച്ചു കൊടുക്കുകയും ചെയ്യും.
220 വോള്‍ട്ടിന്റെ ഷോക്കാണ് ഈ കവചം ശല്യക്കാരിലേക്ക് പ്രവഹിപ്പിക്കുന്നത്. പന്ത്രണ്ടാം ക്ലാസ് വിദ്യാര്‍ത്ഥിയായ നിരഞ്ജന്‍ സുതാര്‍ എന്ന പതിനേഴുകാരനാണ് ഇത് വികസിപ്പിച്ചത്. ജനുവരിയില്‍ നടന്ന സംസ്ഥാന സയന്‍സ് ഫെയറില്‍ ഒന്നാം സമ്മാനത്തിന് അര്‍ഹമായതോടെയാണ് ഇലക്‌ട്രോണിക് കവചം സര്‍ക്കാരിന്റെ ശ്രദ്ധയില്‍പ്പെട്ടത്. മാര്‍ച്ചില്‍ ഡല്‍ഹിയില്‍ നടക്കുന്ന ദേശീയ സയന്‍സ് ഫെയറില്‍ പ്രദര്‍ശിപ്പിക്കാന്‍ തെരഞ്ഞെടുക്കുകയും ചെയ്തിട്ടുണ്ട്.
ഡല്‍ഹി പീഡനത്തിന്റെ പശ്ചാത്തലത്തിലാണ് പെണ്‍കുട്ടികള്‍ക്ക് സുരക്ഷ ഒരുക്കുന്നതിനുള്ള ഡിവൈസ് വികസിപ്പിക്കണമെന്ന ആശയം നിരഞ്ജന്റെ മനസില്‍ ഉടലെടുത്തത്. ഷോക്കിംഗ് ഗ്ലൗസ് എന്നാണ് തന്റെ ഡിവൈസിന് നിരഞ്ജന്‍ പേര് നല്‍കിയിരിക്കുന്നത്. സിം കാര്‍ഡും ഒരു ജി.പി.എസ് ചിപ്പും വീഡിയോ ക്യാമറയും 3.4 വോള്‍ട്ടിന്റെ ബാറ്ററിയും അടങ്ങുന്നതാണ് ഡിവൈസ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha