ഇന്ത്യന്‍ ഓയില്‍ കോര്‍പറേഷന്റെ ടാങ്കര്‍ ലോറി സമരം ഒത്തുതീര്‍പ്പായി. ഇരുമ്പനം, കോഴിക്കോട് പ്ലാന്റുകളിലെ ഇന്ധന ടാങ്കര്‍ ഡ്രൈവര്‍മാരാണ് സമരം നടത്തിയത്. കരാര്‍ വ്യവസ്ഥയിലെ അപാകതകള്‍ പരിഹരിക്കാന്‍ ധാരണയായി. മന്ത്രി എ.കെ.ശശീന്ദ്രന്‍ നേതൃത്വം നല്‍കിയ ചര്‍ച്ചയിലാണ് തീരുമാനമായത്.

ഐഒസി ടാങ്കര്‍ ഡ്രൈവര്‍മാരുടെയും ട്രക്കുടമകളുടെയും സമരം അഞ്ചാംദിവസത്തിലേക്കു കടന്നതോടെ സംസ്ഥാനത്തെ ഭൂരിഭാഗം ഇന്ത്യന്‍ ഓയില്‍ കോര്‍പറേഷന്‍ പമ്പുകളും അടച്ചിരുന്നു. കമ്പനി നേരിട്ടു നടത്തുന്ന ചില പമ്പുകളില്‍ മാത്രമാണ് ഇന്ധനമുണ്ടായിരുന്നത്. സംസ്ഥാനത്തെ ഇന്ധന വിപണിയുടെ 48 ശതമാനവും ഐഒസിയ്ക്കാണ്. ആകെയുള്ള 1900 പെട്രോള്‍ പമ്പുകളില്‍ 900 പമ്പുകളാണ് ഐഒസിയ്ക്കുള്ളത്.