നോട്ട് പ്രതിസന്ധി: വ്യാപാരി കടമുറിയില് തൂങ്ങിമരിച്ചു
നോട്ടുപ്രതിസന്ധിമൂലം ബിസിനസ് തകര്ന്നതിനെ തുടര്ന്ന് വ്യാപാരി സ്വന്തം കടമുറിക്കുള്ളില് തൂങ്ങിമരിച്ചു. ചങ്ങനാശേരി വാഴപ്പള്ളി മതുമൂല ചീരക്കാട്ട് ഇല്ലത്ത് പരേതനായ പരമേശ്വരന് നമ്പൂതിരിയുടെയും സാവിത്രി അന്തര്ജനത്തിന്റെയും മകനായ സി പി നാരായണന് നമ്പൂതിരി (54)യെ ആണ് തൂങ്ങിമരിച്ച നിലയില് ഇന്നലെ രാവിലെ കാണപ്പെട്ടത്. മരിച്ച നാരായണന് നമ്പൂതിരി മോഡേണ് ബ്രഡിന്റെ മൊത്ത വ്യാപാരിയായിരുന്നു.
വിദേശത്തായിരുന്ന നാരായണന് നമ്പൂതിരി കഴിഞ്ഞ 20 വര്ഷമായി നാട്ടിലെത്തി മോഡേണ് ബ്രഡിന്റെ ഏജന്സിയെടുത്ത് ചെറുകിട കച്ചവടക്കാര്ക്ക് നല്കി വരികയായിരുന്നു. നിത്യേന ലോഡ് എടുത്ത് നല്ല നിലയില് ബിസിനസ് നടന്നുവന്നിരുന്നതായി സുഹൃത്തുക്കളും ബന്ധുക്കളും പറഞ്ഞു. എന്നാല് 500, 1000 നോട്ടുനിരോധനം നടപ്പിലായതോടെ വ്യാപാരമേഖല സ്തംഭിക്കുകയും ബിസിനസ് മുന്നോട്ടുകൊണ്ടുപോകാന് കഴിയാതെ വരുന്നതായും ഇദ്ദേഹം പലരോടും പറഞ്ഞിരുന്നു. ചെറിയ കടകളില് ബ്രെഡ് നല്കി കഴിഞ്ഞാല് പണം ലഭിക്കാതെ വന്നതും ലഭിക്കുന്ന പണം 500, 1000 ആണെന്നതും കച്ചവടത്തിന് തടസ്സമായി. മോഡേണ് ബ്രഡ് ഏജന്സി ചെക്ക് മാത്രം സ്വീകരിച്ചു വന്നതിനാല് പണം മാറി ചെക്ക് നല്കാന് കഴിയാത്തതും കച്ചവടത്തെ ബാധിച്ചു.
നോട്ടുനിരോധിച്ച്്്് 20 ദിവസം പിന്നിട്ടുകഴിഞ്ഞപ്പോള് ബിസിനസ് പൂര്ണമായും തകര്ന്നു.
ചങ്ങനാശേരി താലൂക്ക് ജനറല് ആശുപത്രിയില് പോസ്റ്റുമോര്ട്ടത്തിനുശേഷം മൃതദേഹം ചെത്തിപ്പുഴയിലെ സെന്റ് തോമസ് ആശുപത്രിയില് സൂക്ഷിച്ചിരിക്കുകയാണ്. സംസ്കാരം പിന്നീട്. ഭാര്യ സുഷമ. മക്കള് കൃഷ്ണദാസ് നമ്പൂതിരി (ചെന്നൈ), ഹരിദാസ് നമ്പൂതിരി (ബാംഗ്ലൂര്). സഹോദരങ്ങള്: കേശവന് നമ്പൂതിരി (കായംകുളം സിപി സിആര്ടി), പ്രൊഫ.മാധവന് നമ്പൂതിരി (ആര്എല്വി), പരമേശ്വരന് നമ്പൂതിരി (എഞ്ചിനീയര് യുഎസ്എ), ഡോ.സരസ്വതി ദേവി, സാവിത്രിദേവി, ഗൗരി ദേവി.
https://www.facebook.com/Malayalivartha
