വേലി തന്നെ വിളവ് തിന്നുന്ന രീതി അംഗീകരിക്കാനാവില്ലെന്ന് മുഖ്യമന്ത്രി പിണറായി വിജയന്‍. തിരുവനന്തപുരത്ത് പൊലീസിന്റെ പാസിങ് ഔട്ട് പരേഡില്‍ പങ്കെടുത്ത് സംസാരിക്കവെയാണ് മുഖ്യമന്ത്രി ഇക്കാര്യം പറഞ്ഞത്. അഴിമതിയ്ക്ക് വശംവദരായവരെ കുറിച്ച് നിരവധി പരാതികള്‍ സര്‍ക്കാരിന് കിട്ടിയിട്ടുണ്ട്. അഴിമതിക്കാര്‍ക്കെതിരെ കര്‍ശനനടപടിയുണ്ടാകുമെന്നും മുഖ്യമന്ത്രി കൂട്ടിച്ചേര്‍ത്തു.

ജനങ്ങളെ വര്‍ഗീയമായി ഭിന്നിപ്പിക്കാനുള്ള ഹീന ശ്രമം നടക്കുകയാണ്. ഭീകരതയുടെ ഭീഷണി പുറത്തുനിന്ന് മാത്രമല്ല സംസ്ഥാനത്തിന് അകത്തുമുണ്ട്.

പൊലീസുകാര്‍ ജനങ്ങളോട് മര്യാദയോടെ പെരുമാറണമെന്നും മുഖ്യമന്ത്രി ആവശ്യപ്പെട്ടു. കുറ്റം തെളിയിക്കുന്നതിനായി മൂന്നാംമുറ പ്രയോഗിക്കുന്നത് അവസാനിപ്പിക്കണം. പുതിയ കാലത്തെ വെല്ലുവിളികള്‍ നേരിടാന്‍ പൊലീസിന്റെ ആള്‍ബലവും അടിസ്ഥാനസൗകര്യങ്ങളും വര്‍ധിപ്പിക്കുമെന്നും മുഖ്യമന്ത്രി വ്യക്തമാക്കി.