സുനന്ദ പുഷ്‌ക്കറിന്റെ കൊലപാതകവുമായി ബന്ധപ്പെട്ട് ഭര്‍ത്താവും എം.പിയുമായ ശശി തരൂരിനെ നാളെ വീണ്ടും ചോദ്യം ചെയ്യും. സുനന്ദയുടെ മരണം അന്വേഷിക്കുന്ന പ്രത്യേക സംഘമാണ് ചോദ്യം ചെയ്യുന്നത്. ദിവസങ്ങള്‍ക്ക് മുമ്പ്് സുനന്ദയുടെ മകന്‍ ശിവ്‌മേനോനെ ചോദ്യം ചെയ്തപ്പോള്‍ ലഭിച്ച വിവരങ്ങളുടെ അടിസ്ഥാനത്തിലാണ് തരൂരിനെ വീണ്ടും ചോദ്യം ചെയ്യുന്നതെന്ന് ഡല്‍ഹി പോലീസ് കമ്മീഷ്ണര്‍ പറഞ്ഞു.
സാക്ഷികളെ എല്ലാം ചോദ്യം ചെയ്തിട്ടുണ്ടെന്നും ചില കാര്യങ്ങളില്‍ വ്യക്തത വരുത്താനുണ്ടെന്നും അതിനാല്‍ അടുത്ത ദിവസം തരൂരിനെ വീണ്ടും ചോദ്യം ചെയ്യുമെന്നും ഡല്‍ഹി പൊലീസ് കമ്മീഷണര്‍ ബി.എസ് ബസി മാധ്യമപ്രവര്‍ത്തകരോട് പറഞ്ഞത്.
തരൂര്‍ മുമ്പ് നല്‍കിയ മൊഴികളും പൊലീസ് അന്വേഷണത്തില്‍ ലഭിച്ച വിവരങ്ങളും തമ്മില്‍ താരതമ്യം ചെയ്യുമ്പോഴുണ്ടാകുന്ന അവ്യക്തത നീക്കാനാണ് പൊലീസിന്റെ ശ്രമം. എന്നാല്‍ കൊലപാതകം നടന്ന് ഒരു വര്‍ഷം കഴിഞ്ഞാണ് അന്വേഷണം ആരംഭിച്ചതെന്നും തെളിവുകള്‍ നശിപ്പിക്കുപ്പെട്ടുവെന്നും ചൂണ്ടിക്കാട്ടി സി.ബി.ഐ അന്വേഷണം ആവശ്യപ്പെട്ട് ഡല്‍ഹി ഹൈക്കോടതിയില്‍ സമര്‍പ്പിച്ചിരുന്ന പൊതു താല്‍പര്യ ഹര്‍ജി കോടതി തള്ളി. പൊലീസ് അന്വേഷണം തൃപ്തികരമാണെന്നും മറ്റൊരു ഏജന്‍സി അന്വേഷിക്കേണ്ട ആവശ്യമില്ലെന്നും കോടതി നിരീക്ഷിച്ചു.
സുനന്ദയുടെ ഓഫീസ് ജോലിക്കാര്‍, സുഹൃത്തുക്കള്‍, സമാജ് വാദി പാര്‍ട്ടി നേതാവ് അമര്‍സിംഗ്, മുതിര്‍ന്ന പത്രപ്രവര്‍ത്തക നളിനി സിംഗ് തുടങ്ങിയവരെ പൊലീസ് നേരത്തെ ചോദ്യം ചെയ്തിരുന്നു. കഴിഞ്ഞ വര്‍ഷം ജനുവരി 17നാണ് ന്യൂഡല്‍ഹിയിലെ പഞ്ചനക്ഷത്ര ഹോട്ടലില്‍ സുനന്ദയെ മരിച്ച നിലയില്‍ കണ്ടത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha