ദേശീയതലത്തിലുള്ള മൂന്നാം മുന്നണി പരീക്ഷണങ്ങള്‍ക്ക് ഇനി മുന്‍കൈയെടുക്കില്ലെന്ന് സിപിഎം ജനറല്‍ സെക്രട്ടറി പ്രകാശ് കരാട്ട്. പ്രാദേശികപാര്‍ട്ടികളുമായുള്ള സഖ്യങ്ങള്‍ക്ക് കൂടുതല്‍ സ്വാതന്ത്ര്യം അനുവദിക്കാനാണ് പാര്‍ട്ടി തീരുമാനം. അടവുനയത്തില്‍ സമയം പാഴാക്കാതെ സംഘടനാപരമായ തെറ്റുകള്‍ തിരുത്തി മുന്നോട്ടുപോവാന്‍ സി.പി.എം. കേന്ദ്രകമ്മിറ്റി തീരുമാനിച്ചു. ലോക്‌സഭാ തിരഞ്ഞെടുപ്പില്‍ ശക്തമായ തിരിച്ചടി നേരിട്ട പശ്ചാത്തലത്തില്‍ പാര്‍ട്ടിയുടെ ശ്രദ്ധ മുഴുവന്‍ ഇനി സംഘടനയുടെ അടിത്തറ ശക്തിപ്പെടുത്താനാവും. സംഘടനാവിഷയങ്ങള്‍ ചര്‍ച്ച ചെയ്യാന്‍ പാര്‍ട്ടി കോണ്‍ഗ്രസ് കഴിഞ്ഞ് രണ്ട് മാസത്തിനുശേഷം പ്ലീനം വിളിക്കുമെന്ന് ജനറല്‍ സെക്രട്ടറി പ്രകാശ് കാരാട്ട് വാര്‍ത്താസമ്മേളനത്തില്‍ അറിയിച്ചു. 

അടവുനയം സംബന്ധിച്ച് പി.ബി. തയ്യാറാക്കിയ റിപ്പോര്‍ട്ട് ഭേദഗതികളോടെ പുതുക്കി അടുത്ത കേന്ദ്രക്കമ്മിറ്റിക്കുമുമ്പാകെ അവതരിപ്പിക്കാന്‍ തീരുമാനിച്ചെന്നും പ്രകാശ് കരാട്ട്പറഞ്ഞു. കോണ്‍ഗ്രസ്സുമായി യാതൊരു ധാരണയുമുണ്ടാക്കില്ലെന്ന് കാരാട്ട് വ്യക്തമാക്കി. കോണ്‍ഗ്രസുമായും വര്‍ഗീയ പാര്‍ട്ടികളുമായി സഹകരിക്കില്ലന്നും കരാട്ട് പറഞ്ഞു.
മുന്‍കാല രാഷ്ട്രീയ അടവുനയങ്ങള്‍ പുനഃപരിശോധിച്ച് പുതിയ അടവുനയം രൂപവത്കരിക്കുക, സംഘടനാപരമായ അടിത്തറ ശക്തമാക്കുക, വര്‍ഗബഹുജന സംഘടനകള്‍ ശക്തിപ്പെടുത്തുക, നവ ഉദാരീകരണനയം വിവിധ മേഖലകളില്‍ സൃഷ്ടിച്ച പ്രത്യാഘാതം പരിശോധിക്കുക എന്നിവ കേന്ദ്രകമ്മിറ്റിയില്‍ ചര്‍ച്ച ചെയ്തു.ഇതില്‍ സംഘടനാവിഷയങ്ങള്‍ ചര്‍ച്ച ചെയ്യാനും മാറ്റങ്ങള്‍ക്കുമായാണ് പ്ലീനം വിളിക്കുന്നത്.
ഇനി 1978ലെ ജലന്ധര്‍ കോണ്‍ഗ്രസ്സ് മുതലുള്ള അടവുനയം പാര്‍ട്ടി പുനഃപരിശോധിക്കില്ല. പകരം നവ ഉദാരീകരണനയം നടപ്പായിത്തുടങ്ങിയ 1991 മുതലുള്ള നയസമീപനങ്ങള്‍ അവലോകനം ചെയ്യും.
അടവുനയങ്ങള്‍ പുനഃപരിശോധിക്കാന്‍ 1996ല്‍ തീരുമാനിച്ചെങ്കിലും വിവിധ കാരണങ്ങളാല്‍ അത് നടപ്പാക്കാനായില്ല. തിരഞ്ഞെടുപ്പ് സഖ്യങ്ങളുണ്ടാക്കിയെങ്കിലും പാര്‍ട്ടിക്ക് വളരാന്‍ കഴിഞ്ഞില്ലെന്നാണ് വിലയിരുത്തല്‍.
കേന്ദ്രകമ്മിറ്റി ചര്‍ച്ചകളുടെ അടിസ്ഥാനത്തില്‍ രാഷ്ട്രീയ അവലോകന റിപ്പോര്‍ട്ട് പരിഷ്‌കരിക്കാന്‍ തീരുമാനിച്ചു. ഇത് പി.ബി. തയ്യാറാക്കി അടുത്ത കേന്ദ്രകമ്മിറ്റിയില്‍ അവതരിപ്പിക്കും. ഈ റിപ്പോര്‍ട്ടും രാഷ്ട്രീയ പ്രമേയവും ജനവരിയില്‍ പാര്‍ട്ടി ഘടകങ്ങള്‍ക്ക് ചര്‍ച്ചയ്ക്കായി നല്‍കും. അടവുനയ റിപ്പോര്‍ട്ട് പുതുക്കുമ്പോള്‍ ഏഴ് കാര്യങ്ങള്‍ പരിഗണിക്കും.
മൂന്നരപ്പതിറ്റാണ്ട് കാലത്തെ അടവുനയവും മൂന്നാംമുന്നണി പരീക്ഷണങ്ങളും പുനഃപരിശോധിക്കാന്‍ പി.ബി. മുന്നോട്ടുവെച്ച നിര്‍ദേശത്തിന് കേന്ദ്രകമ്മിറ്റിയില്‍ ഭൂരിപക്ഷം ലഭിക്കാത്തതിനാലാണ് റിപ്പോര്‍ട്ട് പുതുക്കാനുള്ള തീരുമാനം.പാര്‍ട്ടിക്ക് സ്വതന്ത്രമായി വളരാന്‍ കഴിയാത്തതും ബൂര്‍ഷ്വാ പാര്‍ട്ടികളുമായി ചേര്‍ന്നു മുന്നോട്ടുപോവണോ വേണ്ടയോ എന്ന ചര്‍ച്ചയ്ക്കുമാണ് ഊന്നല്‍. വിശാഖപട്ടണത്ത് നടക്കുന്ന കോണ്‍ഗ്രസ്സില്‍ 749 പ്രതിനിധികള്‍ പങ്കെടുക്കുമെന്നും കാരാട്ട് അറിയിച്ചു. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha