മൂന്നാറിലെ കൈയ്യേറ്റങ്ങളെ ചുറ്റിപ്പറ്റിയുള്ള വിവാദം അവസാനിക്കുന്നില്ല. മൂന്നാറിലെ കയ്യേറ്റങ്ങള്‍ ഒഴിപ്പിക്കുന്നതില്‍ കര്‍ശന നടപടിയെടുത്ത ദേവികുളം സബ് കലക്ടര്‍ ശ്രീറാം വെങ്കിട്ടരാമനെതിരെ രൂക്ഷമായ ഭാഷയില്‍ പ്രതിഷേധിച്ച മന്ത്രി എം.എം. മണിക്കു സിപിഐ മുതിര്‍ന്ന നേതാവ് പന്ന്യന്‍ രവീന്ദ്രന്റെ പരോക്ഷവിമര്‍ശനം. എന്തും വിളിച്ചു പറയുന്നവര്‍ ഇരിക്കുന്ന കസേരയുടെ വില നോക്കണമെന്നും ചരിത്രത്തിന്റെ ചവറ്റുകുട്ടയിലായിരിക്കും ഇവരുടെ സ്ഥാനമെന്നും പന്ന്യന്‍ രവീന്ദ്രന്‍ പറഞ്ഞു. വിവരക്കേടു പറയാന്‍ മടിയില്ലാത്തവര്‍ നാട്ടിലുണ്ട്. അത്തരക്കാര്‍ക്കു മറുപടിയില്ലെന്നും പന്ന്യന്‍ രവീന്ദ്രന്‍ പറഞ്ഞു.

ശനിയാഴ്ച കുഞ്ചിത്തണ്ണി ഇരുപതേക്കറിലെ യോഗത്തില്‍ സംസാരിക്കവെ ശ്രീറാമിനെ ഊളമ്പാറയ്ക്കു വിടണമെന്നു മണി ആവശ്യപ്പെട്ടിരുന്നു. ദേവികുളം സബ് കലക്ടര്‍ ജനവിരുദ്ധനും തന്നിഷ്ട പ്രകാരം പ്രവര്‍ത്തിക്കുന്നയാളുമാണ്. 

മൂന്നാര്‍ ഉള്‍പ്പടെയുള്ള സ്ഥലങ്ങളില്‍ ഭൂമി കയ്യേറ്റം ഒഴിപ്പിക്കുന്നതുമായി ബന്ധപ്പെട്ട സബ് കലക്ടറുടെ നടപടികളുടെ പശ്ചാത്തലത്തിലാണ് രൂക്ഷവിമര്‍ശനവുമായി മന്ത്രി രംഗത്തെത്തിയത്. നേരെചൊവ്വേ പോയാല്‍ എല്ലാവര്‍ക്കും നല്ലത്. ഞങ്ങള്‍ കലക്ടര്‍ക്കും സബ് കലക്ടര്‍ക്കും ഒപ്പമല്ല. ജനങ്ങള്‍ക്കൊപ്പമാണെന്നും മന്ത്രി പറഞ്ഞു.