മുല്ലപ്പെരിയാര്‍ അണക്കെട്ടിലെ ജലനിരപ്പ് 142 അടിയില്‍ നിന്ന് 152 അടിയായി ഉയര്‍ത്തണമെന്ന് ആവശ്യപ്പെട്ട തമിഴ്‌നാട് നിയമസഭയില്‍ പ്രമേയം അവതരിപ്പിച്ചു പാസാക്കി. മുഖ്യമന്ത്രി ഒ പനീര്‍ശെല്‍വമാണ് പ്രമേയം അവതരിപ്പിച്ചത്. ജലനിരപ്പ് 152 അടിയായി ഉയര്‍ത്തുന്നതിന് കേരളത്തിന് കേന്ദ്രം ശരിയായ മാര്‍ഗ നിര്‍ദ്ദേശം നല്‍കണമെന്നും പ്രമേയം ആവശ്യപ്പെട്ടു.

തമിഴ്‌നാടിന് ജലം ലഭ്യമാക്കുന്നതിന് വേണ്ടി പ്രവര്‍ത്തിച്ച മുന്‍ മുഖ്യമന്ത്രി ജയലളിതയേയും മറ്റുമന്ത്രിമാരെയും പ്രമേയത്തില്‍ പ്രകീര്‍ത്തിക്കുന്നുണ്ട്.തന്റെയും മുന്‍ മുഖ്യമന്ത്രി ജയലളിതയുടേയും ശ്രമഫലമായാണ് മുല്ലപ്പെരിയാര്‍ ജലനിരപ്പ് 142 അടിയാക്കാന്‍ കഴിഞ്ഞതെന്നും പനീര്‍ശെല്‍വം സഭയില്‍ പറഞ്ഞു.
അതേ സമയം പ്രമേയത്തില്‍ ഭേതഗി വരുത്തണമെന്ന ഡിഎംകെ അംഗം ദുരൈമുരുകന്റെ നിര്‍ദ്ദേശം തള്ളിയതിനെ തുടര്‍ന്ന് ഡിഎംകെ അംഗങ്ങള്‍ സഭയില്‍ നിന്നും ഇറങ്ങിപ്പോയി.പുതിയ ഡാം നിര്‍മ്മിക്കാനുള്ള കേരളത്തിന്റെ നീക്കം തടയണമെന്നും തമിഴ്‌നാട് കേന്ദ്രത്തോട് അവശ്യപ്പെട്ടിട്ടുണ്ട്.