മഹാരാഷ്ട്രയില്‍ ബി.ജെ.പിയും ശിവസേനയും ഒരുമിച്ചു നീങ്ങും. ഇതിന്റെ ഭാഗമായി മന്ത്രിസഭയില്‍ ശിവസേന അംഗങ്ങളെ ഉള്‍പ്പെടുത്തുമെന്നും ഭാവിയില്‍ ഇരു പാര്‍ട്ടികളും ഒരുമിച്ച് തിരഞ്ഞെടുപ്പിനെ നേരിടുമെന്നും മുഖ്യമന്ത്രി ദേവേന്ദ്ര ഫട്‌നവിസ് പറഞ്ഞു.
ദിവസങ്ങള്‍ക്ക് മുമ്പ് തന്നെ ഒരുമിച്ച് ഇരുപാര്‍ട്ടികളും ഒരുമിച്ചു നീങ്ങാന്‍ ധാരണയായിരുന്നെങ്കിലും ഇന്നലെയാണ് ഔദ്യോഗികമായി പുറത്ത് വിട്ടത്. മാദ്ധ്യമങ്ങളെ ഇക്കാര്യം അറിയിക്കുമ്പോള്‍ ബി.ജെ.പിയിലെയും ശിവസേനയിലെയും നേതാക്കള്‍ മുഖ്യമന്ത്രിക്കൊപ്പമുണ്ടായിരുന്നു. സേനയുടെ പ്രധാന ആവശ്യങ്ങള്‍ അംഗീകരിക്കാതെ അവരെ വരുതിയിലാക്കാന്‍ ബിജെപിക്ക് കഴിഞ്ഞു.
ശിവസേനയ്ക്ക് അഞ്ച് പേര്‍ക്ക് കാബിനറ്റ് റാങ്ക് ഉള്‍പ്പെടെ 12 മന്ത്രി സ്ഥാനമാണ് ബിജെപി വാഗ്ദാനം ചെയ്തിരിക്കുന്നത്. മന്ത്രിമാര്‍ ഇന്ന് സത്യപ്രതിജ്ഞ ചെയ്ത് ചുമതലയേല്‍ക്കും. വകുപ്പുകള്‍ക്കും ഏകദേശ ധാരണയായിട്ടുണ്ട്. മുന്‍പ് ശിവസേന ആവശ്യപ്പെട്ടിരുന്ന ആഭ്യന്തരവകുപ്പോടു കൂടിയ ഉപമുഖ്യമന്ത്രി പദം വേണ്ടെന്നുവച്ചിട്ടുണ്ട്.