പ്രായപൂര്‍ത്തിയാവാത്ത പെണ്‍കുട്ടിയെ പീഡിപ്പിക്കാന്‍ ശ്രമിച്ചതിന് പൊലീസ് കസ്റ്റഡിയിലെടുത്ത യുവാവ് സ്‌റ്റേഷന്‍ മുറ്റത്ത് നിര്‍ത്തിയിട്ട പൊലീസ് വാഹനം തകര്‍ത്തു. കണ്ണൂര്‍ കാട്ടാമ്പള്ളിയിലാണ് സംഭവം. കൊറ്റാളി ആയുര്‍വേദ ആശുപത്രിക്ക് സമീപത്ത് താമസിക്കുന്ന തമിഴ്‌നാട് സ്വദേശി എം. പരമശിവം ആണ് പൊലീസ് ജീപ്പിന്റെ ചില്ല് തലകൊണ്ട് ഇടിച്ചു തകര്‍ത്തത്. നിരവധി കേസുകളില്‍ പ്രതിയാണ് ഇയാള്‍. ഇന്നലെ രാത്രി ഒന്‍പതോടെയാണ് സംഭവം. പ്രതിയുടെ താമസ സ്ഥലത്തിനടുത്തുള്ള ബന്ധുവീട്ടില്‍ എത്തിയതായിരുന്നു പതിനൊന്ന് വയസുകാരിയായ പെണ്‍കുട്ടി.

സമീപത്ത് ആരും ഇല്ലാത്ത നേരത്ത് പ്രതി കുട്ടിയെ കടന്നു പിടിക്കുകയായിരുന്നു. നിലവിളിച്ച് കുതറി ഓടിയ പെണ്‍കുട്ടി അയല്‍വാസികളോടു വിവരം പറഞ്ഞു. പരമശിവത്തെ നാട്ടുകാര്‍ തടഞ്ഞുവയ്ക്കുകയും പൊലീസില്‍ അറിയിക്കുകയുമായിരുന്നു. സ്‌റ്റേഷനിലെത്തിച്ചപ്പോഴാണ് മുറ്റത്ത് നിര്‍ത്തിയിട്ട ജീപ്പിന്റെ ചില്ല് തലകൊണ്ട് ഇടിച്ചു തകര്‍ത്തത്. അക്രമാസക്തനായ പ്രതിയെ പൊലീസ് ബലം പ്രയോഗിച്ച് കീഴ്‌പ്പെടുത്തി. ഇയാള്‍ക്കെതിരെ പോക്‌സോ കുറ്റം ഉള്‍പ്പെടെ ചുമത്തി കോടതിയില്‍ ഹാജരാക്കി.