സങ്കടക്കാഴ്ചയായി... തച്ചനാട്ടുകര പാലോട് കൂത്തുപറമ്പില്‍ അമ്മ കിണറ്റിലെറിഞ്ഞ രണ്ടര വയസുകാരന്‍ മരിച്ചു. ഒപ്പം കിണറ്റില്‍ ചാടിയ അമ്മ പരിക്കുകളോടെ ആശുപത്രിയില്‍ ചികിത്സയില്‍ തുടരുന്നു.

കീഴാറ്റൂര്‍ സ്വദേശി ഷിജുവിന്റെയും തച്ചനാട്ടുകര പാലോട് കൂത്തുപറമ്പില്‍ കാഞ്ചന(27)യുടെയും മകന്‍ വേദിക് എന്ന കാശി (രണ്ടര) ആണ് മരിച്ചത്.ഇന്നലെ രാത്രി 7.30 നാണ് കാഞ്ചന മകനെയുമെടുത്ത് വീട്ടുകിണറ്റില്‍ ചാടിയത്. കുടുംബ പ്രശ്‌നങ്ങളെ തുടര്‍ന്ന് ആത്മഹത്യക്ക് ശ്രമിച്ചതായാണ് സൂചനകളുള്ളത്.

ഉടന്‍ രക്ഷാപ്രവര്‍ത്തനം നടത്തി ആദ്യം കുഞ്ഞിനെ പുറത്തെടുത്ത നാട്ടുകാര്‍ ഉടന്‍ മണ്ണാര്‍ക്കാട് സ്വകാര്യ ആശുപത്രിയില്‍ പ്രവേശിപ്പിച്ചു. കാഞ്ചനയെ നാട്ടുകാര്‍ കിണറ്റില്‍ ഇറങ്ങി കസേരയില്‍ ഇരുത്തി സുരക്ഷിതയാക്കി. തുടര്‍ന്ന് മണ്ണാര്‍ക്കാടു നിന്നെത്തിയ അഗ്‌നി രക്ഷാ സേന പുറത്തെത്തിച്ച് ആശുപത്രിയില്‍ പ്രവേശിപ്പിച്ചു.

വേദിക് ഗുരുതരാവസ്ഥയിലായതിനാല്‍ പെരിന്തല്‍മണ്ണ സ്വകാര്യ ആശുപത്രിയിലേക്ക് മാറ്റി. ഇന്ന് പുലര്‍ച്ചെയാണ് കുഞ്ഞ് മരണത്തിന് കീഴടങ്ങിയത്. നാട്ടുകല്‍ സിഐ ഹബീബുല്ലയുടെ നേതൃത്വത്തില്‍ പൊലീസും സ്ഥലത്തെത്തിയിരുന്നു. കാഞ്ചന ആശുപത്രിയില്‍ ചികിത്സയില്‍ കഴിയുകയാണ്.

രാത്രിയില്‍ ശക്തമായ കാറ്റും മഴയും ഉണ്ടായ സമയത്ത് വൈദ്യുതി ബന്ധം വിച്ഛേദിക്കപ്പെട്ട സമയത്താണ് യുവതി മകനെയുമെടുത്ത് കിണറ്റില്‍ ചാടിയത്. വീട്ടുകാര്‍ കാഞ്ചനയെ സമീപത്തെ വീട്ടിലും ഒക്കെ അന്വേഷിച്ചെങ്കിലും കണ്ടില്ല. തിരിച്ചിലിനിടെ കിണറിന്റെ പൈപ്പ് ഇളകുന്നത് ശ്രദ്ധിച്ച് നോക്കിയപ്പോഴാണ് ഇരുവരെയും കാണാന്‍ കഴിഞ്ഞത്.