ലക്ഷ്മിയുടെ മനസില്‍ ഇപ്പോഴും എനിക്ക് സ്ഥാനമുണ്ടോ എന്നറിയാനാണ് ആദ്യം ക്ലാസില്‍ എത്തിയത്. പക്ഷെ എല്ലാവരും കേള്‍ക്കേ എന്നെ അപമാനിച്ചു. കോട്ടയത്ത് വിദ്യാര്‍ത്ഥിനിയെ ചുട്ടുകൊന്ന സംഭവത്തില്‍ ആദര്‍ശിന്റെ മരണമൊഴി പുറത്ത്. എസ്എംഇ കോളേജിലെ വിദ്യാര്‍ത്ഥിനിയായ ലക്ഷ്മിയെ പൂര്‍വ വിദ്യാര്‍ത്ഥിയായ ആദര്‍ശ് ചുട്ടുകൊന്ന ശേഷം ആത്മഹത്യ ചെയ്യുകയായിരുന്നു. പെട്രോള്‍ ഒഴിച്ചതോടെ ഓടിയ ലക്ഷ്മിയെ താന്‍ പിന്‍തുടര്‍ന്ന് പിടിച്ച് നിര്‍ത്തി തീ കൊളുത്തിയതാണെന്ന് ആദര്‍ശ് മൊഴി നല്‍കി.

ഒരിക്കല്‍ തന്നോട് ഇഷ്ടമുണ്ടായിരുന്ന ലക്ഷ്മി പിന്നീട് തന്നെ ഒഴിവാക്കുകയും താന്‍ ശല്യം ചെയ്യുന്നതായി കാണിച്ച് പോലീസില്‍ പരാതി നല്‍കുകയും ചെയ്തിരുന്നു. ഇതിലുള്ള പകയും വൈരാഗ്യവും മൂലമാണ് കൊല്ലാന്‍ തീരുമാനിച്ചതെന്ന് കോട്ടയം മെഡിക്കല്‍ കോളജില്‍ ഡോക്ടര്‍മാര്‍ക്ക് നല്‍കിയ മൊഴിയില്‍ ആദര്‍ശ് വെളിപ്പെടുത്തിയിട്ടുണ്ട് .

2009ല്‍ ഫിസിയോതെറപ്പി കോഴ്സ് പഠിച്ച ആദര്‍ശ് ചില വിഷയങ്ങള്‍ക്ക് പരാജയപ്പെട്ടിരുന്നു. ഈ വിഷയങ്ങളുടെ സപ്ലിമെന്ററി പരീക്ഷ ജനുവരി 31, ഫെബ്രുവരി രണ്ട് തീയതികളിലായി എസ്എംഇയില്‍ നടക്കുന്നുണ്ട്. പരീക്ഷ എഴുതാനാണ് ആദര്‍ശ് കോളേജില്‍ എത്തിയത്.

ലക്ഷ്മിയുടെ മനസ്സില്‍ ഇപ്പോഴും തനിക്ക് സ്ഥാനം ഉണ്ടോ എന്നറിയാന്‍ എത്തിയ തന്നെ സുഹൃത്തുക്കള്‍ കേള്‍ക്കേ പറയാനുള്ളത് പറഞ്ഞാല്‍ മതിയെന്ന് പറഞ്ഞ് അയയ്ക്കുകയായിരുന്നു. മറ്റുള്ളവരുടെ മുന്നില്‍ വച്ച് താന്‍ അപമാനിതനായതിനാല്‍ നേരത്തെ വാങ്ങിവെച്ച പെട്രോള്‍ ഒഴിച്ച് കൊലപ്പെടുത്താന്‍ തീരുമാനിക്കുകയായിരുന്നു വെന്ന് ആദര്‍ശ് ഡോക്ടര്‍മാര്‍ക്ക് മരണ മൊഴി നല്‍കി.

അതെസമയം, പ്രണയ വഞ്ചന കൊണ്ടാണ് മകളെ തീ കൊളുത്തിയതെന്ന ആരോപണം വേദനയുണ്ടാക്കുന്നുവെന്ന് കൊലചെയ്യപ്പെട്ട ശ്രീലക്ഷ്മിയുടെ അമ്മ. ഒരമ്മയ്ക്ക് താങ്ങാവുന്നതിലും അപ്പുറമാണ് ഉഷാറാണി എന്ന അമ്മ ഏറ്റുവാങ്ങിയത്. സ്വന്തം മകളുടെ മുഖം പോലും ഒരു നോക്കു കാണാന്‍ അമ്മയ്ക്കായില്ല. കത്തിക്കരിഞ്ഞ മൃതദേഹത്തിന്റെ കാലുകള്‍ മാത്രമാണ് ഈ അമ്മയെ കാണിച്ചത്.

മുഖം കാണട്ടെയെന്ന് ആവര്‍ത്തിച്ച് പറഞ്ഞിട്ടും അതിന് കഴിയുമായിരുന്നില്ല. മകളുടെ മരണത്തിന്റെ ഞെട്ടലില്‍ കഴിയുന്ന അമ്മ, ശ്രീലക്ഷ്മി ആദര്‍ശിനെ വഞ്ചിച്ചുവെന്ന പ്രചാരണം ശ്രദ്ധയില്‍പ്പെട്ടതിനാലാണ് അമ്മ പ്രതികരിച്ചത്. നിരന്തരം പരാതി പറഞ്ഞിട്ടും വേണ്ട സുരക്ഷ ഒരുക്കാത്ത കോളേജ് അധികാരികള്‍ക്കെതിരെയുള്ള രോഷവും ബന്ധുക്കള്‍ പ്രകടിപ്പിച്ചു.