പൊതുസ്ഥലത്ത് മദ്യപിച്ചെന്നാരോപിച്ച് പോലീസ് പിടികൂടിയ യുവാക്കള്‍ക്ക് പോലീസിന്റെ വക പ്രാകൃത പീഡന നടപടി. കൊച്ചി പോലീസ് സ്‌റ്റേഷനിലാണ് അടിവസ്ത്രം മാത്രം ധരിപ്പിച്ച് ലോക്കപ്പില്‍ യുവാക്കളെ പീഡിപ്പിച്ചത്.

സംഭവം വിവാദമായതോടെ പോലീസ് കംപ്ലയിന്റ്‌സ് അതോറിറ്റി പെയര്‍മാന്‍ ജസ്റ്റിസ് കെ. നാരായണക്കുറിപ്പ് പരിശോധന നടത്തി. ഇന്നലെ രാത്രിയിലാണ് സംഭവം അരങ്ങേറിയത്. കൊച്ചി കടവന്ത്രക്ക് സമീപം കാറോടിച്ച് എത്തിയ മൂവര്‍ സംഘമാണ് പോലീസിന്റെ പ്രാകൃത നടപടിക്ക് ഇരയായത്. കാറോടിച്ചയാള്‍ മദ്യപിച്ചതായി വ്യക്തമായതോടെ പോലീസും ഇവരും തമ്മില്‍ വാക്കുതര്‍ക്കമുണ്ടാകുകയും തുടര്‍ന്ന് മൂവര്‍ സംഘത്തെ പോലീസ് കസ്റ്റഡിയിലെടുത്തു.

വൈദ്യ പരിശോധനയെന്ന വ്യാജേന സ്‌റ്റേഷനിലേക്കാണ് ഇവരെ കൊണ്ടു പോയതെന്നാണ് ലഭ്യമാകുന്ന വിവരം. ലോക്കപ്പില്‍ കയറ്റിയ ഇവരെ അടിവസ്ത്രം മാത്രം ധരിപ്പിച്ച് നിര്‍ത്തുകയായിരുന്നു. പരിശോധനയ്ക്കായി ജസ്റ്റിസ് നാരായണക്കുറുപ്പ് എത്തിയതോടെ പെട്ടെന്ന് ഇവര്‍ക്ക് വസ്ത്രം നല്‍കി. വൈദ്യ പരിശോധന നടത്തി തുടര്‍ന്ന് നിയമ നടപടികള്‍ സ്വീകരിക്കാവൂ എന്നും നാരായണക്കുറുപ്പ് വ്യക്തമാക്കി.