അടുത്ത നാല് ദിവസങ്ങളില് ബാങ്കുകള് അടഞ്ഞുകിടക്കും: അടിയന്തര ഇടപാടുകള് ഇന്നു തന്നെ നടത്തുക
തുടര്ച്ചയായ അവധികളും അഖിലേന്ത്യാ പണിമുടക്കും കാരണം അടുത്ത നാല് ദിവസങ്ങളില് ബാങ്കുകള് പ്രവര്ത്തിക്കില്ല. നാലാം ശനിയും ഞായറും റിപ്പബ്ലിക് ദിനവും ബാങ്കുകള്ക്ക് അവധിയാണ്. പിന്നാലെ ജനുവരി 27ന് ബാങ്ക് ജീവനക്കാര് അഖിലേന്ത്യാ പണിമുടക്ക് നടത്തുകയാണ്. അതിനാല് തുടര്ച്ചയായി നാല് ദിവസം ബാങ്ക് ഇടപാടുകള് നടത്താനാവില്ല. എടിഎമ്മുകള് പ്രവര്ത്തിക്കുമെങ്കിലും പണിമുടക്ക് ദിവസം പണം നിറയ്ക്കുന്ന ജോലികളില് തടസ്സം നേരിട്ടേക്കാം. അതിനാല് അത്യാവശ്യമുള്ള പണം ഇന്ന് തന്നെ എടുത്തുവയ്ക്കുന്നതാണ് നല്ലത്.
ജനുവരി 27ന് രാജ്യവ്യാപക പണിമുടക്ക് നടത്തുമെന്ന് ബാങ്ക് ജീവനക്കാരുടെ സംഘടന അറിയിച്ചു. ആഴ്ചയില് അഞ്ച് പ്രവൃത്തി ദിവസം നടപ്പിലാക്കണമെന്നാണ് ആവശ്യം. യുണൈറ്റഡ് ഫോറം ഓഫ് ബാങ്ക് യൂണിയന്സിന്റെ (യു എഫ് ബി യു) നേതൃത്വത്തിലാണ് ബാങ്ക് ജീവനക്കാര് പണിമുടക്കുക. നിലവില് ഞായറാഴ്ചകള് കൂടാതെ ഓരോ മാസത്തെയും രണ്ടാമത്തെയും നാലാമത്തെയും ശനിയാഴ്ചകളിലാണ് ബാങ്ക് ജീവനക്കാര്ക്ക് അവധിയുള്ളത്. ബാക്കിയുള്ള ശനിയാഴ്ചകള് കൂടി അവധിയാക്കണമെന്ന് ആവശ്യപ്പെട്ടാണ് സമരം. ശനിയാഴ്ചകള് അവധിയായി പ്രഖ്യാപിക്കുന്ന കാര്യത്തില് കഴിഞ്ഞ വര്ഷം മാര്ച്ചിലെ ശമ്പള പരിഷ്കരണ കരാറിനിടെ ഇന്ത്യന് ബാങ്ക്സ് അസോസിയേഷനും യുണൈറ്റഡ് ഫോറം ഓഫ് ബാങ്ക് യൂണിയനും തമ്മില് ധാരണയിലെത്തിയിരുന്നു. എന്നാല് ഇത് നടപ്പായില്ലെന്നാണ് പരാതി.
തിങ്കള് മുതല് വെള്ളി വരെ പ്രതിദിനം 40 മിനിറ്റ് അധികം ജോലി ചെയ്യാന് ജീവനക്കാര് സമ്മതിച്ചിട്ടുള്ളതിനാല്, പ്രവൃത്തി സമയത്തില് കുറവുണ്ടാകില്ലെന്ന് സംഘടന അറിയിച്ചു. ആര്.ബി.ഐ, എല്ഐസി, ജിഐസി തുടങ്ങിയ സ്ഥാപനങ്ങളും നിലവില് ആഴ്ചയില് 5 ദിവസം മാത്രമാണ് പ്രവര്ത്തിക്കുന്നതെന്ന് ബാങ്ക് ജീവനക്കാരുടെ സംഘടന ചൂണ്ടിക്കാട്ടുന്നു. വിദേശ വിനിമയ വിപണി, സ്റ്റോക്ക് എക്സ്ചേഞ്ചുകള് എന്നിവ ശനിയാഴ്ചകളില് പ്രവര്ത്തിക്കാത്ത സാഹചര്യത്തില് ബാങ്കുകള് അഞ്ച് ദിവസമാക്കുന്നത് ഒരു തരത്തിലും ഉപഭോക്താക്കളെ ബാധിക്കില്ലെന്നും യുഎഫ്ബിയു അവകാശപ്പെടുന്നു.
https://www.facebook.com/Malayalivartha
