ജാമ്യത്തില്‍ ഇറങ്ങിയ ദിവസം മുതല്‍ ആക്രമണം തുടരുകയാണെന്ന് രശ്മി ആര്‍ നായര്‍. തനിക്ക് നേരിടുന്ന അപമാനങ്ങളെപ്പറ്റി ഫേസ്ബുക്കിലാണ് രശ്മി തുറന്ന് പറഞ്ഞത്. 

ഫേസ്ബുക്ക് പോസ്റ്റിന്റെ പൂര്‍ണ രൂപം

ജാമ്യത്തില്‍ ഇറങ്ങിയ ദിവസം മുതല്‍ ആക്രമണം തുടരുകയാണ് സോഷ്യല്‍ മീഡിയയില്‍ മാത്രമല്ല ജീവിതത്തില്‍. സ്വന്തം വീട്ടുമുറ്റത്തേക്ക് പോലും ഇറങ്ങിയാല്‍ കൂകി വിളിക്കുക പരിഹാസവും അസഭ്യവും നിറഞ്ഞ കമന്റ് പറയുക. എന്തായാലും സ്വന്തം നാട്ടില്‍ ഇക്കാര്യത്തില്‍ സംഘികളും സഖാക്കളും തമ്മിലുള്ള അന്തര്‍ധാരയും നേരിട്ട് തന്നെ അനുഭവിക്കാന്‍ കഴിഞ്ഞു. പ്രതികരിക്കാന്‍ അറിയാത്തത് കൊണ്ടല്ല വേണ്ട എന്ന് മനസുകൊണ്ട് തീരുമാനിച്ചിരിക്കുന്നത് കൊണ്ടാണ്. 

നിങ്ങളെ അലോരസപെടുത്തുന്നത് എന്താണ് എന്ന ബോധ്യമുള്ളതു കൊണ്ടാണ്. പിന്നെ തോള്‍ചേര്‍ന്ന് നില്‍ക്കാന്‍ അവന്‍ കൂടി ഉള്ളപ്പോള്‍ എനിക്കീ മഹാപ്രപഞ്ചം തന്നെ വീടാക്കിമാറ്റാന്‍ കഴിയുമ്പോള്‍ നിങ്ങളാഗ്രഹിക്കുന്നത് പോലെ ഞാനെന്റെ ശരീരത്തിന്റെ സങ്കുചിതത്വത്തിലേക്കു എരിഞ്ഞടങ്ങില്ല. പിന്നെ വേശ്യ എന്നല്ലേ വിളി സംഘി എന്നല്ലല്ലോ മറിചായിരുന്നു എങ്കില്‍ ചിലപ്പോള്‍ അഭിമാനക്ഷതം തോന്നിയേനെ.

പലരും ചോദിക്കുന്നു കമന്റ് ബോക്‌സ് അടച്ചുകൂടെ? ഫോട്ടോകള്‍ ഫ്രണ്ട്‌സ് ഒണ്‍ലി ആക്കികൂടെ ?

തെറിവിളിക്കുന്നവരോടും ഉള്ള ജനാതിപത്യ മര്യാദ കൊണ്ടൊന്നുമല്ല അത് ചെയ്യാത്തത്, എന്നെ പുകഴ്ത്തുന്നവരും പിന്താങ്ങുന്നവരും മാത്രമുള്ള മൂഢ സ്വര്‍ഗത്തില്‍ ജീവിക്കാന്‍ ആഗ്രഹമില്ല. ഞാന്‍ ജീവിക്കുന്ന സമൂഹത്തിലെ വാ കൊണ്ട് വിസര്‍ജിക്കുന്നവരെയും ലിംഗം കൊണ്ട് സംസാരിക്കുന്നവരെയും കണ്ടുകൊണ്ടു അതില്‍ നിന്നുള്ള ദുര്‍ഗന്ധം മൂക്കുപൊത്തിയായാലും സഹിച്ചുകൊണ്ട് ഇതൊക്കെയാണ് എനിക്ക് ചുറ്റുമുള്ള ഇരുട്ടിന്റെ മറപറ്റി നില്‍ക്കുന്ന സമൂഹം എന്ന് തിരിച്ചറിഞ്ഞു ജീവിക്കാനാണ് ആഗ്രഹിക്കുന്നത്.