കളിയും ചിരിയും മാത്രം മനസില്‍ വരുന്ന പ്രായമാണ് നാലു വയസ്. എന്നാല്‍ മുബൈയിലെ വിജയ് നഗറിലുള്ള ഈ നാലുവയസുകാരിയെ മിടുമിടുക്കി എന്നല്ലാതെ എന്തു വിശേഷിപ്പിക്കാനാണ്. ഈ കൊച്ചു മിടുക്കിയുടെ അവസരോചിതമായ ഇടപെടലിനെ തുടര്‍ന്ന് തിരിച്ചു കിട്ടിയത് അവളുടെ അമ്മയുടെ മാനമാണ്. തന്റെ മാതാവിനെ കത്തിമുനയില്‍ നിര്‍ത്തി ബലാത്സംഗം ചെയ്യാന്‍ ശ്രമിച്ച യുവാവിനെ വീട് പുറത്ത് നിന്നും പൂട്ടിയ ശേഷം നാട്ടുകാരെ വിളിച്ചു കൂട്ടി പെണ്‍കുട്ടി കുടുക്കുകയായിരുന്നു. പെണ്‍കുട്ടിയുടെ മിടുക്കില്‍ കുടുങ്ങിയത് 29 കാരന്‍ സര്‍വന്ദ് ജയ്പാല്‍ എന്ന ക്രിമിനലായിരുന്നു. ഇയാളെ പിന്നീട് പോലീസിന് കൈമാറി.
തിങ്കളാഴ്ച രാവിലെയായിരുന്നു സംഭവം. നാട്ടിലെ അറിയപ്പെടുന്ന ക്രിമിനലും അനേകം കേസുകളില്‍ പ്രതിയുമായ സര്‍വന്ത് രാവിലെ ഏഴു മണിക്കാണ് വീട്ടില്‍ വന്നു കയറിയത്. ഈ സമയം വീട്ടമ്മയുടെ ഭര്‍ത്താവ് വീടിന്റെ അധികം അകലെയല്ലാതെ നടത്തുന്ന ചായക്കടയിലായിരുന്നു. ഇവരുടെ രണ്ടു പെണ്‍മക്കളാകട്ടെ ഉറക്കത്തിലും. ഭര്‍ത്താവ് ചായക്കടയിലിരിക്കുന്ന സമയം നോക്കി വീട്ടില്‍ വന്നു കയറിയ സര്‍വന്ത് കത്തികാട്ടി വീട്ടമ്മയെ ഭീഷണിപ്പെടുത്തുകയും വസ്ത്രങ്ങള്‍ അഴിച്ചുമാറ്റാന്‍ ആവശ്യപ്പെടുകയും ചെയ്തു.
തന്നെ അപമാനിക്കരുതെന്ന് പറഞ്ഞ വീട്ടമ്മയെ കൊല്ലുമെന്ന് ഭീഷണിപ്പെടുത്തി. ഈ സമയം അമ്മയുടെ കരച്ചില്‍ കേട്ട് മൂത്തമകള്‍ നാലു വയസ്സുകാരി ഉണര്‍ന്നെങ്കിലും അപകട സാഹചര്യം മുന്നില്‍ കണ്ട് ഉറക്കം നടിച്ചു കിടന്നു. അതിന് ശേഷം അക്രമിയുടെ കണ്ണുവെട്ടിച്ച് വീടിന് പുറത്തെത്തി. തുടര്‍ന്ന് വീട് വെളിയില്‍ നിന്നു പൂട്ടുകയും ഉച്ചത്തില്‍ നിലവിളിച്ച് ആളെ കൂട്ടുകയുമായിരുന്നു. കുട്ടിയുടെ കരച്ചില്‍ കേട്ടെത്തിയ ഗ്രാമവാസികള്‍ അക്രമിയെ പിടികൂടുകയും പിന്നീട് പോലീസിന് കൈമാറുകയുമായിരുന്നു.
സംഭവത്തില്‍ ഭവനഭേദനത്തിനും ബലാത്സംഗ ശ്രമത്തിനും സര്‍വന്തിനെതിരേ കേസ് എടുത്തിട്ടുണ്ട്. മുമ്പ് പല തവണ വിജയ്‌നഗറില്‍ നിന്നു തന്നെ മോഷണം, ബലാത്സംഗം, ആയുധം കൈവശം സൂക്ഷിക്കല്‍ കേസുകളില്‍ പെട്ടിട്ടുള്ള സര്‍വന്ത് ഗ്രാമത്തിലെ പല പെണ്‍കുട്ടികളെയും ഈ രീതിയില്‍ ആക്രമിച്ചിട്ടുണ്ടെന്ന് ഗ്രാമീണര്‍ പോലീസിന് മൊഴി നല്‍കിയിട്ടുണ്ട്. കയ്യില്‍ ഒരു കഠാര സ്ഥിരമായി സൂക്ഷിക്കാറുള്ള ഇയാള്‍ കത്തി കാട്ടി ഗ്രാമത്തിലെ പെണ്‍കുട്ടികളെ അപമാനിക്കുന്നത് പതിവാണെന്നും പോലീസിനെയോ നിയമത്തെയോ ഒരു തരത്തിലും ഭയപ്പെടാതെയാണ് നടക്കുന്നതെന്നും ഗ്രാമീണര്‍ പറഞ്ഞു. മൂന്ന് ദിവസത്തേക്ക് ഇയാളെ റിമാന്റ് ചെയ്തിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha