ഉയരങ്ങള് കീഴടക്കി വില്ലേജ് ഓഫീസിലേക്ക്
ചങ്ങനാശേരി മാടപ്പള്ളി വില്ലേജ് ഓഫിസില് വിവിധ ആവശ്യങ്ങള്ക്കെത്തുന്നവര്ക്ക് പത്ത് മീറ്റര് ഉയരത്തില് പടികള് കയറി വേണം ഓഫീസിലെത്താന്. റോഡില്നിന്നും പത്തുമീറ്റര് ഉയരത്തിലാണ് തെങ്ങണയിലുള്ള വില്ലേജ് ഓഫീസ് കെട്ടിടം പ്രവര്ത്തിക്കുന്നത്. കുത്തനെയുള്ള പടികള് ചവിട്ടിയാണ് ദിവസവും വിവിധ ആവശ്യങ്ങളുമായി ആളുകള് വില്ലേജ് ഓഫീസില് എത്തുന്നത്. പ്രായമായവരുള്പ്പെടെ ശാരീരിക ബുദ്ധിമുട്ടുകള് അനുഭവിക്കുന്ന ആളുകളെ ഇതു വലയ്ക്കുന്നുണ്ട്. പ്രതിസന്ധികള് തരണം ചെയ്ത് വില്ലേജ് ഓഫീസില് എത്തുമ്പോള് വില്ലേജ് ഓഫീസര് സ്ഥലത്തില്ലെങ്കില് ആളുകളുടെ പ്രയാസം ഇരട്ടിയാകും. അതിനാല് ടെലിഫോണ് ബന്ധം പുന:സ്ഥാപിക്കുകയോ ലിഫ്റ്റ് സംവിധാനം ഒരുക്കുകയോ ചെയ്യണമെന്ന് നാട്ടുകാര് പറയുന്നു.
ഇങ്ങനെ കയറുകയും ഇറങ്ങുകയും ചെയ്യുന്നതിലുള്ള ബുദ്ധിമുട്ട് കരുതി അര്ഹമായ പല സേവനങ്ങളും വേണ്ടെന്ന് വയ്ക്കുകയാണ് നാട്ടുകാര്. ഇതിനു പരിഹാരമെന്നോണം ഓഫീസില് ആറുമാസമായി വിച്ഛേദിച്ച നിലയിലുള്ള ടെലിഫോണ് ബന്ധമെങ്കിലും പുന:സ്ഥാപിക്കുവാന് അധികൃതര് തയ്യാറാകണമെന്ന് നാട്ടുകാര് ആവശ്യപ്പെടുന്നു.
ഓഫീസില് ഉദ്യോഗസ്ഥന് ഉണ്ടോ എന്ന് വിളിച്ച് ചോദിച്ചതിനു ശേഷം പടികള് കയറി ഇറങ്ങിയാല് മതിയല്ലോ എന്നാണ് ഇവര് ചോദിക്കുന്നത്. ടെലിഫോണ് ബന്ധം പുന:സ്ഥാപിക്കുവാന് സാധ്യമല്ലെങ്കില് അകലെനിന്ന് കാണുന്ന രീതിയില് വില്ലേജ് ഓഫീസര് ഉണ്ട് / ഇല്ല എന്നെഴുതിയ ഒരു ഫ്ലക്സ് ബോര്ഡെങ്കിലും ഓഫീസിന് മുമ്പില് വയ്ക്കണമെന്നും നാട്ടുകാര് പറയുന്നു. വില്ലേജ് ഓഫീസറുടെ മൊബൈല് നമ്പര് തിരക്കി തഹസീല്ദാറെ വിളിച്ച സംഭവവും അടുത്തിടെ ഇവിടുണ്ടായി. കാര്യത്തിന്റെ ഗൗരവം മനസ്സിലാക്കി പ്രശ്ന പരിഹാരത്തിന് അധികൃതര് ഇടപെടണമെന്നും സേവനങ്ങള് എളുപ്പത്തില് ലഭ്യമാകുന്നതിനുള്ള വില്ലേജ് ഓഫീസുകളില് ജനത്തിന് സുഗമമായി കടന്നു ചെല്ലുന്നതിനുള്ള മാര്ഗം ഒരുക്കണമെന്നും ആവശ്യക്കാര് അധികൃതരോട് ഒരേ സ്വരത്തില് ആവശ്യപ്പെടുന്നു.
https://www.facebook.com/Malayalivartha
